နွေဦးသို့ပေးပို့ဖြစ်သော..ရင်နွမ်းရှိုက်သံ

နွေဦးရေ..

"လွမ်းနေပြီလား"လို့ ခဏခဏလာမမေးပါနဲ့

အဖြေမဲ့မဟုတ်တဲ့ ရင်ထဲကအလွမ်းတွေ

အလွမ်းပြေသွားမှာ စိုးတယ် ။

မိုးလင်းချိန်တစ်ပတ်လည်တိုင်း

အလွမ်းလှိုင်းတွေလာလာပုတ်မှတော့

အရုပ်မဟုတ်တဲ့ ရင်ကမ်းစပ်က တဖျပ်ဖျပ်လူး

ရူးချင်လောက်အောင်နွမ်းခဲ့ရတာ

မသိနိုင်ပါဘူးလေ ။

"လွမ်းတယ်"ဆိုတဲ့ေဝါဟာရနဲ့

"သတိရနေတယ်"ဆိုတဲ့ဝါကျလေးတွေက

အပျင်းပြေပြောပြဖို့သက်သက်မှမဟုတ်တာပဲကွယ်

ရင်ထဲကိုယ်စီငြိနေတဲ့ကဗျာနွယ်လေးတစ်မျှင်ကို

အမြဲတမ်းစိမ်းလန်းနေစေချင်တဲ့ကျွန်တော့်အတ္တက

လွမ်းပြ /သတိရပြရုံနဲ့မွတ်သိပ်မှုမပြေခဲ့ဘူး

လွမ်းတိုင်းတူးဖော်ကြည့်ရလွန်းတဲ့ရင်ဘတ်မှာ

အလွမ်းကဗျာရောင်ခြည်သင့်ခဲ့ရပေါ့ ။

ထေ့ငေါ့တဲ့စကားလုံးတွေနဲ့ကျွန်တော့်ကို..

အငိုမခိုင်းလိုက်ပါနဲ့..နွေဦးရေ..။

မျက်ရည်တစ်ပေါက်စိမ့်ထွက်ဖို့အားထုတ်မှုမှာ

သရုပ်ဆောင်တွေလိုမကျွမ်းကျင်တာ ကျွန်တော့်အားနည်းချက်ပေါ့

(ဒါပေမဲ့)စိမ့်ထွက်တဲ့မျက်ရည်တိုင်းလည်း နှလုံးသားမှာမြစ်ဖျားခံခဲ့

နွမ်းယဲ့ယဲ့ရင်ဘတ်တစ်ခုကမျက်ရည်ရဲ့စီးဆင်းမှုကို မတားနိုင်ခဲ့ဘူး ။

နွေဦးရေ...

ကမူးရှူးထိုးပွင့်ထွက်တတ်တဲ့အလွမ်းများနဲ့စည်းနှောင်ပြီး

နွေဦးကိုလွမ်းမပြပါရစေနဲ့

ကျွန်တော့်အလွမ်းတွေရနံ့ပြယ်သွားမှာကြောက်တယ်

နွေဦးကိုလွမ်းတဲ့အလွမ်းမျိုးကျွန်တော့်မှာ

ဘယ်အခါကမှမရှိခဲ့သေးကြောင်း..

ရွဲ့စောင်းစောင်းလက်ရေးနဲ့

နှစ်ကြောင်းရေး နှစ်ကြောင်းခြစ် စစ်ထုတ်ထားပေ့ါ ။

လွမ်းတိုင်းရင်မှာနွမ်းရင်း

နွမ်းလျက်ရှိုက်သံသဲ့သဲ့..လွမ်းခဲ့ပါတယ်

လွမ်းတယ်ပြောမှကျေနပ်တတ်မယ်ဆိုရင်

ရင်နွမ်းရှိုက်သံကိုနားဆင်တတ်ဖို့လိုမယ်လေ..

ကျွန်တော့်ရှိုက်သံတိုင်းဟာ ကဗျာတွေဖြစ်လာတတ်ပေမဲ့

ကျွန်တော့်ကဗျာတိုင်းမှာတော့ ရှိုက်သံမထွက်ပါဘူး

ရှိုက်သံမဲ့တိတ်တဆိတ် ငိုနေသူကိုတွေ့ဖူးလား ?

မရှိုက်ပဲ ဟစ်ငိုနေသံကိုရော ကြားဖူးလား ?

အဲဒီမွာ..အလွမ်းရဲ့အတိမ်အနက်တွေ ရှိတယ်

အဲဒီမွာ..အလွမ်းရဲ့အလင်းနှစ်တွေဖြတ်သန်းတယ်

အဲဒီမွာ..အလွမ်းရဲ့တာရိုးတွေကျိုးကျတယ် ။

နွေဦးရေ..

သတိရတိုင်းကဗျာရေးဖို့..ထပ်ကာထပ်ကာ

တိုက်တွန်းလာမှာကို စောင့်မနေနဲ့လေ

အချိန်နဲ့ဒီရေမှ လူကိုမစောင့်တာ မဟုတ်

ကဗျာကလည်း လူကိုမစောင့်ဘူး..နွေဦးရဲ့

တိမ်းမူးပျော်မောဖွယ်ဘ၀များ ရွိခဲ့မွာပါ

ခါးသီးစက်ဆုပ်ဖွယ်ဘ၀များလည်း ကျော်ဖြတ်ဘူးခဲ့

အမှတ်တမဲ့တွေ..စကားပြောလာရင်

ဖြေရှင်းဖို့ခက်တတ်တာ ဘာ့ကြောင့်လဲ ?

အလဲလဲအပြိုပြို အိုးနင်းခွက်နင်းဖြစ်လိုဖြစ်..

မေ့ပစ်လိုက်ပါလေ..

အမှတ်ရစရာမကောင်းတဲ့ အမှတ်တမဲ့တွေပေါ့ ။

ခဏခဏချော့လွန်းတဲ့ကလေး အငိုသန်ပေမယ့်

ခဏခဏဖွင့်ဟ ရလွန်းတဲ့အလွမ်းကမသန်မာဘူး

ကျွန်တော့်အလွမ်းတွေ..ချို့တဲ့အောင်

ကျွန်တော့်အလွမ်းတွေ..ပေါ့သွမ်းအောင်

ကျွန်တော့်အလွမ်းတွေ..ဖွဲဖြစ်အောင်

ဖျစ်ညှစ်ပြီး လွမ်းသလား မမေးပါနဲ့..

အလွမ်းမှာ သာ အတောင်ပံပါခဲ့ရင်.........။

နွေဦးရေ..

"မသေသောအလွမ်း"ကိုကိုက်ချီထားတဲ့

ကဗျာငှက်ကလေးတစ်ကောင်ရဲ့ရင်ဘတ်ထဲမှာ

အနန္တတံတိုင်းဆီထိလွှင့်တင်ထားမယ့် ရှိုက်သံက

မချိုမြနိုင်ခဲ့ဘူးပေါ့

ဒါပေမယ့်...

အဲဒီရှိုက်သံခါးခါးမှာပဲ.

ကျွန်တော့်အလွမ်းတရားတွေ ပျော်၀င်ပေါင်းစပ်ထားကြောင်း..

ရင်ဘတ်ဟောင်းလောင်းနဲ့ ခေါင်းလောင်းထိုးလိုက်ပါတယ်.။

                                             ရတုသစ်

                            (27 /10 /2012 --5:30 PM)