(၃၁)ဘုံထဲပါ၀င်ပြီးသုံးမရတဲ့အသံကိုကလန်ကဆန်လုပ်မရတဲ့အတိုင်းခေတ္တဆိုင်းငံ့ထားလိုက်တယ်
နေမထိအောင်လှောင်ပိတ်ထားရတော့အသံတွေဟာဆွံ့အ၊စိုထိုင်း၊အေးစက်
ဘယ်လိုကျဉ်စက်နဲ့တို့တို့ မခို့တရို့ဟာရိုးကျိုးပြီးသား ဆပ်ကပ်ကျား
ကြားလား..ကြားလား..ပြောနေတာကြားရဲ့လား..ဒါဟာသီချင်းမဟုတ်ဘူး သတင်း
ပန်းသတင်းလား၊လူသတင်းလား ၊အပူတပြင်းလိုက်ရှာမနေနဲ့ကွန်နက်ရှင်ကောင်းအောင်အရင်လုပ်
ခိုးထုပ်ခိုးထည်နဲ့အတူခိုးသားများအားလက်ရဖမ်းဆီးပြီး..လာဘ်ရသွားတာ ဟိုလူကြီးတွေ
အမေပြောတော့အမောပြေမယ်ထင်တာ..ခု..ဖတ်ဖတ်မော..ဖတ်..ဖတ် ပြီးတိုင်းမော
အကုန်သိအောင်ပြောရတော့ဒီကောင်ပဲလူစွာလိုလို၊ငပွကြီးလိုလို၊အလိုမတူသူတွေပြောကြရဲ့
ခနဲ့တာမဟုတ်ပါဘူး၊ရွဲ့တာမဟုတ်ပါဘူး၊မတည့်လို့မတော်လို့အော်နေရတာ ဆရာရေ
မျှော်သာမျှော်သည်မယုံကြည်ဖြစ်နေရတဲ့အထဲပွင့်ခက်ဝါနီေ၀ဒနာတွေက ရင်မှာအစီအရီ
ရီနေတာမဟုတ်ပါဘူး၊နေရီရီ၀တၳုထဲကလို၊ရီရီချိုတို့အဖေလို၊မရယ်နိုင်တဲ့အကြောင်းပြနေတာ
ပါးစပ်ဟထားတော့ရယ်တယ်ထင်ကြတာဆန်းသလားကိုယ့်လူ၊သွားလေးဖြူနေရင်ပြီးတာပဲ
ဟုတ်ပဲနဲ့၊ဟုတ်လည်းဟုတ်ပဲနဲ့၊စိတ်ပုပ်ပြီးသွားဖြူနေရင်ဘယ့်နှယ်ရှိစ ၊ ဟုတ္သားဟ
စကားများများပြောရမယ့်သူမို့သွားကျန်းမာရေးဂရုစိုက်တာဖြစ်မှာပါ ရောင်းရင်းရာ
အသည်းအဆီမဖုံးအောင်အသီးအရွက်စား၊ ကျားလိုမကျင့်နဲ့၊လူစစ်စစ်လိုကျင့်
အဟင့်..ငိုချင်လာပြီ ၊လူလိုပဲကျင့်လို့မရဘူးလား ၊လူလို..လူလိုလို
အလိုတူမှအလိုပါမယ့်အလိုတူအလိုပါတွေအလိုလိုပေါလားပါလား...အလို
အာမေဍိတ်ဟာခါးချိတ်မရလို့ဍရင်ကောက်ကြီးအတိုင်းရင်ဘတ်မှာကောက်ချိတ်ထားလိုက်ရ
ပဋိစ္စသမုပ္ပါဒ်တွေလည်ကုန်ပြီ ၊လှည့်ကုန်ပြီ ၊မူလ/မူလီတွေ တဏှာစေရာမနေသာ
ဖွေရှာလိုက်၊တွေ့ရှိလိုက်၊ပစ်ချလိုက်၊ကောက်ယူလိုက်၊အမိုက်ဟာမှောင်နေတာပဲဗျာ
များသွားလို့ပဲဖြစ်ဖြစ်၊နည်းသွားလို့ပဲဖြစ်ဖြစ်၊ဖျစ်ဖျစ်မြည်အောင်ညှစ်မှတော့အစ်ပြီပေါ့
လည်တိုင်ကြော့တွေဟာပျော့ပျော့လာ၊ အသက်ရှူသံဟာမြန်မြန်လာ ၊၀င်သက်ဟာထိတ်ပျာလာ
သွားပါပြီ၊အနေအထိုင်တတ်မိမှအုံ့ပုန်းလိုလို၊ အမဲရိုးအားမနာတဲ့ ဟင်းအိုးလိုလို
(၁၂)မျိုးပေါင်းမှချိုမယ့်ဟင်းချိုမသောက်နဲ့တော့၊ပုတ်သင်ညိုလည်းချို၊တောက်တဲ့လည်းချိုတယ်
ယုန်ချိုတွေ၊လိပ်မွေးတွေဈေးကောင်းတာမဆန်းဘူး၊ပုဇွန်သွေးက၀ယ်လိုအားထိုးတက်နေရဲ့
"ဟုတ်ကဲ့" ပြီးရင်သဘောတူကြောင်းပြသဖို့လေးကြောင်းမျဉ်းစာအုပ်လေးနဲ့အရေးကျင့်ထားမှ
သည်၊တို့သည်..မွစျပီး ၌၊တို့၌အဆုံး၀ိဘတ်ခုနစ်လုံးကို သီကုံးပန်းသွင်နေ့တိုင်းဆင်လော့
ကျသွားပေါ့ ၊အောင်စာရင်းမထွက်တဲ့စာမေးပွဲကြီးဖြေမိတာ အကျနာတယ်ဆရာရယ်
အရယ်မျက်လုံးနှလုံးမသက်သာဟာ အငိုမျက်လုံးအပြုံးမျက်နှာထက်မျက်ရည်ပေါမှန်းသိလိုက်မိ
မိမိ..မမိမိ ဖမ်းယူလိုက်တဲ့လိုင်းကြောင်ကြီးထဲ ဒီငရဲအော်သံပဲ ပွက်လောရိုက်လို့
အမိုက်တွေလင်းပါစေ ၊အတိုက်တွေကင်းပါစေ၊အခိုက်တွေကွင်းပါစေ ၊အမှိုက်တွေရှင်းပါစေ
ချို့တဲ့နေမယ့်စိတ်ကျန်းမာရေးအရပြောချင်လာတဲ့စကားတွေလည်ချောင်းရိုးအတိုင်းဆစ်ပိုင်းမြှုပ်နှံထားလိုက်တယ် ။
ရတုသစ်
