ထပြန်သွားတဲ့ အတိတ်မှာ အသည်းကိုင်းလေး ဆတ်ဆတ်ခါ

တယုတယမွေးမြူထားရတဲ့အလွမ်းမို့

မှင်ရည်ခမ်းတဲ့အထိဆက်ရေးနေမိတယ်

အလှည့်ကျရောက်လာမယ့် အချိန်ပြညွှန်းကိန်းတွေကြား

ပဝါပါးနောက်ကွယ်က ပုံရိပ်လေးကို လွမ်းတယ် ။

စိတ်ကူးထဲမှာတောင်တကယ်မဝေးရဲခဲ့သူပါ

လောကမျက်လှည့်တစ်ကွက်မှာ

ကျွန်တော့်ကိုထားရက်ခဲ့ပေါ့

အပြုံးမဲ့အောင်သင်ပေးသွားခဲ့တာလား ..မမဝေ

ဖြေဆေးရှိနေတာတောင်

ဒဏ်ရာကယောင်တယ်

အမှောင်တွေတလွင့်လွင့်ကြဲတဲ့ကတ္တီပါညဆို

လရောင်လွမ်းချင်းနဲ့ ငိုဆဲပေါ့ ။

အချော့ခံချင်တာ မဟုတ္ဘူး မမဝေ

မျက်ရည်မှာ အလွမ်းတွေ

တစိမ့်စိမ့်ကြွေတာပါ

လေပြေတိုးသံကြားရင် မခံနိုင်ဘူး

လွမ်းဖူးတဲ့ရင်က နင့်နင့်နေလို့

ခွဲခွာရန် အဆင်သင့်မဖြစ်သေး

ရင်ခွင်ကို

ဘယ်သံစဉ် ၊ ဘယ်ရာသီတွေနဲ့ ပြင်ဆင်ရမလဲ

နည်းလမ်းလေး ကြွေချပေးခဲ့ပါ။

                  ရတုသစ်