Sunday, August 31, 2025

ကမ်းစပ်တရား

ကမ်းစပ်တရား
___________________

ရေပြင်က
တိမ်ကို လှမ်းလှမ်း မျှားတယ်

နွမ်းလျဆူဝေနေသော
အတိတ်နွမ်းနွမ်း၌
လက်သိပ်ထိုးကျွမ်းမြည့်ခြင်းများ
ရင်ဘတ်အလျားပေါ်
တခမ်းတနားဖိတ်လျှံကျခဲ့ရဲ့

တိမ်တွေရဲ့ခြေသံကိုနားစွင့်မိခဲ့သူ
ရေကန်ထဲ
ခဲတစ်လုံးပစ်ချဖို့ထိ မမိုက်ကန်းခဲ့နိုင်

လေညင်းနဲ့အပြိုင်
ကောင်းကင်ကို ပြုံးပြနိုင်ခဲ့ပြီ။

#ရတုသစ်
28082014
2:25PM

Saturday, August 30, 2025

ယုံကြည်စွာ ရယ်မောပြီးတဲ့နောက်

ယုံကြည်စွာ ရယ်မောပြီးတဲ့နောက်...
__________________________________

မျက်ရည်ဖြိုင်ဖြိုင်ကျအောင် ရယ်မောပြီး
လက်သီးကိုပဲ တင်းတင်းထပ်ဆုပ်ထားလိုက်​ကြတယ်
ဒင်းတို့က ဘာသားနဲ့ ထုထားတာမို့လဲ
အဓမ္မဝါဒီတွေရဲ့ မေးရိုးတွေကို တစ်စစီချိုးပစ်ဖို့
နာကြည်းစိတ်ကို မိုင်ကုန်လွှတ်ပေးထားလိုက်ကြတယ်
တစ်နေ့တစ်လံ ကျည်ဆန်ဘယ်ပြေးမလဲ
အရှင် မထွက်ချင်သူတွေရဲ့ မိုက်ဇာတ်ကိုသိမ်းပေးဖို့
သံသရာရဲ့နောက်ဘီးကျွံချိန်ကလည်း နီးပါပြီ
မျက်လုံးတွေ ရဲရဲနီအောင် ရယ်မောပြီးတဲ့နောက်
ဒီဇာတ်လမ်းကို ရိတ်သိမ်းနိုင်တဲ့သူဟာ
ပြည်သူက လွဲပြီး အခြား မရှိပါဘူး
ပေါက်နေတဲ့ နဖူးတွေနဲ့ပဲ
မိစ္ဆာတံတိုင်းတွေ မပြိုမချင်း ဆက်တိုက်နေကြတယ်။

#ရတုသစ်
31082022
5:53PM

Thursday, August 28, 2025

အထီးကျန်သူရဲ့အစီအစဥ်

အထီးကျန်သူရဲ့အစီအစဉ်
__________________

လိုအပ်တာထက် ပိုတိတ်ဆိတ်မယ်
ခန္ဓာကိုယ်အတွက် လေ့ကျင့်ရမယ်
စာတွေများများဖတ်ဖြစ်အောင် ကြိုးစားမယ်
ချစ်ပေမဲ့ ချစ်တယ် မပြောတော့ဘူး
လွမ်းပေမဲ့ လွမ်းတယ် မပြောတော့ဘူး
ဒါတွေဟာ
ဘယ်သူပိုင်တဲ့ ကိုယ့်ကမ္ဘာဖြစ်မလဲ
အိပ်မက်တွေက
မသေချာဘူးလို့ အိပ်မက်မက်တယ်
နေမကောင်းပေမဲ့ သက်သာပါတယ်။

ရတုသစ်
21112017
10:03PM

တစ်စိတ်တစ်ပိုင်းဒိန်ခဲများ

တစ်စိတ်တစ်ပိုင်း ဒိန်ခဲများ
___________________________

နာရီတွေဟာ
ကမ္ဘာကြီးကို လည်စေတဲ့ စက်သွားတွေဖြစ်ရဲ့။

မနက်ဖြန်ရဲ့ မျက်နှာသစ်ချိန်လေးမှာ
အေးအေးဆေးဆေး အသက်ရှူခွင့်ရချင်တယ်
ညှိုးနွမ်းကံကြမ္မာရယ် ၊ ဒုက္ခများရယ်
ငါ့ ဖွားဘက်တော်တွေ ပီသလွန်းခဲ့ပေစွ။

ကြွက်တွေဟာ
ဥမင်လိုဏ်ခေါင်းရဲ့ မူလပိုင်ရှင်တွေ ဖြစ်တယ်
ကြွက်တွေဟာ အပျင်းကြီးနေတဲ့ နာရီတွေကို
တတိတိ ကိုက်ဖြတ် စားသောက်ခဲ့ကြပေါ့ ။

မနက်ဖြန်တွေ ကျန်သေးလား
မနက်ဖြန်တွေ ရှိသေးလား
ဒိန်ခဲပန်းကန်ဟာ ကြွက်တွင်းဝမှာ ကျန်ခဲ့ပြီ
သေရမယ့် ကံကြမ္မာဟာ
ဇာတာခွင်မှာလည်း အထင်အရှား ရှိခဲ့လိမ့်မယ်
နာရီတွေပေါ်က လိမ့်ကျသွားတဲ့အခါ
ကမ္ဘာကြီးကို ကဗျာကြီးက ကယ်တင်နိုင်/မနိုင်
အမှုဟောင်းတွေကိုတော့
တရားမျှတတဲ့ ကဗျာတွေက ဖြေရှင်းပေးပါလိမ့်မယ်
ဒိန်ခဲတွေ အရည်ပျော်ကျသွားတဲ့အခါ... ။ ။

ရတုသစ်
29082015
5:40PM

Wednesday, August 27, 2025

အထီးကျန်မိုးတိမ်

အထီးကျန်မိုးတိမ်
__________________


မပြောဖြစ်မယ့် အကြောင်းအရာတွေ
ကိုယ် တစ်ယောက်တည်း ပြောလို့
မကြည့်ဖြစ်တဲ့ နာရီတွေကိုလည်း
ခဏ ခဏ လှမ်းကြည့်နေမိတယ်။

မဖူးပွင့်သေးတဲ့ သနပ်ခါးပန်းကလေးထဲမှာ
မင်း ပါးပြင်လေးကို လိုက်ရှာရင်း
မဖတ်ချင်တဲ့ စာအုပ်တွေကို
ဟိုလှန်ဒီလှန် ကောက်လှန်နေရတယ်။

မရောက်လာသေးတဲ့ ခြေသံတွေကို
စိတ်ကူးနဲ့ တံခါးဖွင့်ပေးလို့
မဆိုဖြစ်သေးတဲ့ သီချင်းတွေကို
စိတ်လိုလက်ရ နားစွင့်ထားမိတယ်။

မတီးဖြစ်တော့မယ့် ဂစ်တာလေးဟာ ကိုယ်ဖြစ်ပြီး
အသံမထွက်သေးတဲ့ ကြိုးကလေးဟာ မင်းဖြစ်မယ်
ဘယ်သူ့ကိုမှ မစိုရွှဲစေချင်လို့
ကိုယ့်တစ်ကိုယ်စာလေး အံကြိတ်ပြီး ညို့ရတယ်
မိုးလေဝသသတင်းထဲမှာ မပါတဲ့ တိမ်ထူထူလေးဟာ
ကိုယ်ရေးဆွဲထားတဲ့ ပန်းချီကားတစ်ချပ် ဖြစ်ပါတယ်။

ရတုသစ်
27082017
10:58AM

မီးခဲပြာဖုံးအပျော်တွေ

မီးခဲပြာဖုံးအပျော်တွေ
________________________

ခံစားမှုကလည်း
မိုးလေ မကင်းလွတ်
လက်ရှိ ​ကျန်းမာရေးကလည်း
စိုထိုင်းဆများများနဲ့ အနီရောင်
အာရုံထဲ မှိုတွေချည်း အဆုပ်လိုက်
ပွင့်လင်းရာသီရယ် ဘယ်တော့လဲ

မျှော်သူ စောင့်သူ ပဋိပက္ခနဲ့ မိုးတွေထဲ
မီးခိုးအူအူ ယာတောလေးလည်း နာဖျားခဲ့
ဖွင့်မပြောချင်လို့ ဆွံ့အထားရတဲ့နှုတ်ဖျားမှာ
အနာဟောင်းတွေ တိုးဝှေ့တုန်ယင်

သြော်...မစိမ်းပင် မစိမ်းပင်
ဒဏ်ရာကို ကမ္ဘာမှတ်လို့ ချဲ့ထွင်ရက်လေသူ
ညရဲ့ပြက္ခဒိန်တွေထဲ ပြာမှုန်ပြာစတွေ

ဝဋ်မှာ အပ ငရဲမှာ အမြဲ
လွဲခဲ့လေသော အမြိုက်တရား တလူလူ
နင်ဘယ်သူလဲ ငါ ဘယ်သူလဲ
ဆုတောင်းမှားခဲ့ကြသူများ
တစုတဝေးတည်းရှိနေတဲ့ ပစ္စန္တရာဇ်မှာ
ဘယ်သူ့အပူက ဘယ်သူ့ထက် ပိုပူမလဲ
ဘယ်သူက ဘယ်သူ့အရင် ပြာကျမလဲ

ငါတို့ ဘယ်အကွေ့မှာ မှားခဲ့ကြသလဲ
ငါတို့ ဘယ်နေ့ မှန်ကြမလဲ
ငှက်သင့်စရာကောင်းတဲ့ ဆွမ်းခံလမ်းပေါ်မှာ။

#ရတုသစ်
29072024
4:20PM

တိမ်တွေလှကြောင်း ပြောရအောင်

တိမ်တွေလှကြောင်း ပြောရအောင်
__________________________________

ဝါဂွမ်းစိုင်လေးတွေ
အချင်းချင်း ပွေ့ဖက် နှုတ်ဆက်နေကြသလို

ရော့ကီးတောင်တန်းကြီးပေါ်
သိုးရိုင်းအုပ်များ အစာအိမ်အတွက် လှုပ်ရှားနေကြသလို

ပင်လယ်ရေမြှုပ်တွေရဲ့ တလှုပ်လှုပ် ရွေ့လျားမှုကို
ဝေဟင်က ငုံ့ကြည့်နေရသလို
စသဖြင့်...
စိတ်ကူးတည့်ရာအတိုင်း
ပုံဖော်ရေးဆွဲလို့ရတယ်

အရုပ်ရေးမရတဲ့ ရေပြင်ပေါ်
တိမ်တွေက အရိပ်ထင်နိုင်တယ်
တောင်တန်းတွေပေါ်
ထီးယောင်ဆောင်ပြီး အုပ်မိုးနိုင်တယ်
နေရောင်ခြည်ကြောင့် တိမ်ဖြစ်သလို
တိမ်က​နေ ပင်လယ်တွေထိ စီးဆင်းတယ်

အိမ်ကိုလွမ်းကြောင်း
တိမ်တွေနဲ့ ဘာသာပြန်ကြတယ်
အရာရာ မတည်မြဲကြောင်း
တိမ်တွေနဲ့ လေးနက်ပြကြတယ်
ခြေသလုံးအိမ်တိုင်ဘဝအကြောင်း
တိမ်တွေနဲ့ ကဗျာမှုပြုကြတယ်
မာယာများခြင်းအကြောင်း
တိမ်တွေနဲ့ ထပ်တူပြုကြတယ်
တိမ်ဆိုတာ ကဗျာပဲ
ဘာဖြစ်ဖြစ် ဖွင့်ဆိုလို့ရတယ်

အခု မော့ကြည့်နေမိတဲ့ကောင်းကင်မှာ
ဘယ်ပုံစံနဲ့ တိမ်တွေ လှနေသလဲ
တစ်ယောက်ချင်းစီမှာ
အဓိပ္ပါယ်တစ်မျိုးစီ ရှိနေကြလိမ့်မယ်
ဒါကိုက
တိမ်ရဲ့အရသာဖြစ်ပါတယ်။

#ရတုသစ်
02012025
2:52PM

(ကဗျာခေါင်းစဥ် - ကဗျာဆရာမခင့်မိုးခင်)

တစ်ခုခုဖြစ်ခဲ့သလို မိတ်ဆက်

တစ်ခုခု ဖြစ်ခဲ့သလို မိတ်ဆက်
____________________________


ဘုရားပုံမှန် ရှိမခိုးဖြစ်ပေမဲ့ မေတ္တာပုံမှန် ပို့ဖြစ်ပါတယ်
တရား ခဏခဏ မနာကြားတတ်ပေမဲ့ ပရိတ်,ပဋ္ဌာန်း အမြဲရွတ်ဖြစ်ပါတယ်
မိဘကို မထောက်ပံ့နိုင်သေးပေမဲ့ မိဘစိတ်မဆင်းရဲရအောင် နေထိုင်ပါတယ်
စိတ်ညစ်ရင် တိတ်ဆိတ်နေတတ်ပြီး ပျော်တဲ့အခါ သီချင်းနားထောင်တတ်ပါတယ်
ငြီးငွေ့လာတဲ့အခါ မုတ်ဆိတ်ရိတ်ပြီး စိတ်ဖိစီးနေရင် ဆံပင်တိုတိုညှပ်ပါတယ်
လက်သည်းခြေသည်းတွေ ရှည်လာတာ မြင်ရရင် မနေတတ်ပေမဲ့
မုတ်ဆိတ်ရှည်အောင် ထားပြီး စိတ်လိုလက်ရ ညှဉ်းသိုးသိုးနေတတ်ပါတယ်
စကားပြောရင် တိုးတိုးညင်းညင်း အေးအေးဆေးဆေး ပြောတတ်ပေမဲ့
တစ်ယောက်တည်း ရယ်မိတဲ့အခါ ဟက်ဟက်ပက်ပက် အသံကျယ်နေတတ်ပါတယ်
အကူအညီတောင်းရမှာ ဝန်လေးတတ်ပြီး တတ်နိုင်တဲ့နေရာက ကူညီချင်လေ့ရှိပါတယ်
ကဗျာ မရေးတတ်တော့ဘူးလို့ တစ်ယောက်တည်း မကြာခဏ ပြောနေတတ်ပြီး
မရေးတတ်တော့တဲ့ ကဗျာတွေကို စိတ်ကူးပေါ်တိုင်း ရေးနေမိတတ်ပြန်ပါတယ်
ရေချိုးပြီး မှန်ကြည့်ဖြစ်တဲ့တစ်နေ့က “ကျွန်တော်က ဘယ်သူပါလဲ ရတုသစ်”လို့
ကိုယ့်ကိုယ်ကိုယ် ပြန်မေးရင်း မိုးမဆုံးမြေမဆုံး တွေးတောဖြစ်ခဲ့ဖူးပါတယ်
တစ်ခုခုဖြစ်ခဲ့တာ သေချာပေမဲ့ ဘာဖြစ်မှန်း မသိခဲ့တာလည်း သေချာခဲ့ပါတယ်
လောကဓံတချို့ကို ကဗျာနဲ့တွန်းကန်ရင်း လူသားပီပီသသ နေထိုင်ချင်ပါတယ်
ကဗျာတွေကို ရခဲ့မိတဲ့အတွက် နောင်တမရခဲ့ဖူးတာလည်း ဝန်ခံခဲ့ပါတယ်
ကဗျာတွေဆီကနေ ခံနိုင်ရည်တွေ ပြန်လည်ရရှိနေတာကိုလည်း ကျေးဇူးတင်ပါတယ်
ဘဝထဲ ကဗျာတွေ ရှိနေသေးသရွေ့ လောကကြီးထဲ နေပျော်အောင် နေပါတယ်
ကဗျာယဉ်ကျေးမှု မြင့်တက်လာမယ့်နေ့ကို မပျင်းမရိ စောင့်နေချင်ပါသေးတယ်။

ရတုသစ်

Wednesday, December 13, 2017

ငါ့ အရာရာ

ငါ့ အရာရာ
_____________


ငါ့စိတ်ကူးမိသမျှ ပျံသန်းရာ
ကဗျာတွေကိုတောင်
ပိုင်စိုးပိုင်နင်းလုပ်နိုင်သူလေးငဲ့

ငါ့ရဲ့ ဥတုသုံးပါးလုံးကို ယူပါ
ငါ့ရဲ့ လက်ကို လာဆုပ်ကိုင်ပါ
ငါ့ အရှိတရားတွေကို အုပ်ချုပ်ပါ

တစ်လောကလုံး အကျွတ်တရားရသွားလည်း
မင်းနဲ့ အတူတူရှိနေရမယ်ဆို
အဲဒီ နိဗ္ဗာန်ကို ငါ ငြင်းဆန်ရဲပါတယ်

ငါ့အရိုင်းစိတ်အားလုံး
ဖြည်းဖြည်းချင်း နူးညံ့ပါစေတော့
မင်းချော့မှ ငါအငိုတိတ်ပါရစေ ။

ရတုသစ်
13122014
3:27AM

အမှတ်တရစကား ပန်းပွင့်ခြွေသံလေးများ

Free Backlinks