အိမ်ဝေးလူရဲ့..ဖြောင့်ချက်

* လောကရဲ့မာယာရောင်စုံတွေကြားမှာ

   ပြေးလွှားရုန်းကန်ရင်း

   အချစ်ပြတင်းတံခါးလေး ဖွင့်ကြည့်မှ

   ခလုတ်ထိခဲ့ရပြီ...အမေရယ်

* ပုခက်လွှဲပေးခဲ့တဲ့ လက်ချောင်းလေးတွေရဲ့

   အဝေးကမ္ဘာမှာ ရောက်ရှိနေလည်း

   အမေက(ကျွန်တော့်ကို)လှမ်းပြီး လွှဲနေတုန်းပေါ့.။

* အမေ့ရဲ့အေးရိပ်ကို ခွာချ

   အတ္တနဲ့ကြိုးတစ်ချောင်းကျစ်လို့

   သမုဒယသစ်ပင်ဆီတွယ်တက်ကြည့်

   အဆိပ်မိလို့ မိမှန်းမသိအောင် ဆွံ့အခဲ့တဲ့ သားပါ..အမေ

* အိပ်မက်အသေတွေကိုအသက်ပြန်သွင်းလို့ရရင်

   ခဏလောက်ပြန်လိုချင်မိရဲ့..

   တကယ့် လက်တွေ့မဆန်တဲ့အဖြစ်မျိုး

   တည့်တည့်..တိုး..တိုး လာတာဆိုးတယ်..

   အဖိုးမဖြတ်နိုင်တဲ့အမေ့မေတ္တာရိပ်အ​ဝေးက

ကျွန်တော်ဟာ

   ဒေးဗစ်ကော်ပါဖီးရဲ့လက်ထဲက

   ပဉ္စလက်စီးကရက်လေးတစ်လိပ်လို

   အလိုလို လောင်ကျွမ်းနေခဲ့ပြီ...။

* ခေါင်းစဉ်ပျောက်နေတဲ့အိပ်မက်တွေပဲ

   ထပ်တလဲဲလဲ နမ်းရှိုက်မိမှ

   လမိုက်ညတွေကိုကြောက်တတ်လာတယ်..။

   ကိုယ့်မာနနဲ့ကိုယ် ပြန်မာပြီး

   ကဗျာတွေနဲ့ ဘ၀ကိုထုဆစ်နေမိ

   အခုထိ ရုပ်လုံးကြွမလာသေး..

   ခပ်ရေးရေး..မှုန်ဝါးဝါးပါပဲ အမေရယ်...။

* လမင်း မရှိ.ကြယ်စင် မရှိ

   အလင်းရဲ့ တမန်တော်တွေ..မေ့ဆေးမိနေတဲ့ ညတွ

   လေညင်း မရှိ..ရနံ့သင်း မရှိ

   ညရဲ့အလှကို ထိန်းနေတဲ့ ကိုယ်ရံတော်တွေ..

ရီ​ဝေနေတဲ့..ညတွေကြောင့်

   မိုင်တိုင်ရှည်လာတဲ့ သက်ပြင်းမောတွေနဲ့

   လေထဲက အိမ်လေးလည်း တစ်စစီပြိုလဲ..

   ထုဆစ်ဆဲ ရုပ်လုံးတွေလည်း

   အရည်ပျော်လုနီး ဆဲဆဲပါပဲ..အမေ။

* ဖြစ်ချင်တာထက်..ဖြစ်သင့်တာကိုတည်ဆောက်ကြည့်နေဆဲ

   ဖြစ်နေတာတွေက ကာရန် မညီဘူး..

   အရူးတစ်ယောက်ဆိုတဲ့သီချင်းလို..

   ဟို..တစ်စ..ဒီ..တစ်စ ပြန့်ကျဲရှုပ်ပွနေလေရဲ့..။

* အောင်မြင်မှုတွေလိုက်ရှာရင်း

   လူပါလွင့်လွင့်သွားတတ်တဲ့

   စိမ်းဆတ်ဆတ် သားဆိုးလေးကို

   နွေးထွေးနေဆဲ..ဆိုတာသိလေ..

   အ​​မေ့ကို ပို ပိုချစ်လေပဲပေါ့...။

* ဒုက္ခကို ဒုက္ခလို့ သိဖို့မကြိုးစားဘဲ

   ပျားသကာလို ချိုမြိန်ရင်း

   မျက်ကွင်းတွေပဲ ညိုလာတယ်..

   ရေတွင်းထဲက လမင်းကိုဆယ်ယူကြည့်တဲ့

   ငတိလူမိုက်တစ်ယောက်လိုဖြစ်နေပြီလား..

   မစဉ်းစားတတ်တော့ဘူး..အမေ။

* နေ့လည်းလွမ်း..ညလည်း လွမ်းနဲ့

   ​​ရော်ရမ်း ..တမ်းတ မိ

   အငမ်းမရအိမ် ပြန်ချင်နေတဲ့စိတ်ကို

   ဖြေသိမ့်စရာလိုက်ရှာရင်း

   ကဗျာတွေနဲ့..အိပ်..

   ကဗျာတွေနဲ့..စား..

   ကဗျာတွေနဲ့.. နှစ်ပါးသွားရင်း

   ကဗျာသမားတစ်ယောက်အဖြစ်..ရှင်သန်ဖို့

   ကျွန်တော်ရုန်းကန်နေဆဲပါပဲ..အမေရယ်..။

+++++++++++++++++++++++++++

( P.S ) အမေ့အတွက်အောင်မြင်မှုတစ်ခုလောက်တော့ သား လွှင့်ထူချင်သေးတယ် အေမ ။

      သားရဲ့ အောင်မြင်မှုဟာ အေမ့ရဲ့ ဆံချည်မျှင်ဖြူဖြူလေးတစ်ပင်လောက်တောင်

      အဖိုးမတန်နိုင်ဘူး ဆိုတာ..သိနေပေမယ့်..အမေရယ်...သား.......................။

 ရတုသစ်

(26/8/2012...9:20.pm)