အမေ့ရွာသည်
သာယာငြိမ့်ငြောင်း ၊ကျေးငှက်ပေါင်း၏
ချိုလောင်းသံသာ ၊တေးထံတျာနှင့်
သဘာ၀ဖွဲ့ ၊ ပီပြင်ခဲ့၏ ။
အမေ့ရွာ၏
မျက်နှာမူရာ ၊ရှေ့ဆီမှာလည်း
ရပ်ရွာအတွက် ၊ကျိုးပြုလျက်သာ
တစ်ဖက်ဆည်ကန် ၊ တည်ရှိပြန်၏ ။
အမေ့ရွာကို
၀ဲယာ ၀န်းကျင် ၊ထနောင်းပင်နှင့်
စိမ်းရွှင်ထန်းတော ၊ယာတစ်ကြောက
မနောခွေ့ဖွယ် ၊ ၀န်းကာကွယ်၏ ။
အမေ့ရွာသို့
၀င်ရာ အထူး ၊ ရွာထိပ်ဦး၀ယ်
ကြယ်နူးဖွယ်ကောင်း ၊ ရွာဦးကျောင်းကို
နှစ်ထောင်းအားရ ၊ တွေ့မြင်ရ၏ ။
အမေ့ရွာ၏
နေရာ ဗဟို ၊ ကုန်းမိုမို၀ယ်
ကြည်ညိုတည်ထား ၊ မြတ်ဘုရားမှာ
ညွတ်တွားမ၀ ၊ သပ္ပါယ်လှ၏ ။
အမေ့ရွာ၀ယ်
ဘာသာကိုချစ် ၊မျိုးကျစ်လစ်လျက်
သွေးစစ်နောင်ညီ ၊ ဘာမထီသော
ဇာနည်သားပေါင်း ၊ အင်အားကောင်း၏ ။
အမေ့ရွာ၌
ပျူငှါယဉ်ကျေး ၊ စိတ်ထားဖွေး၍
အေးဆေးတည်ကြည် ၊ မြန်မာပီသော
မဒီကညာ ၊များလှပါ၏ ။
မေ့ရွာခြေနေ ၊ တည်တံ့စေဖို့
ရွာနေလူထု ၊ ဉာဏ်တင်ရှုလော့
ဂရုမထား ၊ မြင်ဝေဝါးလျှင်
နှစ်များမကြာ ၊ချိန်အခါ၌
သဘာ၀ပျောက် ၊ သောကရောက်လိမ့်
ဦးနှောက်ကိုသုံး ၊ ပေါင်းစည်းလုံး၍
စုရုံးညီညာ ၊ ၀ိုင်း၀န်းကာမှ
မေ့ရွာ အလှ ၊ မပျောက်ရှမည်
အပ္ပမာဒ တရား ရှိစေသော၀်
ရပ်ရွာအလှအား မချိစေသော၀် ။ ။
ရတုသစ်
25052013
ည ၈နာရီ ၅၀မိနစ်
2 comments:
ကို၇တု...ေရ...အားေပးခဲ့ပါတယ္
လြမ္းမိပါတယ္အေမ့အိမ္
သတိရမိပါရဲ႕ အေမ႔ရြာရယ္ :)))
Post a Comment