ရင်လွှာဝေးဝေး ဆုတောင်းပေးမယ်
ညတော့ ညပဲ
လင်းနေဆဲစိတ်
ရင်ထဲခုံးထ
ရုန်းကန်ကြွခဲ့
တိတ်က အိပ်မက်
ပြန်နှိပ်စက်စဉ်
ညံ့သက် နှလုံးသား လှပ်လှပ်တုန် ။
အတွေး လှည့်ပတ်
အပူ ဟပ်လည်း
တန့်ရပ်ပစ်ဖို့
အင်အားချို့ခဲ့
စွဲညှို့ထားရာ
ပန်းကမ္ဘာက
ထွက်ခွာချင်စိတ် မရှိဘူးကွယ် ။
မနှင်ပါနဲ့
ကိုယ်ရင်းခဲ့သော
ညရဲ့ဂီတ
ပြင်းရှရှထဲ
ချိုမြ တီးတိုး
လွမ်းစိတ်နှိုးပြီး
ပုန်းလျှိုးငိုရှိုက်ပါရစေနော် ။
သူ..ချန်ထားရစ်
လွမ်း နွံနစ်မိ
အချစ်ခေါ်သံ
ထပ်ထပ်ပြန်ကြား
တောင်ပံ ပြတ်ကြွေ
မြေသက်နေလည်း
ရင်မြေလူးလဲ လာချင်ဆဲပေါ့ ။
အမြဲတမ်းလေ
လွမ်းစိတ်ဖြေလည်း
မပြေနိုင်သေး
စိတ်ထဲလေးကာ
ရပ်ဝေး ခွဲခွာ
သူ့ပုံလွှာကို
စွန့်ကာ မေ့ဖို့ မလွယ်ဘူးကွယ် ။
ဝဋ်ကြွေးလေလား
မဝေဝါးဘူး
သူ့အား ချစ်မိ
အပြစ်ရှိလည်း
ကိုယ်၏ ပြစ်ဒဏ်
ကိုယ်သာခံမည်
သူ့ထံ မသက်ရောက်စေလိုပါ ။
မေတ္တာပေး၍
ရင်မအေးနိုင်
ပူဆွေးခြင်းသာ
ရောက်ရောက်လာပေါ့
ကမ္ဘာတစ်ခြမ်း
အလွမ်းခန်းဖွင့်
မျှော်ကမ်းလင့်လည်း သူ..မသိနိုင် ။
ထားခဲ့တော့လေ
ငဲ့မနေနဲ့
သက်ဝေ ပွင့်သစ်
လန်းဆန်းရစ်ပေါ့
နုမျစ် ချိုသာ
ချစ်တေးလွှာကို
သေချာ ကျူးရင့် သီဆိုရစ်စေ ။
ဝေဆာ ဖူးပွင့် ကြည်ချိုရစ်လေ ။
ရတုသစ်
၂၈၀၇၂၀၁၃
နံနက် ၁၂ နာရီ ၀၅ မိနစ်
No comments:
Post a Comment