တစ်ခုခုကို ပြောပြဖို့ကြိုးစားတိုင်း
ဒီ တံတိုင်းကြီးက လာလာခံတယ်
ဆန္ဒရှိသလောက်ပြောခွင့်မရတဲ့အခါ
အရာရာ က ညံ့သက် ဆွံ့အ
ခါးရှရှအိပ်မက်တွေပဲ မက်နေရပေါ့
လျော့လျော့သွားပြီလား သံယောဇဉ်
မမြင်နိုင်တဲ့ တစ်နေရာမှာ လူးလှိမ့်ရင်း
လေညင်း တိုးတိုက်ရင်တောင် ရှခံနေရတဲ့အကြောင်း
သတင်းမကောင်းပေမဲ့ ပါးလိုက်ပါရစေ..မမဝေ ။
အရေခွံလဲလို့ရစတမ်းဆို
ကျွန်တော့် ရင်ဘတ်အခန်းကို ပြန်သစ်ချင်ရဲ့
မဖြစ်နိုင်တာကို တမ်းတရတဲ့အခါ
ရင်မော တာပဲ အဖတ်တင်ကျန်တတ်သလား
ဒီ စောင့်စားခြင်းများနဲ့ ဘ၀
ကျွန်တော် ဘယ္လို ရုန်းထ ရမလဲ
လဲကျနေတဲ့အတိုင်းလေးပဲ ကြွေမယ်
နောက်တစ်ခါ ဝေဖို့စဉ်းစားရင်
ကျွန်တော့် ရင် ကို ဓားတင်ပစ်ခဲ့ပါ
မမအကြောင်းလေးတွေးရင်း လွင့်စဉ်ချင်လို့ ။
မရင့်ကျက်သေးတာ အျပစ္လား မမေ၀
အမှားတွေ ထပ်ထပ်လုပ်မိတိုင်း
ကျွန်တော် ရိုင်းတယ်ချည်း မထင်ပါနဲ့
ပတ်၀န်းကျင်ရဲ့ အစွေအစောင်းက
ရင်ဘတ်ကို လာလာရှလို့ပါ
ဖြစ်နိုင်ရင် ညတိုင်း ရူးချင်တယ် ။
မိုက်ရူးရဲအပေအတေကောင်တစ်ယောက်မို့
ကိုယ်ယောင်ဖျောက်မရတဲ့ စိတ်ဆတ်ဆတ်နဲ့
အချိုမသတ်တတ်တဲ့ဗီဇတွေ ဖျောက်နိုင်ဖို့
ကျွန်တော့် လျှို့၀ှက်ပညာရေးမှာ
မမပဲ ဂိုက်လုပ်ပေးပါ မမဝေ..။ ။
ရတုသစ်
18-03-2013
1:26 AM
No comments:
Post a Comment