စာအကြောင်းလား
ကဗျာအကြောင်းလား
တံတွေးတဖွားဖွားထွက်ကျတဲ့အထိ
အာပေါင်အာရင်းမိအောင်ပြောခဲ့တဲ့ပုံရိပ်များ
သင်္ဂဇာချောင်းနားကကျောင်းတော်မှာကျန်ခဲ့တယ် ။
ဖူးပွင့်ကဖေးက မေးတယ်
"ဘယ်မှာလဲ.. ခင်ဗျားနဲ့အတူ ကျဆိမ့်သောက်တဲ့သူ " တဲ့
ကျုပ်မဖြေခဲ့ဘူး
ပုံမှန်သောက်နေကျ "ကျဆိမ့်"ကိုမသောက်ဘဲ
စာပွဲထိုးလေးလာချတဲ့"ပုံမှန်" တစ်ခွက်သောက်ခဲ့မိ
သတိရစိတ်က အဲဒီလို ယောင်မှားတတ်တယ် ကိုချစ် ။
ကျုပ်တို့သွားနေကျ "မဇ္ဈိမ " ကလည်း
ရွှေမိလေးကို မတွေ့ရတော့တာက လွဲလို့
လတ်ဆတ်ဆဲ ပန်းချီအိမ်လေးပေါ့
ဆွေးနွေးကြ ၊ ငြင်းခုန်ကြ၊ ရွတ်ဆိုကြနဲ့
ကဗျာတွေ အချေအတင် မွေးဖွားခဲ့ရာ
အင်္ဂါထောင့်က ခုံတန်းလေးမှာ
တစ်နေရာစာ လစ်ဟာသွားခဲ့ပြီ
လွမ်းတတ်တဲ့ရင်ဘတ်ကြီးတွေကိုမှ
ဆွံ့အအောင် ကျောခိုင်းခဲ့လေခြင်းဗျာ...။
ပိယေဟိတွေနဲ့ ၀ိပ္ပယောဂေါ ရတာလဲ
တကယ့်ကို ဒုက္ခေါမှ ဒုက္ခေါအစစ်ပဲ ကိုချစ်ရေ...
အလွမ်းနဲ့ထုဆစ်ရတာမို့ စိုထိုင်းထိုင်းတော့ဖြစ်မယ် ။
"နှင်းဆီငါးပွင့်နဲ့ကျစ်တဲ့ကြိုး " တစ်ချောင်းထဲမှာ
ခင်ဗျားမပါရင် ကြိုးဘယ်ဖြစ်တော့မလဲ
ညလုံးပေါက် ရူးသွပ်နေကျ
(၄၁ )လမ်းက ဖိုက်ဘာကင်းနက်ကဖေးဆိုင်ထဲ
စာလုံးပေါင်းမလွဲတော့တဲ့ ကီးဘုတ်ခလုတ်တွေ
ခင်ဗျားကြောင့် ငုပ်တုတ်မေ့ကျန်ခဲ့
အခု...ရန်ကုန်မှာ..စာလုံးပေါင်းမှားတုန်းပဲလား
ထားရာနေ စေရာသွား ဘ၀တွေမို့
လွမ်းရှ စိတ်မရှိခဲ့ရင် အကောင်းဆုံးပေါ့
ပြည်ဖုံးကားချမထားတဲ့ကျောင်းတော်ကြီးက
အလွမ်းတွေ တူးဖော်နေဆဲဆိုတာ သတိရပါ ။
ရန်ကုန်မှာ "လမ်း " တွေများတယ်ဆို
"မီးစိမ်း " ကိုမြင်မှ " လမ်း" ကူးဗျာ
ဒီတစ်ခုတော့..တခုတ်တရ မှာမယ်
သင်္ဂဇာချောင်းရယ်
ကျောင်းတော်ကြီးရယ်
ဖူးပွင့်ကဖေးရယ်
မဇ္ဈိမ ပန်းချီအိမ်ရယ်
တနင်္ဂနွေ ကဗျာမြေသားရယ်
အားလုံး...အားလုံးပဲ
ခင်ဗျားကို သတိရ လွမ်းရှနေတဲ့အကြောင်း
ကျုပ် စာလုံးပေါင်း မပြတတ်တော့ဘူး။
တစ်ခါတလေဖြစ်ဖြစ်
အတိတ်ကို ပြန်စီစစ်မိတဲ့အခါ
မန္တလေးရှိရာ အရပ်တည့်တည့်
ခင်ဗျား မျက်နှာမူလှည့်ကြည့်ပါ
အားလုံးဟာ...အလွမ်းလူးနေတဲ့ တလွင့်လွင့် အဝါ ။ ။
ရတုသစ်
30052013
ညေန 3နာရီ 08 မိနစ်
**("နှင်းဆီငါးပွင့်နဲ့ကျစ်တဲ့ကြိုး )..မောင်ခန့်မြေ(ထီလာ)၏ ခေါင်းစဉ်..။
No comments:
Post a Comment