ကျွန်တော့်ဘက်မှာ မေမေရှိသေးသမျှ

မေမေ

ကျွန်တော်ကလောကကြီးကိုအရွဲ့တိုက်နေတာမဟုတ်ခဲ့

ရွဲ့နေတဲ့လောကကြီးကကျွန်တော့်ကိုခလုတ်တိုက်သွားတာ

ကျွန်တော်မာယာမများတတ်တာ အမေလည်း အသိ

ငြိ ငြိလာတဲ့မာယာတွေရှောင်တိမ်းရလွန်းလို့

အစွန်းထွက်အဖြစ်အလှည့်အပတ်တော့ကျွမ်းနေပြန်ပေါ့..။

ကျွန်တော့်ရဲ့လျှောက်လမ်းများဟာ

အမြဲတမ်းနေမှိန်နေတတ်ခဲ့

အရိပ်မဲ့ကျိန်စာတွေများလား...မေမေရယ် ။

သဝေထိုးလုပ်မရတဲ့အခါ ခခွေးလေးလုပ်ပစ်လိုက်ဖို့လွယ်ပေမဲ့

ခေါင်းမာလွန်းခဲ့တာက အမေ့သားပါ မေမေ ။

တကယ်ဆိုကျွန်တော်က ခေါင်းမာချင်တာ မဟုတ်

ခဏ ခဏလာပုတ်တဲ့လောကဓံလှိုင်းတွေကြောင့်

အရိုင်းဆန် ဆန်သွားတာလေ ။

အပေအတေကောင်လေးတစ်ယောက်အဖြစ်

သမုတ်ပစ်လိုက်တဲ့လောကထဲမှာ နေသားတကျ

လဲကျလိုက် ရုန်းထလိုက်နဲ့ တစ်၀ဲ၀ဲလည်ပတ်ရင်း

မိုက်မလင်းတဲ့နယ်ပယ်မှာပျော်မွေ့မိ

အခုထိ အလင်းမေ့နေမိဆဲပေါ့ မေမေရယ်...။

ငတ်မပြေတဲ့ရေကို သောက်လိုက်ချိုးလိုက်

အရိုးခိုက်အောင်စိမ့်ပေမယ့်

နှုလုံးသားကခေါင်းငြိမ့်နေတော့ အခက်သားပဲလေ

ဒီ စိမ်ရေ ကိုကျွန်တော်ဘယ်လိုဖြတ်ရပါ့

လမ်ပြပါဦးလား မေမေရေ...။

လေပြေပြာတစ်ချက်သိမ့်တိုင်း

တလိမ့်လိမ့်လှိုက်ခုန်

ညရဲ့မာယာဘုံမှာ တိုး၀င်ရင်း

လမင်းကိုတေးဆိုပြခဲ့

ကြယ်ပွင့်လေးတွေနဲ့အတူကြွေခဲ့တယ် ။

ပြာလဲ့လဲ့ကောင်းကင်မှာပိုက်ကွန်ဖြန့်ပြီး

သက်တန့်ကိုကြိုးညှိလို့

ကီး မမိတဲ့ကဗျာတစ်ပုဒ်ကို ရွတ်

ကော့ဒ် အလွတ်တီးခတ်တတ်ခဲ့ပြီ မေမေ..။

ကျွန်တော်နဲ့ညီမျှခြင်းထိုးမရတာက ပတ်၀န်းကျင်လေ

ဆန့်ကျင်တာ မဟုတ်ခဲ့ရင်တောင်

မျက်တောင်မွှေးတစ်ဆုံးစာအမြင်တွေက်ိုလိုက်ပြီးပေါင်းသင်နေရရင်

လျှာပြင်မှာ ကန္တာရ ဆူးပင်တွေခြေချင်းလိမ်နေမလားပဲ

မတရားတွေက တရားဖြစ်လာခဲ့ပေါ့ မေမေ ရယ်..။

အခုဆို

ကျွန်တော် လူတွေနဲ့ ဝေးဝေးသွားခဲ့

နားမကြားတဲ့ကြယ်ပွင့်လေးတွေရှေ့မှာ

ကဗျာရွတ်ပြရတာ ခံတွင်းတွေ့လာတယ်

ရှက်သွေးဖြာအြ့ပုံးနဲ့ကမ်းလင့်တဲ့ပန်းပွင့်လေးတွေက်ို

တေးဆိုပြရင်း ခိုးနမ်းတတ်လာခဲ့

ဒြပ်မဲ့တဲ့ တစ်စုံတစ်ရာတွေကိုပဲမျှော်လင့်ကြည့်

အရှိုက်ထိအောင်ရူးခဲ့မိပေါ့

မထူးဇာတ်ခင်းရတဲ့အဖြစ်ကထိရှလွန်း

စိတ်ထဲမှာပဲ ပွန်းပဲ့လို့နေခဲ့တယ် မေမေ...။

တချို့ရောင်းရင်းတွေက ကျွန်တော့်ကို

ထေ့သလို ငေါ့သလို စကားနာနဲ့

ကဗျာဆရာလို့ ကင်ပွန်းတပ်

အရူးနံပါတ်ချိတ်ပေးထားကြပေါ့

ချော့မော့သူမရှိဘဲ အငိုတိတ်တတ်ဖို့

သတ္တိတွေပေးပါဦး မေမေရယ် ။

ကျွန်တော့်ဘက်မှာ မေမေ ရှိသေးသမျှ

ဒုက္ခနဲ့သုခကြားက အလွှာလေးမှာ

နှလုံးသွေးနဲ့ရေးထားတဲ့အက္ခရာတွေကို

ခပ်ပြေပြေမှင်ရောင်လိုက်ထပ်ရင်း

အတင်းအဖျင်းပြောတတ်သူတွေကြားမှာ

ရပြီးသားကိုယ့်ကဗျာ ကိုယ်ပြန်ကျက်လို့

ဦးတည်ချက်တစ်ခုဆီ တစ်လှမ်းချင်း တက်

ညနက်တိုင်း ခရီးဆက်နေဆဲပါပဲ မေမေ ရယ် ။

                                   ရတုသစ်

                    (1-10-2012 / 2-50 PM)