ဖျားနာနေသောပိရမစ်တစ်လုံး

အပြုံးမှာဓားသွားတွေတပ်မလာရ

မျက်၀န်းနှင့်နှလုံးသားချိတ်ဆက်မှုအားကောင်း၏

အပြုံးတုများသည် ပျားရည်ရောသောအဆိပ်

တိတ်ဆိတ်နေသောအခန်းတစ်ခု၀ယ်

ထုထည်ကြီးသောအမှောင်တွေလိမ့်။

ကံထမ်းလာတာ မမြင်ရ ဟု ဆိုသူဆို

လှံထမ်းလာတာ မမြင်ရ ဟုပြောသူပြော

ကံကိုယ်တိုင် လှံထမ်းလာသောအခါ ငုတ်တုပ်မေ့ကျန်ရစ်ခဲ့ရ

လောက ကြီးအား ဘားနဒ်ရှော ထံအပ်နှံပစ်၍

ဂစ်တာတစ်လက်ကီးကြောင်နေသံကို နားထောင်အံ့

လေမလောင်ပဲ ကြွေသောသစ်ရွက်တစ်ရွက်၀ယ်

မရဏကို ခွဲစိတ်ကြည့်မိသောအခါ..

အမှောင်သည်ဖျတ်ကနဲ တံခါးဖွင့်ထွက်လာ ။

ရမ္မက်၀ိုင် အရသာကို မသိသေး

ကျဆိမ့်သည် အိပ်ဆေးကို ပြယ်စေတတ်ရဲ့

စားပွဲထိုးမလေးလာပေးသောဆေးပေါ့လိပ်မှာ

အဆိပ်အနည်းငယ်ရောထွေးပါ၀င်ကြောင်း

ထောင်းထောင်းထသွားသောအငွေ့များကြား

တောင်ပံခတ်သံမှားသောခြင်တစ်ကောင်က

လတ်လတ်ဆတ်ဆတ် သက်သေပြနေတယ် ။

ခဏလေး နေပါဦးခင်ဗျာ..

ဦးငှက်ကြီးရဲ့သီချင်းသံဆုံးရင်ကျွန်တော်ပြန်မယ်

မနက်ဖြန်ရောက်ဖို့ကွမ်းတစ်ယာညက်ခန့်ကျန်သေးရဲ့

လက်ကျန်အလွမ်းလေးတော့ ဆေးစိမ်ထားပါရစေ

ကျွန်တော့်နှလုံးသားမှာပိရမစ်တည်ထားပြီ

ပလီပလာ ပြောခြင်း သည်းခံပါ

သန်ဘက်ခါထိ

ကျွန်တော်ဖျားနာနေမိပါဦးမည် ။ ။

ရတုသစ်

25 /03 /2013