တိမ်တွေ..ငိုနေပြန်ပြီကွယ်...

* ဖလှယ်ပေါင်းစပ်မရတဲ့ မျဉ်းပြိုင်နှစ်ခုအဖြစ်

  ထုဆစ်ခံထားရတဲ့..ဘ၀က..ခါးသီးစရာ..

  မာယာမပါတဲ့ အလွမ်းတွေထိုးသိပ်လို့

  ခပ်တိတ်တိတ်ကြေကွဲရင်း..

  ငို ပွဲနွှဲနေတဲ့ ငိုချင်းသည် တစ်ယောက်အတွက်

  ရက်စက်ခြင်းတွေပဲပေးလာခဲ့

  အမှတ်တမဲ့တိုင်းကိုတောင် အမှတ်တရဖြစ်လွန်းသူက

  ရင်ပူနေရတာ မဆန်းတော့ပါဘူးကွယ်...။

* နှလုံးသားဗလာနဲ့..ရင်ခွင်

   အမုန်းတရားပါတဲ့..ရင်ခွင်

   မတွေ့မြင်ရပါလို..တောင်းဆုဆိုခဲ့မိ..

   အဆိပ်မရှိတဲ့..နှလုံးသွေးနဲ့..တိုင်တည်ကြည့်ခဲ့တယ်...။

* ဆုတောင်းတိုင်းမပြည့်တတ်တဲ့ လောကသဘောက

   တို့တွေရဲ့နောက်ကျောမှာ..လွယ်ပိုးပြီးသား

   တရားမမြင်တတ်သေးတဲ့ အသိစိတ်ကိုပဲ အားမလိုအားမရဖြစ်မိပါရဲ့..။

* ပြိုလဲချင်တဲ့..အလွမ်း

  ငိုပွဲ၀င်တဲ့..အလွမ်းနဲ့

  စမ်းတဝါးဝါးလောကအလယ်မှာ..လည်ပတ်ရင်း

  အတိတ်တွေကို..အသက်ပြန်သွင်းနေတတ်သူ...

* ပြုစားထားသမျှ..အတိတ်

  ကုစားမရတဲ့..စိတ်ကို

  ကြိတ်မှိတ်ဖြေသိမ့်ဆဲ

 အသဲပိုလေးတစ်ခုလောက် လိုချင်နေမိသူ...

* လွမ်းစိတ်ဖြေတဲ့..နှလုံး

  နွမ်းရိပ်ဝေတဲ့..အပြုံး အတွက်

  အိပ်မက်ကဗျာ တစ်ပိုဒ် ရွတ်မိသွား

  ခံစားချက်တူသူတစ်ယောက်ကိုရှာနေမိခဲ့သူ...

* ဒီလူ..ဒီအလွမ်း နဲ့

  ဒီအပန်းတွေ မပြေသေးသရွေ့..

  တငွေ့ငွေ့ ..တလိပ်လိပ် တက်

  ဟိုး.......မိုးထက်၀ဠာ ဆီကနေ

  တိမ်တွေ ငိုနေကြပြန်ပြီကွယ်...။

ရတုသစ်

  (23 /8 /2012 ) 8:50 pm ..thursday