ဝေးမှာစိုးတယ်..ပွင့်ဦးရယ်

ပန်း

စိမ်းလန်း

တစ်ပွင့်ဆန်း ။

တိတ်ဆိတ်မျှော်မှန်း

ရင်၀ယ်တမ်းတ

ပင်ပန်းလှလည်း

ကိုယ့်အသည်းလွှာ

အမြဲလာကြည့်

သူသာရှိခဲ့

ရစ်ငြိသည့်ကြိုး

မြတ်တနိုးမို့

တိုးတိုးတိတ်တိတ်

လက်ခံစိတ်ဖြင့်

သိုသိပ်လန်းဆန်း

ပွင့်ဦးပန်းသည်

စိမ်းလန်းကြည်လင်..မွှေးစေချင် ။

ကျစ်

အမြစ်

ရင်ကိုညှစ် ။

ဆွဲငင်စူးနစ်

တဖျစ်ဖျစ်မြည်

လွန်းကျစ်သည့်ကြိုး

သည်းကိုတိုးခဲ့

ရင်ပျိုးခင်း၀ယ်

ယှက်ဖြာသွယ်၍

တစ်နွယ်ပင်ဆန်း

တစ်ပွင့်ပန်းမို့

လက်လှမ်း မ၀ံ့

ရင်တုန် တွန့်လျက်

နှုတ်ဆွံ့နေကာ

ပင့်သက်ဖြာသည်

ရင်လွှာလွန်းတင်..ချစ်ကြိုးငင် ။

ကြိုး

စိုးမိုး

ရင်တွင်းတိုး ။

ဝေးသွားမှာစိုး

တိတ်တခိုးနှင့်

တိုးတိုးကြိတ်ဖြေ

သောကပွေခဲ့

ရင်မြေလွှာထိ

အမြစ်ငြိသည့်

ချစ်မိနွယ်ပင်

နွမ်းရိပ်ဆင်သော်

မရွှင်မကြည်

စိတ်ဝေရီလျက်

ဝေ့သီလွင့်ကျ

မျက်ရည်ခသည်

ပြိုကျရင်ခွင်..စိတ်လွင်ပြင် ။

          ရတုသစ်

(9-1-2013// 2:20 PM)