အခု ကျွန်တော်လေ..ကဗျာ့ရပ်၀န်းမှာ...

မနုဿတ္တဘာ၀ကို ဒုလ္လဘ အဖြစ်လက်သင့်ခံခြင်း/မခံခြင်း

ဆန့်ကျင်ခြင်းအပြိုင်ပြတ်ရွေ့ကြောတွေကြားလူးလာခေါက်တုံ့

ခေါင်းငုံ့ /ခေါင်းမော့ ရစ်သမ်တွေအချိုးကျနမှု ရွိ /မရွိ

ပကတိ/၀ိကတိသီအိုရီတွေထဲမှာ မရှာချင့်ရှာချင် လိုက်ရှာ

"သစ္စာ"ဆိုတာ ပန်းတစ်မျိုးရဲ့နာမည်လား.?.

သီချင်းတစ်ပုဒ်ရဲ့နာမည်လား ?...။

ကျွန်တော်ရှာဖွေဖူးတယ် ၊ သူများတွေလဲရှာဖွေခဲ့ကြ

"သန္တိသုခ "ဆိုတာ ဆရာမောင်ချောနွယ်ရဲ့ကဗျာတစ်ပုဒ် မဟုတ်လားဗျာ

သင်္ခါရတွေရဲ့ပေါင်းသင်ခါထုတ်ခြင်းခံလိုက်ရတဲ့ပင်ပေါက်ကလေး

နိရောဓစိုက်ခင်းက ဝေးသထက် ဝေးလာသလိုဖြစ်ရဲ့ ။

မြစ်တစ်စင်းအတွင်းနှစ်ကြိမ်ပြန်ဆင်းလို့မရတဲ့သဘောက

မြစ်ရေကျလို့လား? /မြစ်ရေလျှံလို့လား?

တရားတော့ တရားပဲ..သက္ကာယဒိဋ္ဌိဆိုတာ..

" ငါ "အစွဲပြုတ်အောင် "ကျွန်တော် " လို့ပြောင်းသုံးနှုန်းလိုက်တယ် ။

လမ်းဆုံးနဲ့ပန်းတိုင်တူပါသလား?...သဘောထားပြညွှန်ချက်

လူ့အသက်တစ်ချောင်းရဲ့ပန်းတိုင်ကို မရဏ လို့စပွန်ဆာပေးလို့ဖြစ် /မဖြစ်

နီးလာခဲ့ပြီ..တစ်ထစ်ပြီးတစ်ထစ် လှေကားမှာ

လျှောက်နေပါတယ်..ဆင်းနေတာလား?/တက်နေတာလား?

ခွဲခြား သိစိတ်မရှိလောက်အောင်မောဟက မှောင်တယ် မေမေ ..။

အခု ကျွန်တော်လေ..

ကဗျာရဲ့သင်္ခါရနဲ့နိယာမက်ိုချိတ်ဆက်ဖို့

ကွန်နက်ရှင်ကောင်းတဲ့ နှလုံးသားတစ်ခု လိုအပ်နေတယ်၊

ပရော်ဖက်ရှင်နယ် နဲ့ အုံနာ ညှိနှိုင်းဖို့

မဇ္ဈိမပဋိပဒါ နှလုံးသားလည်း လိုအပ်နေတယ်၊

အော်ရီဂျင်နယ် နဲ့ အင်ကို စမ်းသပ်ဖို့

အာလ်ထရာဆောင်းနှလုံးသားလည်း လိုအပ်နေတယ် ၊

ကျွန်တော်..လိုအပ်နေပါတယ် ။

ကျွန်တော့် လူ့သက်တမ်းကိုဂရုပြုမိ

ဆယ်စုနှစ်သုံးခုပြည့်ဖို့( ၄၈ )လလောက်ပဲလိုတော့တယ်

လောကဓံရဲ့စနောက်ခြင်းအဖြစ် ကျွန်တော့်ဦးခေါင်းမှာ မရဏတံခွန်တွေစိုက်ထူလာကြ

မဃဒေ၀မင်းကြီးရဲ့ အနုသယမျိုးကျွန်တော့်ဆီမှာ မကိန်း၀ပ်ဘူး မေမေ..

ဘလက်ခ်ကာလာတွေ စွန်းပေလိမ်းကျံနေမိပေါ့..

ထားပါတော့ မေမေရေ..အခု ကျွန်တော်လေ

အမှားတွေကို အသားပွန်းခံပြီးဖျက်ပေးတဲ့ခဲဖျက်လေးဖြစ်ချင်နေမိ

သူများတွေထက်ဖို့အပါးခံပွတ်တိုက်ပေးတဲ့ဓားသွေးကျောက်ဖြစ်ချင်နေမိ

အမှားတွေဖျက်ပြီးအဖြူရောင်လေးပါခြယ်ပေးတဲ့ကော်ရက်ရှင်ပင်(န်)လေး ဖြစ်ချင်နေမိ

စိတ်ကူးကြည့်နေတာပေါ့ မေမေ..

အဆင်မပြေခြင်းတွေပဲ ရေလဲသုံးနေရတဲ့ဘ၀မို့

စိတ်ကူးတွေဆေးရောင်မစုံသေး.

တဖြည်းဖြည်း ..တရွေ့ရွေ့ တမေ့တမော

ဘာပဲပြောပြောပေါ့ မေမေရယ်..ကျွန်တော်ချီတက်နေပါတယ် ။

လူတွေကိုလူတွေလိုပဲမြင်တတ်တဲ့အမြင်

ကြည်ပြာချိုလွင်တဲ့ကဗျာချစ်စိတ်

သာယာချိုမြတဲ့ ဂီတမြတ်နိုးစိတ်

မဖိတ်/မကျန်အောင်ပြောရရင်

ရင်ခွင်တစ်ခုလုံးအနုပညာတွေနဲ့ဖုံးထားချင်တဲ့စိတ်တွေ

ထိုးသိပ်မျှဝေ ထည့်ပေးလိုက်တဲ့ မေမေ့ဆီ..

ကျေးဇူးတင်စိတ်တွေ ဦးတည်နေတယ်..။

ပလီပလာများတဲ့လောကကို ချိုမြိန်တတ်ဖို့

ကဗျာ့ရပ်၀န်းမှာ အတတ်ဆန်းတွေရှိတယ်..

ကတိမတည်တဲ့လောကကို လှောင်ပြောင်တတ်ဖို့

ကဗျာ့ရပ်၀န်းမှာ သရော်စာ/ဟာသတွေရှိတယ်..

မသိမသာတွေများတဲ့လောကမှာလိုက်လျောညီထွေနေတတ်ဖို့

ကဗျာ့ရပ်၀န်းမှာ ညီမျှခြင်းမိုးတိုးမတ်တတ်တွေရှိတယ်..

ဒီလိုပါပဲ ..မေမေ..အခု ကျွန်တော်လေ..

ကဗျာ့ရပ်၀န်းမှာ..အသားကျဖို့

နှစ်ချို့မာနတွေ လက်ညှိုးထိုးအန်ချရင်း

ခြေသံလုံလုံနင်းပြီး ချီတက်နေဆဲပါ ..မေမေ..။

                                     ရတုသစ်

                        ( 9/11 /2012 ..2 :30 AM)

                      http://yatuthit.blogspot.com/

မကြာခင်ရောက်တော့မဲ့ကျွန်တော့်မွေးနေ့အကြိုအတွက်အမှတ်တရပါ မေမေ ။