ဗီလိန် မှတ်စု ( ၁ )
အစိမ်းကြွေ
ကြွေနေတဲ့ပန်းတစ်ပွင့်မို့
ရနံ့သင်းချင်စိတ်လည်း မရွိခဲ့ဘူး ။
ကျွန်တော်တက်နင်းမိတဲ့ ဆူးဟာ
ပြုံးတတ်တယ်
ကျွန်တော် လိမ့်နေအောင်ရှုံးခဲ့ပေါ့ ။
အမုန်းသင်္ချာဆိုရင်
ခုကတည်းက မသင်တော့ဘူး ။
ကျွန်တော်က
ရူးသွပ်နေတဲ့ဗီလိန်တစ်ကောင်ဖြစ်တယ် ။
ဗီလိန်မှတ်စု ( ၂ )
အိုးစွပ်ခွက်စွပ်မစားပါဘူး
ချစ်ခြင်းတရားရယ်
ဘာ့ကြောင့်များ...
ကျွန်တော့်ကိုမှ အမေ့ခံလူသားတစ်ယောက်လို
အမုန်းရင့်အိုတွေနဲ့ စိတ်ကျဉ်းချခဲ့
ကိုယ့်ကိုယ်ကိုပြန်-မ-နေရတော့
အထူအထနှေးကွေးတာဆန်းသလား ့
အချစ်ဒဿနတွေကြားရင်ရယ်ချင်တယ်
ဒီလမ်းတစ်ခုထဲ
ကျွန်တော်နင်းခဲ့တာလှိုင်းထနေတဲ့အပြာ
နောက်တစ်ခါထပ်ကွဲဖို့
အသည်းဟာဖန်ပုလင်းမဟုတ်ခဲ့
အရှုပ်တွေထဲ
ရှင်းအောင်မနေတတ်သေးတဲ့အကျင့်ဆိုး
ကျွန်တော့်လည်ပင်းပြန်စွပ်မယ့်ကြိုးမှန်းသိတယ်
ဖြည်ကြည့်ဖို့မကြိုးစားချင်တဲ့စိတ်
ကျွန်တော့်ဘဝကိုအဆိပ်ခပ်မလား
ကျွန်တော်က
ဗရုတ်ကျတဲ့ဗီလိန်တစ်ကောင်ဖြစ်တယ်။
ဗီလိန်မှတ်စု ( ၃ )
စိတ်နဲ့ကိုယ်က
ညီမျှခြင်းပြမရလောက်တဲ့အထိ
မျဉ်းပြိုင်အစွန်းတွေမှာငြိနေခဲ့
အလှည့်ကျမလားလို့
ပန်းရထားကိုမျှော်မိတယ်။
အိပ်မက်တွေ
မီးပြင်းထိုးထားရတဲ့ရင်ဘတ်ထဲ
ရေခဲရိုက်ခံလိုက်ရတဲ့နားလည်မှုဟာ
ကြေကွဲစွတ်စိုခဲ့ရ
ဘယ်သူ့ကြောင့်မှမဟုတ်ပါဘူး
ကျွန်တော်ကိုယ်တိုင်က
အပူအအေးညှိမရတဲ့ရာသီဥတု ။
အခုထိ
အဖြေမသိပဲဖြေနေတဲ့မေးခွန်းဟာ
ဘယ်လိုမှမမှားဘူးဆိုနိုင်မလား
ကျွန်တော်က
ပုစၧာမှားဖြေမိတဲ့ဗီလိန်တစ်ကောင်ဖြစ်တယ် ။
ဗီလိန်မှတ်စု ( ၄ )
"ငါ့သားစာမေးပွဲကျတယ်ဆို"
အေမ ဒီလိုမေးတယ်
ကျတာမဟုတ်သေးပါဘူး အေမ
အခြေအနေအရ မအောင်သေးတာပါ
အေမ့ခမ်ာ
နှုတ်ဆိတ် ငြိမ်သက်သွားရ
တကယ်လည်းကျွန်တော်မကျပါဘူး အေမ
စာအုပ်ကြည့်မေးတဲ့မေးခွန်းတွေ
အလွတ်ပြန်ဖြေရတာတော့စိတ်လေတယ်။
"စာမှမကျက်ပဲ သားရယ်"တဲ့
ကျွန်တော့်စရိုက်ကိုက
စာကျက်ရတာကိုဆန့်ကျင်တာ
အမေမသိတာလည်းမဟုတ်
အမေ့အတွက်
ကျွန်တော်စုတ်ကောင်လာဘ်ကောင်မဖြစ်ခဲ့
ကဗျာတွေနဲ့နေရတာပျော်တယ် အေမ
ကျွန်တော်က
အချိုးမပြေတဲ့ ဗီလိန်တစ်ကောင်ဖြစ်တယ် ။
ဗီလိန်မှတ်စု ( ၅ )
သေနတ်သံ ဗုံးသံတွေထက်
ချိုးဖြူငှက်သံကိုချစ်မိသူ
ကျွန်တော့်နားတွေဟာ
နားပါးဝစွာအသံအဆင့်အတန်းခွဲခြားလို့
တချို့အသံတွေဟာ
ပဉ္စလက်မကတဲ့မှော်ပညာတွေပါတဲ့အကြောင်း
တစေ့တစောင်းစိတ်ဖြာရ
မောင်းမချဘဲထွက်တဲ့ဓားတွေဟာအသံမမြည်ဘူး
မီးကူးစရာမလိုဘဲထွက်တဲ့ကျည်ဆံဟာ
စူးဝင်မှုအားကောင်းလွန်းလှချည့်
ရှေ့ကြည့်မှန်ဖြုတ်ထားရ
နောက်ကြည့်မှန်တပ်မထားရ့
ဘေးကြည့်မှန်ပါးပါးလေးနဲ့တစောင်းအနေအထား
ကျွန်တော်ဟာ
ဂဏန်းသွား သွားနေတဲ့ဗီလိန်တစ်ကောင်ဖြစ်တယ် ။
ဗီလိန် မှတ်စု ( ၆ )
ကြာတော့
တိမ်တွေငေးကြည့်ရတာ
ပျင်းလာတယ် ။
လေနှင်ရာလွင့်ဖို့ထက်
သီးခြားသတ်မှတ်ချက် ဘာရှိသေးလဲ
စိတ်ထဲလေးလံနေသမျှ
အတိုးချ ရွာပစ်လိုက်ရရင်ကောင်းမယ်။
ဆက်ကြောင်းလွဲနေတဲ့ သိမှုတွေဆီ
ဘယ်လို ဦးတည်ရမှန်းမသိသေးဘူး
စိတ်ကူးတိုင်းသာခြေရာထင်မယ်ဆို
ဘယ်သူ့အလိုတော်အတိုင်းတွေမှ
စောင်းငဲ့ကြည့်စရာမလိုဘူး။
အရူး အရူးချင်း တမူးသာချင်ကြသူတွေထဲ
ကျွန်တော့်ကို မဲမပေးကြပါနဲ့
ကျွန်တော်က
အိပ်ရေးဝဝအိပ်ချင်တဲ့ဗီလိန်တစ်ကောင်ဖြစ်တယ် ။ ။
ဗီလိန်မှတ်စု ( ၇ )
စိတ်ကူးတွေသော့ပိတ်ထားလို့ရရင်
ဘယ်လောက်များအဆင်ပြေလိမ့်မလဲ
တလိမ့်လိမ့်
လှိမ့်ဝင်လာတဲ့အတွေးမှာ
အိပ်ဆေးပြယ်မယ့်ဓာတ်တွေပါလာတယ် ။
အမှတ်တရတွေ
အမှတ်တမဲ့ပြန်မလုပ်နိုင်တဲ့အခါ
ကျွန်တော်သာနွမ်းလျကျန်ခဲ့ရ
ဒုက္ခရဲ့ဆေးရောင်စုံအခင်းအကျင််းထဲ
ကျွန်တော်ပဲ ဇာတ်လိုက်
ကျွန်တော်ပဲ ဗီလိန် ။
လောကစိန်ခေါ်ပွဲကြိုးဝိုင်းမှာ
သရဖူကာကွယ်ဖို့ထက်
လွင့်ထွက်မသွားဖို့ပဲဂရုစိုက်နေရ
အဇ္ဈတ္တချင်း စီးချင်းထိုးတဲ့အချိန်
ကျွန်တော်က
အလင်းမှိန်နေသေးတဲ့ ဗီလိန်တစ်ကောင်ဖြစ်တယ် ။ ။
ဗီလိန် မှတ်စု ( ၈ )
နေ့တစ်ပိုင်းညတစ်ပိုင်းကမ်ဘာထဲ
နာရီတွေရဲ့ခိုးဝှက်ခြင်းမှာ
အိပ်မက်စင်းလုံးချောတွေပျောက်ဆုံးခဲ့ရ
အမေ့ရဲ့သုခအိုးကွဲလေးဟာ
အလင်းကြောက်နာစွဲနေပြီထင်ရဲ့ ။
မကြည်မလင်ဖြစ်နေဆဲဦးနှောက်နဲ့
ခဏ ခဏ ပေါက်ကွဲတတ်တဲ့အခါ
ကျွန်တော်သာ
လူရိုင်းဆန်လာတယ်။
သင်တိုင်းမတတ်တဲ့လူ့ကျင့်ဝတ်တွေဆို
အလိုလို
ရှောင်လွှဲလာမိတာအပြစ်သင့်နိုင်မလား
ကိုယ့်နှလုံးသားကိုယ်
တရားပြန်ချနေရတဲ့အမောအနွမ်းများနဲ့
ပြေးလမ်းတစ်လျှောက်မြူဖုံးနေရဆဲ
ကျွန်တော်က
အလင်းရဲ့စွန့်ပစ်ခံဗီလိန်တစ်ကောင်ဖြစ်တယ် ။ ။
ဗီလိန်မှတ်စု ( ၉ )
မြေလို၊ရေလိုကျင့်ရမလား
လေလို၊မီးလိုကျင့်ရမလား
ဓာတ်လေးပါးယားယံလာတဲ့အခါ
ဘယ်ကျင့်စဉ််နဲ့မှအဆင်မပြေဘူး ။
ညနက်ထဲ
အရိုးစွဲသီဆိုမိတဲ့သီချင်း
သောကြာကြယ်ရေသောက်ဆင်းချိန်ထိ
မပြီးဆုံးသေး
အတိတ်မေ့ဆေးရှိရင်ကောင်းမယ်။
ဆေးသောက်လို့မပျောက်တော့တဲ့
ရောဂါ
ဝဋ်ကြွေးတစ်ခုလို့ဖြေသိမ့်နေရ
ညဟာ
နေရောင်ခြည်ရဲ့မာတိကာလား ။
တရားသားကွာကျလာမှ
အနာဖေးတက်ဒဏ်ရာကိုဖွင့်ကြည့်မိ
ကျွန်တော်က
ကျင့်စဉ်မှားတက်မိတဲ့ဗီလိန်တစ်ကောင်ဖြစ်တယ် ။ ။
ဗီလိန် မှတ်စု ( ၁၀ )
၁၁လပိုင်း၊၁၁ရက်၊ဗြိစ္ဆာရာသီခွင်အကျ
လောကကြီးထဲ
ဗီလိန်တစ်ကောင်ဝင်ရောက်ခဲ့
ဘယ်လောက်မှမတောက်ပြောင်ပါဘူး
သူလိုငါလိုဇာတိအစမှာ ။
မဟာဘုတ်တိုင်ထူကြည့်လည်း
အထွန်းဖွားဟောချက်ပဲ ထွက်တယ်
မဟာဘုတ်မှားတာလား
ပေဖူးဇာတာ လွဲတာလား မသိ
ခုထိ...
ကိုယ့်ခြေရာကိုယ်တွေ့ဖို့
အလဲလဲအကွဲကွဲညှိထွန်းနေရတုန်း။
ကံကြမ္မာ
ရုန်းထလာမလားမျှော်လင့်ချက်နဲ့
ငယ်အိပ်မက်တွေပြန်တူးဖော်မိ
ဘယ်လိုမှ
အစပ်အဟပ်မတည့်တဲ့ပွင့်ဦးတွေ
တဖြုတ်ဖြုတ်ကြွေကျဆင်းသက်လာရဲ့
နောက်တစ်မနက်နေပွင့်တာမြင်ဖို့
ဆုတောင်းအချို့ကိုပြောင်းလဲရမှာလား ။
ကျွန်တော်က
ယတြာချေဖို့မေ့တတ်တဲ့ဗီလိန်တစ်ကောင်ဖြစ်တယ်။ ။
ရတုသစ်
