ကြယ်ပွင့်အိပ်မက်

သမိုင်းပေးဘ၀က တစ်လမ်းသွားပဲ

အင်အားနည်းနေတဲ့မျက်၀န်းတွေက

နားခိုရာမဲ့လို့

အမှည့်လွန်သီအိုရီရိုက်ချက်များ

လတ်ဆတ်မှုကင်းမဲ့နေတဲ့ အိပ်မက်အပုပ်အသိုးများ

ညှိုးလျော်နွမ်းရိနေတဲ့ အသက်ငင်မျှော်လင့်ချက်များ

သယ်ဆောင်ခရီးဆက်ဖို့ ဖန်ဆင်းခံခဲ့ရသလား

တစ်လမ်းတည်းမှာတောင်

မျက်နှာချင်းဆိုင် ရပ်ခွင့်မရတဲ့ဘ၀ကို

ခါးမိတယ် ။

အမှောင်တွေကြီးစိုးတဲ့ ညသိုးသိုးကြီးတွေကို

ငါ တစ်ယောက်တည်း ကြိတ်မှိတ်မျိုချနေမိ

အခုထိ လရောင်ရဲ့အစွန့်ပစ်ကို ခံနေရဆဲပေါ့ ။

မတည်မြဲတတ်တဲ့အချင်းအရာနဲ့မို့

ဘ၀ဆိုတာ

လက်ဖဝါးပေါ်က ဇယားကွက်တွေလား

ဝေဝါးမိနေရဲ့...။

လရောင်မဲ့တဲ့ညတွေထဲထိ

အတူရှိနေတဲ့ကြယ်ပွင့်လေးရေ...

ခုနစ်စဉ်ကြယ်အမြီးထောင်တဲ့အချိန်ထိ

မင်းကိုရှာမိနေဆဲပါပဲကွယ်..

ဒါပေမဲ့

အလင်းတံခါးတွေ ဖွင့်ထားတဲ့အချိန်တွေဆို

ကိုယ့်ခြေထောက်ကို ကြိုးတုပ်လို့

တစ္ဆေတစ်ကောင်ရဲ့ငုပ်လျှိုးမှုမျိုးနဲ့

အလင်းကို ခိုးခိုးပြီး သွန်မိတယ်..

တစ်နေ့နေ့မှာ

မင်းရဲ့အလင်းမှုန်လေးတွေကို တွေ့လိမ့်မယ်ဆိုတဲ့

မဝံ့မရဲ အိပ်မက်လေးက..

ငါ့ကို ခဏ ခဏ အချက်ပေးနေလို့ပါကွယ်..။

                      ရတုသစ်

              ( 4 / 10 /2012 ...9:20 PM )