တစ် + တစ် = သုည

အသက်တစ်ချောင်းအတွက် အသက်တစ်ချောင်းကိုဖဲ့ထုတ်ရတာမျိုးရှိရဲ့

ညီမျှခြင်း ဆိုတာ ကိန်းနှစ်ခုရဲ့ ရလဒ်ကို ညှိယူတာပေါ့..စန္ဒာ..။

တစ်နဲ့တစ်ပေါင်းတိုင်း နှစ်ဖြစ်သတဲ့လား ?

ပိုက်သာဂိုးရပ်စ် ရဲ့ဖော်မြူလာတွေ အမှန်ချည်း မဟုတ်ဘူး

ဆော့ခရတ္တိရဲ့အယူအဆတွေလည်း အမှားမကင်းဘူးလေ..။

ဘ၀တစ်ခုကို ဘ၀တစ်ခုက ဆွဲငင်/တွန်းထုတ်တတ်တာပဲ

ဆွဲငင် နိယာမတစ်ခုထဲဆို နယူတန် အမြဲမှန်နေမှာပေါ့..စန္ဒာ..

မင်းထင်သလို မဟုတ်ခဲ့ပါဘူး..

ငါ့ အမြင်လည်း မှားခဲ့တာပါ..။

အမှန်နဲ့ အမှားကို ပလပ်ထိုးရင် အလင်းရနိုင်မလား ?

အရှေ့နဲ့အနောက်မှာတောင် အလင်း/အမှောင်က ၀ိရောဓိဖြစ်နေတယ်

တိမ်တွေဟာ ပင်လယ်ပျိုးမယ့် မျိုးစေ့ပဲ

မျက်လုံးထဲက တိမ်က​တော့ အမှောင်တွေပဲ ရွာတယ်..။

''နှိုင်းယှဉ်/ချိန်ထိုးတာတွေ မုန်းတယ်" ဆိုပြီး..

ပေတံတစ်ချောင်းနဲ့မျဉ်းဖြောင့်ဆွဲနေတဲ့ လူငယ်တစ်ယောက် ။

''ပုံစံခွက်တွေဆို ခါးသီးတယ်" ဆိုပြီး..

သဘာ၀/စိတ္တဇ တွေကိုကင်းဗတ်စ ထဲ အကျဉ်းချနေတဲ့ ပန်းချီဆရာ ။

''ဘယ်လိုမှ မလှပတဲ့ဘ၀ကို နာကြည်းတယ်" ဆိုပြီး..

ကဗျာလှလှလေးတွေ အန်ချနေတဲ့ ကဗျာဆရာ ။

''စိတ်ကူးယဉ်တာတွေ အလကားပဲ" ဆိုပြီး..

အချစ်ဇာတ်လမ်းအနုတွေ ဖွဲ့ပြနေတဲ့ စာရေးဆရာ ။

ဘ၀ဟာ ဘ၀ထက် မပိုပါဘူး..စန္ဒာ..။

အတ္တနဲ့ မာန ပလ္လင်လု နန်းသိမ်းပွဲမှာ မငး်နဲ့ငါ ယဇ်ကောင်ဖြစ်ခဲ့တာပေ့ါ

ငါဟာ သင်ရင်းသင်ရင်းနဲ့ချာချာလည်နေတဲ့ သင်္ချာ

ငါ့တွက်ကိန်းနဲ့ ငါပဲ ရလဒ်တွေ မှန်ကန်နေရဲ့ ။

တစ်နဲ့တစ်ပေါင်းပြီး တစ်ဖြစ်အောင်တွက်ချက်မိတဲ့အခါ

၁ + ၁ = ၀ ဖြစ်သွားပြီ ..စန္ဒာ...

ငါ့ကဗျာဟာ..ဒီမှာ..ပွဲသိမ်းခရာသံ ထမြည်တယ်..။

ဒိုင်လူကြီးရဲ့ အချိန်ပြလက်တံမှာ အချိန်ပို မကျန်တော့ဘူးလေ

တစ်နာရီကို မိနစ်ခြောက်ဆယ်ပဲ သတ်မှတ််ထားမှတော့

ရာခိုင်နှုန်းမပြည့်တဲ့ စံတော်ချိန်နဲ့ပဲ ..ငါတို့

စွယ်တော်ရွက်ဟာ..ကဗျာဆရာ/စာရေးဆရာ/ပန်းချီဆရာတွေရဲ့လက်ထဲမှာ

လှမြဲ လွေနဆဲပါပဲ ..စန္ဒာ...။

                                ရတုသစ်                 

                 ( 25/11/2012 8:30 PM )