မန္တလေးလား..ခရီးထွက်သွားတယ်

ပဒေသရာဇ်ခေတ်ကို လွမ်းလို့တော့ မဟုတ်ဘူး

အတွေးလူးလွန့်တိုင်း

ရွှေကျိုင်းတလူလူနဲ့သဲဖြူ ၊ရာဇမတ်တွေကို တ,သမိ

မန္တလေးကို ခုထိ တမ်းမက်နေတုန်း ။

မသိမသာ၀င်လုံးတဲ့လက််သီးပုန်းတွေအောက်

မန္တလေးဟာ ဒူးထောက်ခဲ့လေပြီလား

သွေးရဲသလား ပြသဖို့ထက်

အူမတောင့်ဖို့အရေးပေါ်အခြေအနေဖြစ်သွားခဲ့

သွေးအားလျော့နေတဲ့ မျိုးချစ်စိတ်ကို

ဘယ်လို ပြန်ကုစားကြမလဲ ။

နှလုံးသားတွေကို

အနာဂတ်ပြတင်းပေါက်တွေထိလှမ်းမြင်ခိုင်းထားပါ ။

မြန်မာလို ရိုးရိုးလေး မေးချင်တယ်

မြန်မာလို သွေးရဲရဲနဲ့ဖြေပေးနိုင်မလား

မန္တလေး ဘယ်ရောက်သွားလဲ..မေးလိုက်ပြီ ။

ဈေးချိုနားမှာလား..ဟင့်အင်း

မန္တလေးတောင်မှာလား ..မဟုတ်သေးဘူး

ကျုံးဘေးပတ်လည်လား..မတွေ့မိပါဘူး

ကန်တော်ကြီးမှာရော..မရှိတော့ဘူး

မြို့တွင်းမှာရောတွေ့သေးလား..တစ်ခါတစ်ရံပါပဲ

ဒါဆို မန္တလေးပျောက်ကြော်ငြာထည့်သင့်ပြီ ။

သူခိုးဆိုတိုင်းမျက်နှာဖုံးပါမယ်ချည်းမထင်နဲ့

အသွင်အပြင်ကိုပဲကြည့်မိလို့

နှစ်ခါမက နာခဲ့ပေါင်းများလှပေါ့ ။

ဖော့ဖော့တွေးရင် ရေးရေးပဲမြင်တာ သဘာ၀

ကျုပ်ကတော့

မန္တလေးကို မန္တလေးလိုပဲ ပြန်တွေ့ချင်တယ် ။

ခင်ဗျားတို့မြင်လိုက်လား

မန္တလေးကို တွေ့ရင်အကြောင်းကြားပေးပါ ။

အောင်ပင်လယ်မှာ လိုလို

ရန်ကင်းတောင်ဖက်မှာ လိုလို

မြရည်နန္ဒာမှာ လိုလို

မြို့ဟောင်း ဘူတာနားမွာ လိုလို

မန္တလေးကို တွေ့ရင် ပြောပေးပါ ။

နေညိုချိန်တိုင်း စက်ဘီးကိုယ်စီနင်းလို့

ထမင်းချိုင့် ပိန့်ပိန့်လေးတွေသယ်ဆောင်ရင်း

ရွှေခြေကျင်းမဲ့ခြေထောက်လေးတွေ

အိမ်ပြန်သွားကြမှာလား

အိမ်ပျံသွားကြတာလား ။

အဖြေစကားသဲ့သဲ့ကြားလိုက်မိ

မချိတင်ကဲ ဖြစ်ကျန်ခဲ့ရတာရင်နာလို့မဆုံးဘူး ။

နောက်ဆုံးရသတင်းလွှာကို

ကဗျာခေါင်းစဉ်မှာ တင်ထားလိုက်ရတယ် ။ ။

   . . . . ..ရတုသစ်

  .(4-2-2013 ..10:10Pm)