ရပ်တန့်နေသော အိပ်မက်မြစ်များ

တစ်နှစ်ပြီး တစ်နှစ်
ဒုက္ခ သမုဒယတွေထဲနစ်ခဲ့တယ် ။

တရစ်ရစ်ခွေရင်းစီးဆင်းခဲ့ရပေ့ါ
မောဟရဲ့ညှို့ကြိုးကိုမဖြတ်နိုင်မချင်းလေ ။

လေပြေညင်းအသွေးမှာ ချွေးသိပ်ဖူးရဲ့
မုန်တိုင်းအလူးမှာ ငိုကြွေးခဲ့ဖူးတယ်။

ရူးသွပ်ခြင်းကိုယ်စီပြေးလမ်းတစ်လျှောက်
အတောင်ပေါက်လာတဲ့အတ္တက
ချိုးဖဲ့ ခက်လွန်းလှချည်ရဲ့ ။

မပီပြင်ဝိုးတ၀ါး နှင်းကွဲစမှာ
အိပ်မက်ကပြင်းရှ အေးခဲတယ်။

ပူနွေးဆဲ မျှော်လင့်ချက်တနင့်တပိုးနဲ့
တက်ကျိုးလှေ တစ်စင်းရဲ့ပန်းဝင်ခရီး
နီးနိုင်ပါသလား /နီးနိုင်ပါ့မလား  ။

အစီအနင်းများတဲ့လှိုင်းလုံးကြားမှာ
သွားလိုရာ စီးကြောင်းတစ်လျှောက်
လက်မြှောက်ပြီးနေလိုက်ရတော့မလို ဖြစ်ရဲ့ ။

ပိုနေ/လိုနေတဲ့ အနားမညီ ထောင့်ချိုးများထဲ
ဖြစ်သလိုတိုးလျှိုး စိမ့်ဝင်ရင်း
လင်းရောင်နီ သွန်းဆစ်မှုအတွက်
အိပ်မက်ဟာ ရေခန်းမြစ်တစ်စင်းဖြစ်သွားရ
ဘ၀က သံပတ်ကုန်နာရီအို တစ်လုံးလို
အလိုလို ရပ်တန့်အေးခဲသွားခဲ့တယ်။

                      ရတုသစ်
                   ( 1 /1 /2013 )
ဲ

နားခိုရာအရိပ်စစ်

လောကလှုိုင်းဒဏ် ၊အဖန်ဖန်ကို

တစ်ရံမလပ်၊ကူးသန်းဖြတ်ရင်း
ဆုံးသတ်နားရာ ၊အေးကမ္ဘာအား
ဖွေရှာကြည့်ရင်း ၊တို့စီးဆင်းခဲ့
ရင်ချင်းအပ်ယူ ၊ချစ်ကြင်သူသာ
အေးလူနားရာ ၊တို့မှတ်လာမိ
လွန်မှားဘိ၏ …
တွေးကြည့်မှပင် ၊အစစ်မြင်သည်
မိခင်သည်သာ…နားခိုရာ ။
ရယူမှုတွက် ၊တို့စုံမက်သော
နှစ်သက်ကြည်ဖြူ ၊တို့ချစ်သူသည်
အေးလူနားရာ ၊ရင်ခွင်လွှာကို
ဖြန့်ကာရိပ်မိုး ၊မရနိုးပေ
တန်းဖိုးတိုင်းတာ ၊မနှိုင်းသာသော
မာတာရင်လွှာ ၊ရိပ်ဆာယာသည်
ဘယ်ခါရပ်ရပ် ၊ပူ မဟပ်ပဲ
မပြတ်စဉ်သာ ၊အေးမြရာမို့
ခါခါပူပြင်း ၊စိတ်မောခြင်းတွေ..
ရင်တွင်းပြည့်သိပ် ၊သောကစိတ်တွေ..
ကြပ်သိပ်ပြင်းထန်၊ အပူဒဏ်တွေ..
မခံသာသော ၊ဘ၀ဇောတွေ..
လှိုက်မောလန့်ထိတ် ၊ကြောက်ရွံ့စိတ်တွေ..
တိုးတိတ်ငိုရ ၊ထိုခဏတွေ..
ကင်းပ ကွာဝေး ၊ဖြေရှင်းပေးလို့
အပြေးဖွေရှာ ၊ရိပ်တကာထက်
မာတာအေးရိပ် ၊ရင်ခွင်ဆိပ်သာ
အရိပ်စစ်စစ်၊ အမှန်ဖြစ်သည်
မပစ်ပယ်သာ..နားခိုရာ ။
အရိပ်အမှန် ၊အဖိုးတန်သည်
လည်ပြန်ခါခါ ..နားခိုရာ ။

                     ရတုသစ်

               

ငြိမ်းချမ်းရေး

သဘာဝအလှတရားဟာ သဘာဝကျကျ
အိပ်မောကျခွင့်ရပါရဲ့လား ကမ္ဘာမြေ ။

ကောဠာဟလ /တွက်ခြေ ပေါင်းစုံမှာ
ရင်တုန်ပန်းတုန် လုံခြုံမှုနဲ့
ပဲ့ထွက်နေတဲ့ဘ၀  အထွေထွေ    ။

တလှိုက်လှိုက် ရှိုက်သံတွေအစား
တရားမျှတခြင်းဟာ နေရာယူပေးပါ   ။

အခါခါပြန်တောင်းနေရတဲ့ ကိုယ့်အရိပ်မှာ
စာနာတရားတို့ မှေးမှိတ်နားနေပါ   ။

ဧရိယာပြင်ပရောက်ရောက်သွားတဲ့
မိသားစု ကမ်းလက်တွေထဲ
ခိုင်မြဲမှုကို ချိတ်ဆွဲပေးပါ   ။

ညီအစ်ကို မသိတသိ အမှောင်မှာ
သွေးဆာနေတဲ့ ပူလောင်လက်တွေအစား
ရင်ချင်းဆက်ပွေ့ဖက်မယ့်
ပန်းပျိုးလက်တစ်စုံစီ မွေးဖွားပေးပါ   ။

အခြေအနေ အရ
ကိုဓ ဥပဒေ ကိုရိတ်သိမ်းပစ်လိုက်မှ
အဟိံသက နဲ့ငြှိမ်းမှ ငြိမ်းမယ်    ။

ကမ္ဘာနဲ့လူသားဆီ အအေးဓာတ်ကိန်းဖို့
မိခင်တို့ရဲ့မဟာဝိညာဉ် ငြိမ်းချမ်းပါစေ   ။

နေ့သစ်တွေ ဂီတသံချိုဖို့
ငြိမ်းချမ်းရေး ငှက်တို့တေးသီဆိုပါစေ ။

မေမေတို့ရဲ့ မေတ္တာဓာတ် အစွမ်းက
ကမ္ဘာ့ရပ်ဝှမ်း အသီးသီးဆီ ကျရောက်
လူ လူချင်းမြင်တဲ့ အသိဉာဏ် ပေါက်ပါစေ  ။

အေးမြပါ   ၀င်းပ ပါ  ချိုသာပါ
တေးဆိုပါ  မွှေးချိုပါ  ကမ္ဘာမြေ   ။

                               ရတုသစ်

ငေးချက်များ ( ၁ )

ဆေးဆိုးပန်းရိုက်နဲ့
ဓာတ်ပုံပြုပြင်ရေးဆိုင်.။

ဗြူးတီးစလွန်းများမှာ
လှချင်လွန်းသူတွေ မြိုင်ဆိုင်လို့ ။

သူတို့...
ရုပ်တွေပဲ လှလာကြတယ်..။

                ရတုသစ်

( ဆရာသစ္စာနီရဲ့ ရှုခင်းများ(၂)ကိုဖတ်မိပြီး ငေးလိုက်တဲ့အခါ.......)

စိမ်းဆတ်ဆတ် ကွဲ

ရတက်ဖြာဆွေးပူမီး

ရင်စည်း၍ မခံသာ ၊

ဆွေးစရာ

ဝေးကမ္ဘာသူလေပြေးပြီပေါ့

နွေးစရာရင်ခွင်ဝေးပြီထင့်

ရင်နင့်နင့်နာ ။

ထားသစ္စာ

ဓါးဖြစ်ကာ ရင်ကိုခွဲ ၊

မောင့်အသဲချည်တိုင်ပြေမှ

ပျိုမေမှာ တစ်တိုင်ယိမ်းမယ်လား

သူစိမ်းဆန်သူရှောင်ဖယ်လို့

မျက်ကွယ်မှာမေတ္တာသိမ်းတယ်

စိမ်းဆတ်ဆတ် ကွဲ ။

               ရတုသစ်

လွမ်းနေဆဲ...

                         မျက်ရည်ဝဲမှုန်ဝါးခဲ့ညများမှာ ငါလွမ်းနေလည်းမင်းမှမသိနိုင်တော့တာ
                    အချစ်တွေအတွက်ခံစားခဲ့နေ့များစွာ..ပြန်ရချင်လည်း ဘယ်သူမှမပေးနုိင်တော့
                         ပူလောင်မွန်းကြပ်တဲ့..သာယာခြင်းကင်းမဲ့ အိပ်မက်ဆိုးတစ်ခုလိုပဲ...။
                 အတိတ်ဆိုတာ စိတ်ကူးဖြစ်ပေမယ့် ပြန်တွေးလိုက်တိုင်းမနေ့တစ်နေ့ကလိုပဲ
                         မင်းမမြင်ခဲ့ကြေကွဲငါ့ရင်ဟာ..အသက်ရှုတိုင်း နှလုံးသွေးများဆူဆဲ....
                         ပြန်လည်အစားထိုးလို့ ဘယ်လိုနည်းနဲ့မှ..ငါမေ့ဖျောက်လို့ရမှာလဲ...
                    ( မင်းချန်ခဲ့တဲ့ စာရွက်ဟောင်းများနွမ်းခြောက်ကာ...မင်းစွန့်သွားတော့
                     တွယ်ရာမဲ့တဲ့ စိတ်အစဉ်ဟာ..တမ်းတရင်းနဲ့ ငါဒီအခန်းကျဉ်းလေးထဲမှာ
                      ..ဟိုးတစ်ချိန်တုန်းက အတူပျော်ဖူးခဲ့နေ့ရက်များ....ဒီအချိန်ရင်ခုန်လာ
                      ဟိုးတုန်းက အနမ်းတွေ ခဏလောက်တော့ရချင်လို့..နားလည်ပေးပါ.....)

လမင်းကိုနမ်းရှိုက်ပွေ့ဖက်ခြင်း

                                               လ
                                            အေးမြ
                                          မှုန်ပျပျ ။
                                       နှင်းမြူကြားမှ
                                    ချောင်းကြည့်ရစဉ်
                                       အလှတစ်မျိုး
                                       ထင်မိရိုးသာ
                                 နှင်းခိုးသောက်လျှက်
                                 မတောက်လက်လည်း
                                      မှုန်ညက်နံ့သာ
                                     လိမ်းကျံလာသို့
                                    စိတ်မှာတွေးထင်
                                   နမ်းကြည့်ချင်သည်
                            ရွှေရင်ခုန်ထ်ိတ်...တဒိတ်ဒိတ် ။

                                            ည
                                        တွေးလှ
                                        ထုံကူးရ ။
                                 ဆောင်းဟေမာန်ည
                                     ချမ်းမြမြ၀ယ်
                                    ထွေးရမည့်သူ
                                       မရှိမူ ၍
                                  စိတ်ဆူဝေကာ
                                 ရင်ခုန်လာသော်
                                မှုန်စွာညက်ညော
                                 ကြယ်တို့တောမှ
                                  ချစ်သောလမင်း
                                     ပပ၀င်း ကို
                        ချစ်တင်းစကား..ထပ်ထပ်ကြား..။

                                         တွေး
                                       ရင်အေး
                                     ငြိမ့်ငြိမ့်လေး ။
                                  စိတ်ကူးထွက်ပြေး
                                   လမင်းလေးဆီ
                                   ချစ်ရေးချစ်ခွန်း
                                  ဖွဲ့သီညွှန်းလျှက်
                                 ဝေရွှန်းလက်ဖိတ်
                                  မေတ္တာစိတ်ဖြင့်
                                တိုးတိတ်ချဉ်းကပ်
                                 ရင်လွှာအပ်သော်    
                                အေးဓာတ်စိမ့်ဖြာ
                                 ထုံကူးလာသည်
                       ရင်လွှာသိမ့်သိမ့်..အေးစိမ့်စ်ိမ့်..။

                                     ရတုသစ်
                           (22/12/2012။ 9း 00 ည)

ငါ့ကိုစောင့်ပါ ကဗျာ...

ကဗျာတစ်ပုဒ်ရဲ့နူးညံ့ခြင်းမှာ ဘ၀ကိုပုံအပ်ထားမိ
အဆိပ်အပြည့်ရှိမယ်ဆိုရင်တောင် ငါသောက်လိုက်တယ်..
အမောဖောက်ဖောက်လာတဲ့ ငါ့ အိပ်စက်ခြင်းဟာ တုန်ရီနေခဲ့
ပီတိလောက်ပဲ ပိုင်ဆိုင်နိုင်မယ့်လမ်းကို ငါရွေးထားရဲ့
တကယ့်အဖြစ်အပျက်မှာ ငါ ဆိုးခဲ့တာလား..ငါမသိ
အငိုက်မိခံထားတဲ့ ကဗျာရဲ့ဖြားယောင်းခြင်းမှာ ရင်ခုန်တယ်..။

ပုံပြင်တွေထက်တောင် ငါစွဲလမ်းခဲ့တာပေါ့  ကဗျာ
ဒဏ္ဍာရီမဆန်တဲ့ အတောင်ပံတပ်ဆင်ရင်း လေဟုန်ခွင်းခဲ့ရ
ဘ၀ကို မြင်နေတဲ့အတွေးမှာ..ငါ အထီးကျန်ချင်ကျန်လိမ့်မယ်
ငါ့ဘက်မှာကဗျာရှိနေသေးရင် ကဗျာရဲ့ကမ္ဘာမှာ ငါနေမယ်...။

မြင်လွှာအထပ်ထပ်ကြားမှာ ထွေပြားအာရုံတွေ ရှိတယ်..ကဗျာ
ဆေးသောက်ဖို့အခါခါမေ့မိတာတောင်ကယောင်ကတမ်းညမှာကဗျာနဲ့လမ်းလျှောက်နေမိ
ညရဲ့တိတ်တဆိတ်ဖေးမမှုမှာ လွတ်လပ်ပေါ့ပါးရင်း အိပ်စက်ခြင်းကို ငါမတပ်မက်ခဲ့
ငတ်နေတဲ့ဆာလောင်အာဟာရဟာ..ကဗျာပဲ  ကဗျာ..။

ငါ့အနာဂတ်ငါရွေးရမယ်ဆိုတာ ငါမသိလို့မဟုတ်ဘူး
တိမ်းမူးနေတဲ့ ယိမ်းယိုင်အရွှေ့အပြောင်းမှာ ဒီဂရီအများကြီးတိမ်းစောင်းနိုင်တယ်။
အပြိုင်အဆိုင်မကြိုက်တဲ့ ငါဟာ ကဗျာနဲ့အပြေးပြိုင်နေမိခဲ့
အိပဲ့အိပဲ့ နှေးကွေးခြေလှမ်းနဲ့လည်း ငါ အပြိုင်ကြဲပြီးလိုက်ခဲ့တာလေ
ငါ့ ကိုစောင့်ပါဦး ကဗျာ  ။
ငါ လိုက်နေချင်သေးရဲ့  မင်းနောက်မှာ
ရေရာမှုမရှိမှန်းသိနေတာတောင် ငါ့ အစွဲအလမ်းကိုငါ မဖြေနိုင်သေး
မင်းပေးတဲ့ အိပ်မက်တစ်ခုနဲ့ ငါနွေးထွေးနေချင်သေးလို့ပါ ကဗျာ ။
                   
                                               ရတုသစ်

နက္ခတ်ငြိတဲ့ အလွမ်း

ခူးဆွတ်ချိန်လွန်ကာမှ
ဒီအလွမ်းက မပျိုးပဲ ပွင့်လာခဲ့ပေါ့
ခြေရာမခံချင်တဲ့စိတ်ကို တိတ်တိတ်ကလေး
အိပ်ဆေးခပ်ထားလိုက်တယ်
မသိဆိုးဝါးတဲ့ အိပ်မက်မြစ်ထဲမှာ
အလွမ်းဟာရေစီးနဲ့အတူ လူးလူးလွန့်လွန့် ။

တိုက်တိုက်ဆိုင်ဆိုင် တိုးတိုက်မှုတဒင်္ဂ
ကွယ်ဝှက်မရတဲ့ အလွမ်းက တွန်သံပေးခဲ့ ၀ဲဘက်ရင်အုံမှာ ။

အိပ်ရေးပျက်တာ ဆန်းပါသလား
အလွမ်းမဲ့အိပ်ပျက်မှုမှာ
အဓိပ္ပါယ်ရှာမရခဲ့ လေးလေးနက်နက် ။

မာယာမပါတဲ့သတိရမှုဖြတ်စများအမျှင်တန်းခဲ့ပေါ့
ဖြူစင်တဲ့အလွမ်းလို့သတ်မှတ်ချက်ကိုယ်တိုင်ချမိ
ကန့်သတ်ချက်ဆိုတာရင်ခုန်သံကို ခါးသီးစေသတဲ့
ရေခြားမြေခြားမှာရင်ဘတ်နဲ့တဲ့တဲ့လူတစ်ယောက်
အလွမ်းဝတ်မှုန်သောက်နေခဲ့ ညနက်ထဲမှာ ။

အေးခဲဆောင်းည မြည်တမ်းခြင်း လင်္ကာထဲ
အသည်းကို တယော လုပ်ပြီးထိုးလိုက်ရဲ့
သောင်းတိုက်မှာ ပဲ့တင်မထပ်လဲနေပါစေ
လွမ်းစေသူတစ်ယောက်သိရုံ ဒီအလွမ်းက
ဆောင်းညနဲ့ အတူ သိုဝှက်ထားရပေါ့ ။

ညရဲ့ချော့မြှူသံထဲ အလွမ်းတွေစွန်းထင်းပေကျံခဲ့
ရင်ခုန်ဖက် မဲ့ ရင်ကိုမှ တမ်းတစိတ်ဖိတ်စင်တယ်။

တိတ်တဆိတ်လေးပါပဲ
သဲ့သဲ့လေးကြားလိုက်မိ
ဆောင်းညလက်ခတ်သံပေါ့ ။
''နက္ခတ်ငြိတဲ့အလွမ်း မှာ ဖြေစရာ နတ္ထိ"
''အဆိပ်မရှိတဲ့အလွမ်းမှာ ဖြေဆေးမသိ"
အဲဒီ..  သင်ခန်းစာ
ဘယ်မှကျ ကျန်ခဲ့မှန်း
ဒိုင်ယာရီမှတ်တမ်းက အိုးတိုးအမ်းတမ်းမေ့နေတယ် ။

                     ရတုသစ်
   ( 20/12/2012==12:28 AM)

အိပ်ပျက်သူ

အိပ်
ချော့သိပ်
မျက်စိပိတ် ။
လူးလှိမ့်မှေးမှိတ်
လွမ်းသည့်စိတ်ဖြင့်
ရင်ရိပ်ကမ်းမှာ
သူ့ပုံလွှာကို
မြင်ကာခဏ
နိုးထ ရသည်..
ဆောင်းညသိပ်သည်း(သဲ)
နှင်းမှုန်ဝဲ...။

ပျက်
အေးစက်
နှင်းခဲပက် ။
ချမ်းခိုက်တုန် အက်
ရင်ခုန်လျက်သာ
ရင်ရွက်စုံဖွင့်
သူ့ဆီလွှင့်ဖို့
ရင်ရင့်အလွမ်း
လေပြေနမ်းသည်..
စိမ်းလန်းရင်ထဲ
လွမ်းပိုဆဲ...။

သူ
လာယူ
ညမက်လူ ။
လွမ်းစိတ်ဖြူဖြူ
အိပ်မက်ကူလှည့်
မဟူရာ ည
နှင်းဖြိုက်ကျသော်
ချမ်းမြခိုက်တုန်
ရင် မလုံသည်
လွမ်းဟုန် နင့်နဲ
အိပ်ပျက်မြဲ...။

               ရတုသစ်

( ရေးချင်ရာရေးလိုက်မိသည်။ ပုံစံကိုမပြောတတ်ပါ။သည်းခံဖတ်ရှုကြပါကုန် ။)

ပျောက်ဆုံးနေသော နိဗ္ဗာန်ဘုံ (လွှမ်းမိုး)

                            

              *****************************************************

လေပြေ--အေသင်ချိုဆွေ

                                           အေသင်ရဲ့လေပြေသီချင်းလေးပါ။
                             ခဏခဏနားထောင်ဖြစ်နေတာမို့ မျှဝေလိုက်ပါတယ်။

မျက်မှန်တပ်ရမယ့် ခြေထောက်များ

အဆင်းလမ်း အတက်လမ်း ခပ်ကြမ်းကြမ်းပဲ ဒီဘ၀မှာ
မာယာနဲ့သစ္စာကို ကြိုးညှိရင်းခြေချော်ချင်မိ လျော့တိလျော့ရဲ
လျှောက်ဆဲရှေ့ခြေတစ်လှမ်းအတွက်နောက်ခြေနဲ့ထောက်ကန်ပေးထားရ
နောက်ခြေအားနဲ့ရှေ့ကိုတစ်လှမ်းချင်း ဆက်လက်ချီတက်ချိန်
အပျက်ပျက်နဲ့နှာခေါင်းသွေးမထွက်ချင်ဘူးဆိုရင်
သက်လုံကောင်းတဲ့ခြေထောက်တော့လိုမယ်..။

ကတောက်တဆသိပ်များတဲ့ဟောဒီလောကကြီးထဲ
ခြေမျက်စိကိုပြူးပြဲပြီး ရှင်ရှင်ဖွင့်ထားရပေါ့
ပြန်နှုတ်လို့ရတယ် ဆိုတိုင်း ကြမ်းကျွံလို့ တော်/မတော်
တောင်တန်းကိုကျော်မယ့်ခြေထောက်ဟာအသွားတော်နေမှဖြစ်မယ်..။

ရှပ်တိုက်/ ဖိ /ဖွ /ပြင်းထန်/ညင်သာ မှုများထဲ
ခြေကုပ်မြဲနေမှ အဆင်အပြေဆုံးထင်ရဲ့
တုံးတိုက်တိုက်ဆိုပြီး ဇွတ်တိုးရန် လို /မလို
နဂို ကမှားချင်နေတဲ့ခြေလှမ်းကမလဲပြိုရင်အကောင်းဆုံးပေါ့
တစ်တောင်ဆုံးပေမယ့် နောက်တစ်လုံး..နောက်ထပ်တစ်လုံး
တောင်ကုန်းများစွာ ကျန်နေသေးတယ်
ဝေးဝေးလျှောက်ဖို့ဆုံးဖြတ်ထားမှတော့ဝေးဝေးရောက်အောင်အားစိုက်နေရ
လမ်းမှားမ၀င်အောင်ထိန်းကွပ်ပေးနေရ
ဘ၀ တိုပေမယ့် လမ်း များ /ရှည် တယ် ။

သွားလိုရာခရီးရောက်ပြီလား
သတိတရားကိုခြေထောက်မှာကပ်ချည်ထားလိုက်
တိုက်ခိုက်ဒေါက်ဖြုတ်မယ့်ရန်ခလုတ်အတွေ့မှာ
ခြေအသိမ်း အနှုတ် ပါးနပ်မှ အကျသက်သာရာရပေါ့
အကျအပေါက်များလွန်းတဲ့လမ်းများထက်
ခြေပန်း မကျအောင်အားသွန်ထားရတယ်..။

သွားခဲ့ပြီး သွားနေဆဲ လမ်းများကြားက
သွားရမယ့်လမ်းကိုမြင်ရပြီလား
ကြိုးစားအားတင်းထားတဲ့ခြေထောက်ရဲ့အရွှေ့ကို
မေ့မနေအောင်သတိထားမှဖြစ်မယ်..
ခြေထောက်များရဲ့မျက်စိကိုဖွင့်ထားမှဖြစ်မယ်..။

ခပ်ညစ်ညစ်လမ်းဟောင်းထဲတိုးဝင်မိတိုင်း
ဒီခြေထောက်ကိုပြန်ဆေးကြောဖြစ်ဖို့အရေးကြီးရဲ့
ကျွံနေတာကိုဆက်မကျွံအောင်ပြန်နှုတ်လိုက်
ဆက်တိုက်ကျွံနေတဲ့နွံမှာခြေဆင်းထိုင်နေလို့မဖြစ်သေး
အားသစ်မွေးပြီးပြန်ထ..ဒါဘ၀ပဲ..။

လဲနေသူထူပေးမယ့် လူစစ်စစ်ရှားလာတဲ့လောကထဲ
လဲချပြနေလို့ကောင်း/မကောင်း တွေးကြည့်
အသိနဲ့ခြေလှမ်းကို ထိန်းသိမ်းရင်းမတိမ်းမစောင်းမောင်းနှင်နိုင်ဖို့
ချို့တဲ့နေတဲ့စိတ်အားကိုပြန်ဖြည့်ရင်း
မေ့လျော့တတ်လွန်းတဲ့ခြေမျက်စိကို
သတိ မျက်မှန်တပ်ထားမှဖြစ်တော့မယ်။

                     ရတုသစ်

အိပ်ရေးပျက်

                                        
                                            ( အိပ်ရေးပျက် )
                                      
        မသေချာမရေရာတာတွေများတဲ့ကောင်းကင်အောက်..အချိန်တန်အိမ်ပြန်ချိန်တွေနှုတ်ဆက်
       လမ်းခွဲတိုင်း...ကျန်ခဲ့တဲ့ငါ့စိတ်တို့ချစ်သူမင်းအပါးက တစ်ဖ၀ါးမခွါကြဘူး..ကမ္ဘာမြေပြိုသလို
       နာကျင်ကွဲရှဖူးသူမို့..ကြယ်တွေကြွေတာမြင်ရင်တောင်ကြိတ်ခါဝမ်းနည်းမဆုံး...တစ်ကယ်
      မင်းနဲ့မဝေးရဲလို့ညစဉ်စိတ္တဇနဲ့အတွေးပင်လယ်မျော...ဟို အရင်ဒဏ်ရာတွေကသွေးမတိတ်
        သေးချိန်မှာ ထိတ်လန့်ခြင်းကအစဉ်အမြဲစိုးမိုး..မင်းရင်ထဲမှာဘယ်သူများရှိလို့နေမလဲ....
      (စွဲလမ်းစိတ်နဲ့ကိုယ်အိပ်စက်မရနိုင်ပါ..တကယ်အလေးနက်ထားပြီးငါ့အပေါ်ချစ်ရဲ့လား..
         စိတ်မချခြင်းနဲ့အိပ်ရေးပျက်ပျက်နေတာ..ဒါတွေမင်းမသိခဲ့တဲ့..စိတ္တဇညဆိုးများ....)

မင်းအကြောင်းအိပ်မက်

                                                   အိပ်မက်ထဲရင်ခုန်ဆဲ
                                               ကြင်နာသူလေးရှိတဲ့အချိန်
                                          ဘယ်သူတွေများ မင်းအိပ်မက်ထဲ
                                                      ၀င်နေလဲကွာ....

မြဲစေသား

အာဇာနည် ရဲ့ မြဲစေသားဆိုတဲ့ သီချင်းကောင်းလေးတစ်ပုဒ်ပါ။
နားဆင်ကြည့်ကြပါဦးနော်..။

နှင်းဝှက်တဲ့ဆောင်း

                               နှင်းဆွတ်ဆွတ်ကြဲချ
                             အေးခဲဆွတ်ကျင်နွမ်းမောလျ
                                 အမေ့အိမ်လွမ်းတ ။

             ရေးလိုက်ပြင်လိုက်နှင့်ဤစာကြောင်းလေးသုံးကြောင်းကိုပင်ထပ်တလဲလဲရေရွတ်ကြည့်နေမိသည်။
တကယ်ဆိုလျှင်ဟိုက္ကူကဗျာနှင့်သိပ်အကျွမ်းမ၀င်လှ။ရေးချင်စိတ်ဖြစ်ပေါ်လာသောကြောင့်ရေးလိုက်မိခြင်းသာ။
ဟိုက္ကူကဗျာလေးများသည်တိုရှင်းလှပသည်။ထိမိသည်။ပြလိုရင်းကိုတိုက်ရိုက်ခံစားမိစေသည်ဟုထင်သည်။
လူ့စိတ်ဆိုသည်မှာလည်းခက်တော့ခက်သည်ဟုဆိုရမည်။အရိပ်အကဲဖမ်းဖို့သိပ်မလွယ်လှ။သူတစ်ပါးစိတ်ကို
ထား၍မိမိစိတ်ကိုပင်ပြန်ဖမ်းမိရန်မလွယ်ကူပေ။ယခုတစ်မျိုး၊တော်ကြာတစ်မျိုးဖြင့်အမျိုးမျိုးပြောင်းလဲနေ
တတ်သည်။အဘိဓမ္မာတရား၏နယ်ပယ်မှာဆိုလျှင်မျက်စိတစ်မှိတ်လျှပ်တပြက်အတွင်းမှာပင်စိတ်၏ဖြစ်ပျက်မှု
အကြိမ်ပေါင်းကများပြားလွန်းသည်ဟုဆိုကြသည်။ထိုသို့ဖြစ်ပျက်မှုကိုမြင်နီုင်လောက်သည်ထိအသိက
မရင့်ကျက်သေး။တည်ငြိမ်မှုမရှိသေး။သစ်ရွက်လှုပ်သည်နှင့်စိတ်ကလိုက်လှုပ်ချင်မိသည်။ရေလွှာယိမ်းသည်
နှင့်စိတ်ကလိုက်ယိမ်းချင်မိသည်။အတိမ်းအစောင်းများလွန်းသောလောက၀ယ်ရုပ်သေးရုပ်တစ်ရုပ်လို
ကံကြမ္မာကြီုးဆွဲရာတိမ်းစောင်းနေကြရသည်။ဗလောင်းဗလဲနိုင်လွန်းသောဘ၀အတွေ့အကြုံများနှင့်
ရင့်ကျက်ဖို့တာစူနေသောစိတ်ကိုအရိပ်အကဲဖမ်းမိနီုင်အောင်ကြိုးစားရဦးမည်ထင်သည်။လက်ရှိအချိန်ထိ
စိတ်၏ဆိတ်ငြိမ်မှုကိုအပြည့်အ၀မခံစားရဖူးသေးပါ။လူ့သဘာဝအရပင်မတည်ငြိမ်လေသလား။လောကဓံ၏
အပုတ်အခတ်ကြောင့်ရွေ့နေလေသလား။မခွဲခြားတတ်တော့။သံပတ်မကုန်မချင်းလည်ပတ်နေရဦးမည့်
သံပတ်ပေးနာရီတစ်လုံးကဲ့သို့မရပ်မနားလှည့်ပတ်နေရဦးမည်မှာအမှန်ပင်….။
*******************************************************************
                                   (သန္တိသုခ)        
                               နှင်းဝေေ၀မနက်
                           ဆွတ်ပျံ့ဖွယ်ဥသြသံသာ
                                 နွေကိုလုခဲ့ရှာ။

                    ဆရာမောင်ချောနွယ်၏ကဗျာလေးတစ်ပုဒ်ဖြစ်သည်။အလုပ်ရှုပ်သည့်ကြားမှမကြာခဏ    ဖတ်နေမိသောကဗျာစာအုပ်ထဲမှာသည်ကဗျာလေးကိုတွေ့ရသည်။ဖတ်မိစကတည်းကဆွတ်ပျံ့မှုဝေဒနာ
ကရင်ဘတ်ကိုလာထိသည်။ဆောင်းရာသီ၏နှင်းဖွေးဖွေးဝေနေသောမနက်ခင်းတစ်ခုမှာဤကဗျာလေး
အကြောင်းတွေးနေမိသည်။နှင်းစက်တို့တွဲလွဲခိုနေသောသစ်ရွက်လေးများကိုကြည့်ရင်းငေးနေမိသည်။
နှင်းရိုက်သည့်ဒဏ်ကြောင့်မှိုင်းကုပ်ကုပ်ဖြစ်နေရှာသောသစ်ရွက်ကလေးများ၏မျက်ရည်စက်လေးများ
အဖြစ်မြင်နေမိသည်။ကြည့်လေရာရာနှင်းမြူဆိုင်းနေသောတောင်တန်းကြီးများကိုသာမြင်နေရသည်မို့
အိမ်လွမ်းစိတ်တို့ကအတောင်ပေါက်လာသည်။ငယ်ငယ်ကလေးဘ၀က၀င်ပုန်းနေခဲ့ဖူးသောကောက်
ရိုးပုံကြီးကိုသတိရမိသည်။ဆောင်းတွင်းရာသီဆိုလျှင်ကောက်ရိုးပုံကြားဝင်၍အိပ်စက်ခဲ့ဖူးသောနွေးထွေး
မှုကိုပြန်တမ်းတမိသည်။ကောက်ရိုးပုံ၏အနွေးဓာတ်မှာတစ်ပတ်နွမ်းပုဆိုးလေးခြုံကွေးရင်းအိပ်ပျော်နေ
တတ်သောအခါများဝယ်အမြဲတမ်းဆူပူတတ်သောမေမေ့ကရုဏာဒေါသသံလေးကိုပြန်ကြားယောင်လာ
မိသည်။နှင်းစက်တစ်ချို့နှင့်အတူမျက်ရည်ပွင့်လေးတွေခြွေချမိရသည်အထိ။
သို့သော်….အပူ အအေး ၀ိရောဓိ ။
*******************************************************************

                     ရောက်နေမိသောဒေသ၏အေးချမ်းမှုကအညာဒေသ၏ဆောင်းရာသီနှင့်မတူ။တောင်
ပေါ်ဒေသ၏သဘာဝအတိုင်းအရာရာအေးခဲချမ်းခိုက်နေသည်။ဆွယ်တာထူထူဝတ်ထားသောရင်ဘတ်ထဲ
ထိအအေးဓာတ်ကလာရိုက်သည်။ကောက်ညင်းဆန်လေးများနှင့်ရောလှော်ထားသောလဖက်
ခြောက်ခပ်ထားသည့်ရေနွေးကြမ်းကိုသာတစ်ခွက်ချင်းသောက်၍အနွေးဓာတ်ယူနေရသည်။မီးလင်းဖို
ဘေးမှာထိုင်၍မီးလှုံရင်းရှမ်းခေါပုတ်ကင်နှင့်ပဲပုတ်ထောင်းကိုမနက်စာအဖြစ်စားသုံးရခြင်းကို ခံတွင်း
တွေ့လာသည်။မန္တလေး၏မနက်ခင်းများလိုမနက်စာမစုံလင်သော်လည်းတောင်ပေါ်ဒေသ၏မရိုးနိုင်
သောမနက်စာကနှစ်ခြိုက်စွဲလန်းစရာဖြစ်လာသည်။တစ်ခါတစ်ရံတို့ဟူးနွေးနှင့်ရှမ်းခေါက်ဆွဲလေးကို
စားရသည်မှာလည်းမမေ့နိုင်စရာပင်။တို့ဟူးနွေးဝါ၀ါလေးများကိုကြည့်ရင်းမေမေ၏ဆောင်းတွင်းမနက်စာ
ဆီစိတ်ကပြန်လွှင့်မိပြန်သည်။မေမေကဆောင်းတွင်းမနက်ခင်းများမှာထမင်းကြမ်းကိုနနွင်းမှုန့်ပါးပါး
လေးဖြူး၍ကြော်ကျွေးတတ်သည်။ကြက်သွန်ဖြူတစ်တက် နှစ်တက်ကိုလည်းထုထောင်း၍ထည့်လိုက်
သေးသည်။ကြက်သွန်ဖြူဆီကျက်နံ့လေးသင်းလျှက်အငွေ့တစ်ထောင်းထောင်းထနေသောထမင်း
ကြော်ပူပူလေးကိုနင့်နေအောင်လွမ်းမိပြန်သည်။
                         အချစ် အလွမ်းမကင်းသေးသောလောကသားတစ်ယောက်မို့လွမ်းတတ်တာမ
ဆန်းဟုဆိုချင်ဆို။တောင်ပေါ်ဒေသမှအညာဆီပြန်လွှင့်နေရသောအလွမ်းကပိုသည်ဟုထင်မိရသည်။
ဤအချိန်မျိုးမှာမေမေကထမင်းကြမ်းကိုကြော်မြဲကြော်နေပေလိမ့်မည်။အဝေးရောက်သားတစ်ယောက်
အတွက်လစ်ဟာနေသောထမင်းဝိုင်းလေးကိုကြည့်ရင်းမျက်ရည်စို့နေလေမည်လား ။မိဘနှင့်သားသမီး
ကြားကဆက်နွယ်မှုကြီုးတစ်ချောင်း၏တင်းအားကနှလုံးသားကိုတစ်ရစ်ချင်းလာချည်သည်။စိတ်ကူး
အိပ်မက်မှာမေမေနှင့်အတူထမင်းကြော်ပူပူလေးစားနေမိသည်။လက်ရှိဖြစ်တည်နေမှုမှာတို့ဟူးနွေးနှင့်
ရှမ်းခေါက်ဆွဲပန်းကန်ကိုငေးရင်းတွေးနေမိသည်။ငိုင်နေမိသည်။ဖြိုင်ဖြိုင်ကျသည်ဟုမဆိုသာသော်
လည်းတစ်ိမ့်စိမ့်ဝေ့လာသောမျက်ရည်များကြောင့်မျက်ဝန်းကစွတ်စိုလာသည်။အချစ်အလွမ်းထက်ဘ၀
ကိုဦးစားပေးနေရသောအဖြစ်မှာရင်ဘတ်ကတဆစ်ဆစ်နာလာသည်။
                         အလွမ်းမှာသာအသံပါသည်ဆိုလျှင်အိမ်ဝေးလူတစ်ယောက်၏အလွမ်း
ကမေမေ့ရင်ဘတ်ထဲထိပဲ့တင်ထပ်ကောင်းထပ်နေပေလိမ့်မည်။မေမေ့နားစည်ထဲမှာတဖွဲဖွဲလွင့်ဝဲနေ
လိမ့်မည်။အခုတော့…အလွမ်းမှာအသံပျောက်နေသည်။သို့သော်…အလွမ်းကငွေ့ရည်စုဖွဲ့ကာနှင်းစက်
တို့နှင့်အတူလွင့်ဝဲချင်နေသောမျက်ရည်များဖြစ်လာသည်။အလွမ်းအမျိုးမျိုးထဲမှာအမေ့အိမ်ကိုပြန်
လွမ်းရသောအလွမ်းလောက်နူးညံ့သောအလွမ်းမရှိဟုဆိုချင်မိသည်။ထိုနူးညံ့သောအလွမ်းဖြင့်အမေ့အိမ်
ဆီအလွမ်းတွေတဝေါဝေါစီးဆင်းနေကြပြီထင်သည်။နှင်းသည်းသည်းကြားမှတောင်တန်းကြီးများက
လည်းအလွမ်းကိုအားဖြည့်ပေးနေကြသည့်အလား ။တောင်တန်းကြီးများလည်း ငိုနေမည်ထင်ပါသည်။

*******************************************************************
                         ဖွဲ့စည်းထားသောအဖွဲ့လေး၏စေညွှန်မှုဖြင့်တောင်ပေါ်ဒေသသို့ရောက်ရှိနေရ
ခြင်းပင်။တောင်ပေါ်ဒေသဆိုသည်မှာလည်းရှမ်းပြည်နယ်မြောက်ပိုင်းနောင်ချိုမြီု့အ၀င်လေးတွင်ဖြစ်
သည်။နောင်ချိုမြို့မ၀င်မီတဲ(တည်း)နန်းတော်မှတစ်ဆင့်ခရီးဆက်ရသည်။ရှမ်း ဓနုတိုင်းရင်းသားတို့၏
အစုအဖွဲ့လိုက်တည်နေသောရွာကလေးများကဟိုတစ်စုသည်တစ်စု။ ထိုရွာစုလေးများထဲမှခဲမွန်ရွာ၊
လုံရုံးရွာ၊စက်ရုံရွာလေးများဆီသို့ရောက်ခဲ့သည်။အခြားနာမည်မမှတ်မိတော့သောရွာလေးများလည်းအများအပြား။ ထိုရွာအုပ်စုလေးများကကိုးကွယ်ကြသော’’ကျောက်ခေါင်း’’ဘုန်းတော်ကြီးကျောင်းမှာ
တည်းခိုရသည်။ကျောင်းပတ်ဝန်းကျင်မြင်လေသမျှကတောင်တန်းတွေပဲရှိသည်မို့ကျောင်း၏တည်ရာ
နေရာလေးကမိုးဗြဲဒယ်အိုးအလယ်မှာရောက်နေသလိုထင်မိသည်။သဘာဝသစ်ပင် ပန်းပင်များနှင့်စမ်း
ချောင်းကလေးတွေစီးဆင်းနေသည်ကိုကြည့်လျက်ကြည်နူးမိရသည်။အလုပ်နားချိန်များဝယ်ထိုစမ်း
ချောင်းလေးဘေးမှာသွား၍ ငေးချင်ရာငေး ၊တွေးချင်ရာတွေးနေရသည်ကိုကဆွတ်ပျံ့ဖွယ်ကောင်းနေ
သည်။ထိုဒေသမှကလေးငယ်များကိုပညာဒါနသင်တန်းလေးများပို့ချပေးနေရသည်ကိုလည်းအလုပ်
သဘောထက်သမိုင်းပေးတာဝန်ကိုထမ်းဆောင်နေရသည်ဟုစိတ်ထဲတေးမှတ်ထားလိုက်သည်။
သဘောမနောကောင်းလွန်းသောသူတို့လေးတွေ၏အနာဂတ်အတွက်တံတားတစ်စင်းအဖြစ်ချနင်းဖို့
လမ်းခင်းပေးချင်နေမိသည်။သို့သော်..သတ်မှတ်ကာလ ဆိုသည့်အကန့်အသတ်ကစိတ်ကူးနှင့်လက်
တွေ့ကိုစေ့စပ်ခွင့်မပေးခဲ့။ ကံကြမ္မာဇာတ်ညွှန်း၏ပြဌာန်းချက်အတိုင်းသရုပ်ဆောင်ကပြရုံသာ။
အချိန်တန်ပြီဆိုလျှင်……..။
*****************************************************************
                   အားလပ်သောရက်များဝယ်ဆိုင်ကယ်တစ်စီးဖြင့်နောင်ချိုမြို့အနှံ့လျှောက်လည်ဖြစ်
သည်။နာမည်ကျော်ဂုတ်တွင်း(ဂုတ်ထိပ်)တံတားကြီးဆီသွားငေးဖြစ်သည်။နှင်းမြူဆိုင်းဆိုင်းကြားမှ
ဖွေးဖွေးဖြူနေသောဂုတ်ထိပ်တံတားရှုခင်းကရင်ကိုဖမ်းစားလွန်းလှသည်။တံတားအောက်ခြေမှမှုန်ပျပျလေး
သာမြင်နေရသောချောင်းလေးထဲထိစိတ်ကလွှင့်လိုက်မိသည်။အလွမ်းဓာတ်ခံများသူမို့လားမသိ။
တံတားနှင့်ချောင်းကလေး၏ကွာဝေးမှုကိုလည်းလွမ်းလွမ်းဆွတ်ဆွတ်ခံစားနေမိပြန်သည်။မနီးစပ်နိုင်
သောကွာဝေးခြင်းများကိုမုန်းတီးစိတ်ဝင်နေခဲ့ရသည်။
                   သံသရာကရှည်လျားလွန်းသည်။ဇာတ်မျောကြီးတစ်ခုလိုပင်။ထိုသံသရာကိုပင်ခင်တွယ်
နေမိကြသည်လားတော့မဆိုနိုင်။အလွတ်ရုန်းဖို့စိတ်ကအားနည်းနေသည်။ခွဲထွက်ဖို့စိတ်ကချည့်နဲ့နေ
သည်။တွန်းလှန်ဖို့စိတ်ကသေးသိမ်နေသည်။ဖြတ်ချဖို့စိတ်ကတွန့်ဆုတ်နေသည်။ ဘ၀တစ်ခု၏
အလျားသည်တိုလွန်းလှသည်။ထိုဘ၀အလျားတိုတိုလေးမှာပင်ပျော်ဝင်မှုတို့ကမကုန်ခမ်းနိုင်။စီးမျောမှုတို့
ကမတင်းတိမ်နိုင်။ချစ်စရာ ၊လွမ်းစရာ၊ပျော်စရာ၊စိတ်ပျက်စရာစသောပဋိပက္ခတရားတွေနှင့်လုံးချာ
ရိုက်နေသည်။ဝဲလည်ခတ်နေသည်။ကြည်နူးမှုအရှိန်မသေခင်ကြေကွဲမှုကပူးဝင်တတ်ပြန်သေးသည်။
တကယ်ဆိုလျှင်ထိုပဋိပက္ခတရားများသည်ဟိုမှာဖက်နှင့် သည်မှာဖက်အလွန်နီးကပ်လွန်းသည်ဟုထင်မိ
သည်။အလွှာပါးပါးလေးတစ်ခုသာခြားကွယ်နေသည်ဟုထင်မိသည်။
                           နေသားကျသင့်ပြီဖြစ်သောစိတ်ခံစားမှုကအလွမ်းနှင့်တည့်တည့်တိုးလာသောအ
ခါငလျင်ကြောမိသလိုဖြစ်လာသည်။ယိမ်းထိုးတုန်ခါလာသည်။အဝေးရောက်သားတစ်ယောက်၏
အလွမ်းကရင်ဘတ်ထဲကပ်ပါးပိုးမွှားများလိုကပ်ငြိလာသည်။ဖြေမဆည်နိုင်မှုများဖြင့်ရင်ဘတ်ကလေး
လံလာသည်။ကြည့်လေရာရာတောင်တန်းတွေဝိုင်း၍နှင်းမြူဆိုင်းနေသောဒေသမှာရောက်နေရသည့်အ
တွက်မှန်းဆမမြင်နိုင်သောအမေ့အိမ်၏နွေးထွေးမှုကိုငတ်မွတ်တောင့်တနေမိသည်။မပြည့်စုံခြင်းများ
သာအပြည့်ရှိနေသေးသောဘ၀မို့အမေ့အိမ်ဆီလှည့်မည့်ခြေလှမ်းတွေကနှေးကွေးလေးလံနေသေး
သည်။အရာရာခွင့်လွှတ်အပြုံးနှင့်ကြိုလင့်နေမည်ဖြစ်သော်လည်းလက်ဗလာနှင့်ပြန်သွားရလောက်
အောင်ထိအမေ့အိမ်၏တံခါးကိုမခေါက်ချင်သောစိတ်ကအိမ်ဝေးလူ၏အဖြစ်ကိုကြာရှည်စေသည်။
ရွှေအိုးထမ်းလာသည်ကိုသာမြင်ချင်မည်ဖြစ်သောအမေ့ထံငွေအိုးလေးတော့ထမ်းသွားချင်သေးသည်။
သို့သော်…ငွေတွင်းတွေကနက်ရှိုင်းလွန်းသည်။လက်တစ်ဆုံးနှိုက်သော်လည်းမမီချင်။မမိချင်။ပီပြင်
သောဘ၀ပန်းချီကားတစ်ချပ်ကိုရေးဆွဲလိုက်/ပြန်ဖျက်လိုက်နှင့်ပင်သံပတ်ပေးထားသောဘ၀ကိုမောင်း
နှင်နေရပေဦးမည်။
****************************************************************
                  ဆရာမောင်ချောနွယ်၏ဆောင်းနှင်းဝေေ၀မနက်ခင်းတစ်ခုကဥသြငှက်ငယ်၏ကျူးရင့်သံ
နှင့်ပူနွေးရှိန်းမြနေသောနွေကိုလုယူသွားခဲ့သည်။အိမ်ဝေးလူတစ်ယောက်၏ရင်ဘတ်ထဲမှာတော့အေးမြမှု
နှင်းကိုအ၀ှက်ခံလိုက်ရသည်။အေးမြခြင်းကိုအလုယူခံလိုက်ရသည်။ပူဆွေးမှုဖြင့်လိမ်းကျံခြယ်သထားသော
အလွမ်းကမျက်ရည်မိုးတွေခိုးခိုးရွာစေသည်။ဆောင်းကချမ်းမြဲချမ်းနေသည်။ အလွမ်းကလည်း
လွမ်းမြဲလွမ်းနေသည်။နှင်းဝှက်သွားသောဆောင်းမှာအလွမ်းသိပ်သည်းဆလွန်ကဲပြီးငွေ့ရည်ဖွဲ့ကာမိုး
ရွာသည်။အလွမ်းမိုး ။အိမ်ကိုလွမ်းမိသောစိတ်ကိုအခြေခံ၍ရွာသောမိုးဖြစ်သည်။

                   အလွမ်းမျက်ရည်များ၏ ဟိုမှာဖက်ဝယ်နှင်းစစ်စစ်ဆောင်းကိုဖက်ရမ်းနမ်းရှုတ်ချင်နေမိ
တော့သည်။လက်ရှိအချိန်မှာဆောင်းတွင်းမိုးရွာနေမိပါသေးသည်။

                                                     ရတုသစ်

စိမ်းတဲ့ လမင်း

အလင်းပျက်မြီု့ပြည
မလှပလေရှာ..။


ကြယ်စင်တွေအလင်းကူးလည်း
လင်းဘူးမြေလွှာ..။


ရက်စက်လို့မနေသာ
ဖွေရှာသူမော..လမင်း...။

မြူနှင်းတိမ်တောင်တွေနဲ့
ရှောင်သွေကာသူလေ တိမ်းပြီပေါ့
စိမ်းရက်လေခြင်း..။ 

                                         ရတုသစ်
                                  (15/12/12) 12-40 am

နူးညံ့ခြင်းစတင်လာတဲ့အချိန်

တစ်ကိုယ်ရေအလွမ်းနဲ့မှတ်တမ်းဟာခဲရာခဲဆစ်
အလွမ်းမြစ်မှာအချစ်တွေဖျတ်ဖျတ်လူးခဲ့ပေါ့
တိမ်းမူးတဲ့ညခင်းဟာလမင်းကို စုံစမ်းနေရဲ့
ကြယ်ကျဲကျဲကောင်းကင်မှာခုနစ်စဉ်ကြယ်အမြီးဝှက်ချိန်
စိုးရိမ်စိတ်လွန်ကဲမှုကအသည်းကိုမက်ဆေ့ခ်ျပို့တယ် ။

အလွမ်းမှာနှောင်ကြိုး ရှိခြင်း/မရှိခြင်း
အလင်းတွေလော့ခ် ကျတိုင်းနံရံလေးဖက်မှာသူ့ပုံရိပ် ၀ဲခဲ့
ဖျတ်ကနဲလန့်လန့်နိုးတဲ့ညဟာ ဘုံကြိုးပြတ်လွင့် စင်
ရင်ခွင်ကိုလာလာရိုက်တဲ့အော်သံတွေမှာလိပ်ပြာတစ်ကောင်နားစွင့်ထားရဲ့
သူ့ရဲ့ဘာသာမဲ့မျက်ဝန်းတွေရင်ကမ်းခြေဆီဆိုက်ကပ်နေတယ်..။

တစ္ဆေတစ်ကောင်လိုညကိုခိုးယူရင်း
အလင်းနှစ်တွေ သွန်သွန်ပစ်ခဲ့ရ
စိတ္တဇညရဲ့အမှောင်ဟာငါ့ရင်ဘတ်မှာလင်းနေတာ အခက်ပဲ ။

ကွယ်ဝှက်ထားတဲ့အပြာရောင်တံခါးချပ်နောက်ကွယ်မှာ
လက်မှတ်ပျောက်နေဆဲနှလုံးသားတစ်ခုအိပ်မောကျနေခဲ့ဖူးတယ်
ရိုးရှင်းတဲ့ချည်နှောင်ခြင်းမှာဗီးနပ်စ်ရဲ့မျှားတစ်စင်းစိုက်ခဲ့
လမိုက်ညတွေနဲ့ရင်းထားတဲ့ရင်ဘတ်ဟာတဆတ်ဆတ်တုန်မိ
ကန့်သတ်ချက်ရှိတဲ့အချစ်ဟာ..အိပ်မက်ဆန်နေမလား..
ရိုးသားခြင်းဟာ ပါးလျစ ပြုလာပြီထင်တယ်..။

သီိအိုရီတွေမုန်းတယ်ဆိုပြီး
စိတ်ကြီးဝင်နေခဲ့ဖူးတဲ့ ၀ိညာဉ်ဟာ
ဒီတစ်ကြိမ်ထိခတ်ပွတ်ဆွဲမှုမျှားချက်မှာ
ငြိမ်သက်စွာနူးညံ့နေခဲ့မိတယ်လေ...။

             ရတုသစ်

(13/12/2012--11:20 PM)

ကြာပြီး ကြာဆဲ ကြာမည့် ကြာ

ရောက်တတ်ရာရာအရည်မရအဖတ်မရတဗျစ်ဗျစ်ကွမ်းစကားတွေနဲ့ဗလာ  ကြာ
ကြာကြာဝါးရင်းခါးမှန်းသိရင်းတမာနေ့စွဲများထဲထပ်တလဲလဲ  ကြာ
တံလျှပ်ကိုရေထင်ပြီးလိုက်ရင်းပြေးရင်းအသက်ရှူသံပြင်းပြင်းထဲမှာနွမ်း ကြာ
ဗလာမပါကံစမ်းမဲမှာပေါက်မဲလက်ကျန်တစ်ခုနဲ့ရေစုန်ရေမျော  ကြာ
ဟာနေတဲ့ဝမ်းစာအတွက်ရေထိုးလေထိုးပိုးမျိုးရှစ်ဆယ်ဝါးရင်းစား  ကြာ
မကြာခဏအချက်ပြတဲ့အေးခဲမိုင်းနပ်တွေထဲရေဆူမှတ်ပျောက်နေတဲ့အေးခဲ  ကြာ
မရေရာဘူး မသေချာဘူး တညည်းညူညူနဲ့သည်းအူပြတ်မျှလောကဓံအထောင်းမှာညောင်း  ကြာ
လိုက်လေပြေးလေ ရွှေသမင်တာအထွက်မှာ လည်ပြန်မျှော်ရင်း တာပျက်  ကြာ
မဟာဘုတ်ကိုခဏခဏထူကြည့်ရင်းအစီးအနင်းများတဲ့ဇာတ်မျော  ကြာ
ရှင်းလေ မရှင်းလေရှုပ်နေတဲ့သပွတ်အူမြစ်ထဲမှာ အမယ်ဘုတ်ရဲ့ချည်ငင်တွေကြားညပ်  ကြာ
နေခြည်မျှော်ဆဲနှင်းပိတ်သည်းမှာအားနည်းနေတဲ့အရုဏ်ဦးမှာငုံသည့်  ကြာ
ထုံအနေတဲ့သွေးကြောကိုမီးပူထပ်တလဲလဲတိုက်ရင်းသွေးကျွမ်းနေတဲ့လက်ထဲမှာ ထုံ ကြာ
မာယာအလှည့်အပြောင်းမှာဇာတ်ညွှန်းဟောင်းဆီမျက်နှာပြန်လှည့်ချင်တဲ့ မူ ကြာ
ဒီရထားကိုစီးနင်းရင်း ဒီခရီးမှာ ဒီဘူတာမေ့ကျန်ချင်တဲ့ ဒီ  ကြာ
ဟိုဟာလျှော့လိုက် ဒီဟာလျော့လိုက် ဘောင်ဘင်ခပ်အိုးနဲ့တည့်တည့်တိုးရင်းမပြည့်  ကြာ
တောင်ဖီလာရဲ့ကြာ၊မြသန်းစံရဲ့ကြာနဲ့ကြိုးစားရင်းလက်ပန်းကျရင်းကြာနေတဲ့ ကြိုးကြာ
သမင်မွေးရင်းကျားစားရင်းအရင်းပြန်ပြန်ပေးနေရတဲ့ ပြန်ပေး ကြာ
မျက်စိတစ်မှိတ်လျှပ်တပြက်ကိုအနှေးပြကွက်နဲ့သုံးဖက်မြင်ပြန်ပြန်ကြည့်နေရတဲ့သရီးဒီ  ကြာ
ဟိုးလေးတစ်ကျော်တိုင်း ကျော်ကျော်သွားလို့လက်တားထားရတဲ့ ဟိုး  ကြာ
ပျော်ပျော်နေသေခဲထဲမှာအငွေ့ပျံသွားတဲ့ရေခဲမြစ်မှာရည်/ရေပျော် ကြာ
မာယာတို့ရဲ့ပြက္ခဒိန်အခန်းဆက်ကိုစိတ်ကူးနဲ့လှမ်းဖွင့်ရင်း မျှော်လင့် ကြာ
ပစ်ဒီဘူကာရာ့ခ်ျတောင်ကိုသွားနေဖို့ယာဉ်နံပါတ်ပျောက်နေတဲ့ လိုင်စင်မဲ့ ကြာ
အနှစ်မဲ့တောမှာအပြစ်တွေချိုး(ဂျိုး)ကပ်ရင်းတဖြည်းဖြည်းဆူဖြိုးလာတဲ့ကျက်/ကြက်ဆူ ကြာ
ဘ၀အကွေ့အကောက်မှာဝင်္ကပါထဲဝင်ပုန်းမိတဲ့ အပုန်း  ကြာ
လျှို့ဝှက်ခလုတ်ကိုတိုးတိုးလေးဖြုတ်ထားတဲ့တံခါးချပ်နောက်ကွယ်နား ချက်ကျလက်ကျ  ကြာ
အဖြူ/အမည်း(မဲ)၀ိရောဓိမှာလက်သည်ရှာရင်းအဖြေမရှိတဲ့ ပဟေဠိ ကြာ
နှာခေါင်းသွေးထွက်အပျက်တွေကြား ရေငုံနှုတ်ပိတ်တိတ်ဆိတ် ဆွံ့အ ကြာ
လျော့တိလျော့ရဲ ခါးဝတ်ကိုမနိုင်ရင်ကာ ပြန်ချည်တုပ်နေတဲ့ တုပ် ကြာ
ကြီးလေချဉ်လေ လောကထဲ အစာအိမ် ပွထနေတဲ့ အချဉ် ကြာ
အလံလဲနေတဲ့ လှေခွက်ထဲမှာလက်ဗလာနဲ့ရုန်းတက်တဲ့ အဆန် ကြာ
ကြာ တွေ ကြာတွေ ကြာတွေ ကြာ ကြာ ကြာ
ကြာဖူးခဲ့ပြီး  ကြာနေဆဲ  ကြာလိမ့်ဦးမည် ကြာ..။

                                 ရတုသစ်
                       (12/12/2012--10:45 )

ကိုယ့်ရင်ထဲက သည်းသစ္စာ

ချစ်ပြုံးဝင့် ၊ပွင့်စေချင်
ရင်ဘတ်ထဲ ၊မြဲသစ္စာ
ထာဝရ ၊လှပါစေ
ဝေဆာပန်း ၊လန်းဆန်းမွှေး
အေးသည့်ရင် ၊ စဉ်အေးစိမ့်
ငြိမ့်ငြိမ့်လေး ၊တေးဖွဲ့သီ
ရီဝေမူး ၊ မြူးတူးခုန်
တုန်ယင်ဟိုက် ၊လှိုက်ကာဖို
ချိုပြုံး ငဲ့ ၊လဲ့လဲ့ ကြွေ
ပြေပြေလေး ၊ထွေးပွေ့မိ
အိညက်ညော ၊ချောပါးပြင်
စဉ်မွှေးပျံ့ ၊နံ့သာခဲ
ရဲစိတ်နွှေး ၊မွှေးလိုက်လျှင်
ရင်ခွင်သို့ ၊ယို့ယို့ဆင်း
ကြွင်းမဲ့ချစ် ၊နှစ်နှစ်ကာ
သာယာစိတ် ၊ဖိတ်သည့်ရင်
ကြင်နာစစ် ၊ချစ်ခြင်းဖွဲ့
ယဲ့ယဲ့ပြုံး ၊မုန်းမဟူ
တူလျှောက်လှမ်း ၊လမ်းဖြောင့်စေ
ဝေသည့်ချစ် ၊ပြစ်မမြင်
စဉ်ပိုကဲ ၊စွဲမြဲလာ
မာယာမဲ့ ၊ ဖွဲ့သံစဉ်
ရွှင်ကြည်နူး ၊မြူးပျော်ရ
ဘ၀လမ်း ၊ချမ်းမြေ့ပြီ
ရည်ရွယ်ထား ၊အားဆက်ဖို့
တို့ဆင်နွှဲ ၊ မြဲမေတ္တာ
ကိုယ့်ရင်ထဲ ၊သည်း(သဲ)သစ္စာ ။

                 ရတုသစ်
       ( 10-12-2012  10 :35PM)
( ၀ဲရိုက် ၊၀ဲသွင်း ပုံစံလေးရေးချင်စိတ်ပေါက်လာ၍ရေးမိသည်။)

ရင်မွှေးပန်း

တစ်ပွင့်တစ်လေ
ပွင့်ကာဝေလည်း
ရင်မြေလွှာထက်
သူဆင်းသက်သော်
နှစ်ဖက်လက်တန်း
စောင့်လို့ဖမ်းမည်
မြဲတမ်းမွှေးစေ ရင်ခွင်ဗွေ..။

            ရတုသစ်
(10-12-12--နံနက် 3နာရီ 7မိနစ်)

စောင့်စားမှုအခင်းအကျင်းမှာ ငေးမိခြင်း

                    ကျွန်တော်ငယ်ငယ်က မေမေ့နှုတ်ဖျားမှထွက်ကျလာမည့်ပုံပြင်တွေကိုနားဆင်ဖို့
အိပ်ချိန်ထက်နောက်ကျစွာစောင့်စားခဲ့ဖူးသည်။အပ်ကြောင်းထပ်နေသည့်ပုံပြင်ဓာတ်ပြားဟောင်း
ကြီးကိုမွတ်သိပ်စွာနားထောင်ခဲ့ရ၏။ရိုးမသွားခဲ့တာဆန်းကြယ်သည်။မေမေ့မေတ္တာကြောင့်ထင်၏။
အခုချိန်ထိမေမေ့အိပ်ယာဝင်ပုံပြင်တွေကိုပြန်ကြားယောင်နေမိခဲ့သည်။ဗာရာဏသီပြည်မှမင်းကျင့်
တရားနှင့်ပြည့်စုံသောဘုရင်ကြီးတစ်ပါးအကြောင်းကိုနှစ်သက်ခဲ့ဖူးသည်။''ပိုနေမြဲကျားနေမြဲ"ပုံပြင်
ကိုတော့ယခုလက်ရှိအချိန်တွင်ငယ်ငယ်ကလောက်မနှစ်ခြိုက်မိတော့ပါ။အရာရာမျက်လှည့်ဆန်
နေသောလောကကြီးမှာ''ပိုနေမြဲကျားနေမြဲ"လုပ်နေ၍မရတော့ဘူးထင်သည်။ထိုပုံပြင်၏အဓိက
သီအိုရီအားပြောင်းလဲပစ်မည့်အချိန်ကိုကျွန်တော့်ဘာသာစောင့်စားနေခဲ့မိ၏။လွယ်မည်ဟုတော့
မထင်ပါ။စကားပုံထဲထိအသုံးပြုရလောက်အောင်ထိုပုံပြင်၏ထိရောက်မှုကအားကောင်းလွန်းခဲ့သည်။
ထိုပုံပြင်၏မူလသဘောတရားကိုချေဖျက်ပစ်နိုင်မည့်အချိန်ကိုကျွန်တော်စောင့်ပါဦးမည်။
တစ်နေ့နေ့တွေ့ရမည်ဟူသောမျှော်လင့်ချက်ကားပြယ်လွင့်မသွားခဲ့ပါချေ။ထိုကဲ့သို့သောမျှော်
လင့်ချက်များဖြင့်ကျွန်တော့်င်ထဲမှာ စောင့်စားခြင်းအသီးသီးတွေနေရာယူပြည့်နှက်နေသည်ဟု
ထင်မိပါသည်..။
++++++++++++++++++++++++++++++++++++++

                   ထို့ပြင်ကျွန်တော်ကဗျာများကိုချစ်သည်။ကဗျာရေးသူများကိုလေးစားခဲ့ဖူးသည်။
ကဗျာကပေးသောရသမျိုးစုံဖြင့်ဘာမျှမရှိသောကျွန်တော့်ရင်ဘတ်ထဲမှာအရာရာပြည့်စုံနေတတ်သည်။
ပုဂံ၊အင်းဝခေတ်အဆက်ဆက်မှစ၍ယနေ့ကဗျာအခင်းအကျင်းထိကျွန်တော့်စိတ်ကပျော်ဝင်လွယ်သည်
ထင်မိ၏။ကဗျာကိုကဗျာဟုသတ်မှတ်ထားသောကျွန်တော့်အသိစိတ်မှာကဗျာ့အသံ၊ကဗျာ့ဟန်နှင့်ပတ်သက်
၍ငြင်းခုန်စရာမရှိ။ ငြင်းခုန်ရန်လည်းမသိ ။ ကဗျာ၏နယ်ပယ်ကိုအနှံ့လျှောက်သွားချင်မိခြင်းပဲသိသည်။
သွားလည်းသွားနေမိ၏။အဆုံးထိတော့ရောက်နိုင်မည်မထင်ပါ။ကဗျာ၏နယ်ပယ်သည်အလွန်ကျယ်ဝန်း
လွန်းသည်။
                             သို့သော်..ကဗျာများကပေးသောအတွေးကွန်ယက်များကြားဝယ်နှစ်ခြိုက်စွာမိန်းမောနေမိဆဲပင်ဖြစ်၏။
ကဗျာများကပေးသောအားကိုစားသုံးနေဆဲပင်ဖြစ်၏။ကဗျာများကဝေငှသောအလင်းကိုခိုလှုံနေဆဲပင်
ဖြစ်၏။
                                   ကဗျာတွေဖတ်ပြီးသောအခါကဗျာများထဲမှပုံရိပ်များကိုကျွန်တော်ကပြင်ပလောကထိသယ်ယူချင်မိသည်။
မရမှန်းသိလေပိုလိုချင်မိလေ ဖြစ်တတ်သောလူ့သဘာဝကိုကျွန်တော်မလွန်မြောက်နိုင်သေးပါ။ထို့ကြောင့်
လိုချင်မှုများစွာဖြစ်တည်လာတိုင်းသက်ပြင်းမောတွေပဲမိုင်တိုင်ရှည်ကုန်သည်ထင်၏။သက်ပြင်းချရတိုင်း
သာအသက်တိုရမည်ဟုဆိုလျှင်ကျွန်တော်အသက်ရှည်မည်မဟုတ်ဟုကိုယ်တိုင်တွေးမိရသည်အထိပင် ။
                                   ဆရာဗန်းမော်ညိုနွဲ့၏ကဗျာလေးထဲမှလရောင်ဆမ်းသောရွာလေးကို
ကျွန်တော်ပိုင်ဆိုင်ချင်မိသည်။ထိုရွာလေးထဲမှာဆိတ်ဖလူးနံ့လေးတွေပျံ့သင်းနေသည်။ဝင်းဝါနေသော
ရွာလမ်းတစ်လျှောက်ည၏အလှကိုခံစားချင်မိ၏။
                                       လက်ရှိကြုံဆုံနေရသောညများထဲမှာဝင်းဝါနေသောမြေသားလမ်းကလေးမရှိပါ။   ဆိတ်ဖလူးနံ့လည်း
သင်းမနေပါ။မည်းနက်နေသောကျောရိုးကြီးများပေါ်မှာကာဘွန်ဒိုင်အောက်ဆိုဒ်တွေပဲပျံ့လွင့်နေသည်။
ဝုန်းဒိုင်းကြဲနေသောပတ်ဝန်းကျင်နှင့်တစ်ဝီ၀ီပြေးနေသောယာဉ်တွေကိုသာစိတ်ပျက်စွာငေးမောနေမိ၏။
ကဗျာထဲကရွာလေးဆီသို့ဘယ်နေ့ဘယ်ရက်များမှရောက်ပါလိမ့်မည်နည်းဟုစိတ္တဇဆန်စွာစောင့်စားနေမိ
ပါသည်။
                                    ကျောက်ခေတ်မှစ၍ယနေ့ထိတရိပ်ရိပ်ပြေးတက်လာသောခေတ်ကြီးက ကျွန်တော့်စောင့်စားခြင်းကိုစောင့်နေမည်မဟုတ်မှန်းလည်းသိနေပါ၏။ခေတ်ကခေတ်အတိုင်းသွား၍
ကျွန်တော်ကစောင့်စားမြဲစောင့်စားနေမိဦးမည်ထင်ပါသည်။
++++++++++++++++++++++++++++++++++++++++++
                       အင်တာနက်ခေတ်၊ဒုံးပျံခေတ်၊အိုင်တီ/အိုင်စီတီခေတ်ဟုယနေ့ကမ္ဘာကိုရှုမြင်ထားကြ၏။
နည်းပညာတိုးတက်မှုများကကြောက်ခမန်းလိလိတိုးတက်လာကြသည်။အသစ်အသစ်တွေအစားထိုးဝင်
ရောက်လာကြသည်။အဟောင်းတွေကိုလူတွေမခင်တွယ်ချင်တော့လောက်အောင်အသစ်တွေ၏ညှို့ငင်
အားကပြင်းလွန်းသည်။အသစ်တွေကိုကျွန်တော်ကြိုဆိုမိပါ၏။သို့သော်....အတိုင်းအတာတစ်ခုထိတော့
ရှိပါသည်..။
                      ခေတ်၏အသစ်နယ်ပယ်အရွှေ့မှာကျွန်တော့်မွေးရပ်မြေလည်းရွေ့ခဲ့ရ၏။ကွပ်ပျစ်စကား
ဝိုင်းလေးတွေဖွဲ့ပြီးသာရေး/နာရေးပြောလေ့ရှိကြသောကျွန်တော့်မွေးရပ်မြေမှာကွပ်ပျစ်စကားဝိုင်းတွေမရှိ
တော့။တီဗီဖန်သားပြင်နှင့်နိုင်ငံရပ်ခြားဇာတ်လမ်းတွဲများကကျွန်တော်ကျင်လည်ပျော်မောခဲ့သောစကား
ဝိုင်းတွေကိုရိတ်သိမ်းသွားခဲ့သည်။ခိုးဝှက်သွားခဲ့သည်။လသာသာနှင့်ဝိုင်းကြီးပတ်ပတ်ကစားကြသော
ကလေးငယ်တို့၏ရိုးရာကစားဝိုင်းကိုပွဲသိမ်းခရာသံမှုတ်သွားခဲ့သည်။တိုးတက်သည်လား/ဆုတ်ယုတ်သည်
လားတော့ကျွန်တော်မဝေခွဲလိုပါ။ ယောင်္ကျားလေး၊မိန်းကလေးများ၏ဦးခေါင်းမှာဆံပင်ရောင်စစ်စစ်တွေ
ပျောက်ကုန်သည်။အ၀တ်အစားတွေတို/ပါးလာကြသည်။မဟားဒရားလိုက်၍ခေတ်မီချင်သောမိန်းကလေး
တစ်ချို့၏မျက်နှာပြင်မှာသနပ်ခါးတွေမရှိကြတော့။အိမ်မှာပင်ကျောက်ပျဉ်ရှိဟန်မတူတော့ပါ။                                   ထိုအချိန်မျိုးမှာဆရာမကြီးအမေလူထုဒေါ်အမာ၏‘“မေမေ့ရှေးစကား”စာအုပ်များကိုပြန်သတိရသည်။
ထိုစာအုပ်များထဲမှမေမေပြောသောမိန်းကလေးမျိုးကိုပြင်ပလမ်းမတွေထိကျွန်တော်ကဆွဲထုတ်ကြည့်ချင်
နေမိ၏။ခေတ်အပြောင်းနှင့်အတူယဉ်ကျေးမှုပါလိုက်ပြောင်းသင့်/မသင့်ကျွန်တော်မချင့်မရဲတွေးနေမိသည်။
ယဉ်ကျေးမှုပြန်လည်ဦးမော့လာမည့်နေ့ကိုရင်ဘတ်ဖိ၍စောင့်စားနေမိပြန်ပါသည်။ယဉ်ကျေးမှုပပျောက်
လျှင်ဘာတွေဆက်ဖြစ်နိုိင်မည်ဆိုတဲ့အထိကျွန်တော်မတွေးရဲသေးပါ။
+++++++++++++++++++++++++++++++++++++++++

                                    အခုတလောသတင်းစာ/ဂျာနယ်တွေ့သမျှဖတ်ဖြစ်နေသည်။
ဒီရက်ပိုင်းတွေအတွင်းထွက်လာသောသတင်းများကလိုချင်သောအဖြေကိုမပေးသေးပါ။ထိုအခါစောင့်
စားခြင်းဆိုသည်ကအလိုလိုဖြစ်ပေါ်လာ၏။ပရိယာယ်များလှသောလှည့်ကွက်များထဲမှာမီဒီယာတွေပါ/မပါ သိချင်လာမိသည်။အခင်းအကျင်းစုံသောရောင်စုံသတင်းများကြားမှတစ်ခုသောလပြည့်ည၏အဖြေကို
တိတိကျကျသိချင်နေမိ၏။သို့သော်...ဤအဖြေမှန်ကဘီလူးစောင့်သောရေကန်အတွင်းဆင်းသွားသော
သားသမင်တွေလိုဖြစ်နေသည်ထင်မ်ိ၏။ခြေရာသာကျန်ရစ်ပြီးအကောင်အထည်ပျောက်သွားသလို
ခံစားနေရသည်။တရားကိုနတ်စောင့်သည်ဟုဆိုလျှင်ထိုနတ်မင်းတို့အိပ်ယာမှထချိန်တန်ပြီထင်ပါသည်။
                           ကမ္ဘာကြီးပူနွေးလာနေသော်လည်းသိကြားမင်း၏ပဏ္ဍုကမ္ပလာကျောက်ဖြာမ
မပူသေး။မတင်းသေးပါ။အေးနေဆဲ။ပျော့နေဆဲပင်ဖြစ်မည်။ထိုအချိန်ကိုကျွန်တော်တို့ဘယ်အတိုင်းအတာ
ထိစောင့်ရမည်မသိသေးပါ။စလေဦးပုည၏တေးထပ်တစ်ပုဒ်ထဲကလိုပင်ဝရဇိန်လက်နက်ပြင်ဆင်နေရော့
သလား ...ဟုပင်တွေးမိတွေးရာတွေးနေမိပါ၏။
                                    ထို့ပြင်ဆက်သွယ်ရေးကွန်ယက်နှင့်ပတ်သက်၍ကျွန်တော်စောင့်စားနေမိတာ
ရှိသေးသည်။ထစ်ကနဲဆိုစိတ်တိုလွယ်တတ်သောကျွန်တော်သည်လောကကြီး၏သင်ပြပေးမှုနှင့်လောက
ကြီး၏ပရိယာယ်အဖုံဖုံကြားမှာစောင့်စားခြင်းများစွာရင်ဝယ်ပိုက်နေမိသည်။ရင်ဘတ်နှင့်မဆန့်အောင်
ပင်ဖြစ်နေသည်ထင်မိ၏။အကောင်အထည်နှင့်ချပြ၍မရသောကြောင့်ဘာမျှမတတ်နိုင်။
စောင့်စားလက်စနှင့်စိတ်ရှည်ရှည်ထား၍စောင့်စားရုံအပြင်ဘာမျှမရှိပါ။
                                    အချိန်နှင့်တစ်ပြေးညီတိုးတက်နေသောယနေ့ကမ္ဘာမှာအခြားကမ္ဘာအခြမ်းမှ
ကလေးငယ်တွေပင်ဖုန်း၊အင်တာနက်သုံးနေချိန်တွင်ကျွန်တော်တို့ဖက်ခြမ်းမှာပွင့်လင်းမြင်သာမှုတွေ
အားမကောင်းသေးပါ။လိပ်ပြေးသလိုနှေးနေသေးသည်ထင်မိ၏။တရွေ့ရွေ့နှင့်မို့ပန်းတိုင်ပျောက်သွားမှာ
ကိုပင်စိုးရိမ်နေမိသေးသည်အထိပင် ။
                                    ပွင့်လင်းခြင်းဆိုသည်မှာလည်းရိုးရာယဉ်ကျေးမှုကိုချကျွေးရမည့်ပွင့်
လင်းခြင်းမျိုးကိုမဆိုလိုပါ။အိုးနှင့်ဆန်တန်ရုံခပ် သုံးဖို့အသုံးပြုသူဖက်မှာတာဝန်ရှိသည်ထင်မိ၏။
                                    အခုလောလောဆယ်မှာဆက်သွယ်မှုပိုင်းကအားနည်းနေသေးသည်
ထင်သည်။လုံလောက်သောဆက်သွယ်မှုကိရိယာမျုိးလူတန်းစားမျိုးစုံ၊အလွှာစုံလက်ထဲရောက်ရှိနိုင်မှု
အားမကောင်းသေးပါ။မီဒီယာများမှချပြသောထင်ကြေးများဖြင့်အာသာဖြေနေကြရသည်။ငွေကြေးသိန်း
ဂဏန်းများစွာမှသည် တစ်ရစ်ချင်းကျလာသောအကျများကလိုအပ်သောအကျထိမရောက်သေးပေ။
သိန်းဆယ်ဂဏန်းကျော်မှခြောက်သိန်း ၊ငါးသိန်းအထိကျခဲ့ပြီးပြီ။အားရဖွယ်မရှိသေးပါ။နှစ်သ်ိန်းခွဲ ၊တစ်သိန်းခွဲထိကျလာသည်။အပြည့်အ၀အားမရသေးပါ။တန်ရာတန်ကြေးထက်ပိုပေး၍အသုံးပြုနေ
ရသောထိုဆက်သွယ်မှုပစ္စည်းလေးကိုကျွန်တော်စိတ်မနာနိုင်ခဲ့။လူတိုင်းရှိသင့်သည်ထင်ရသော
ထိုပစ္စည်းလေးကိုကျွန်တော်လည်းစောင့်စားနေမိသည်။ကျွန်တော့်လိုစောင့်စားနေသူုတွေတော်တော်
များများရှိလိမ့်မည်ထင်၏ ။
                                    လောကကြီး၏သင်ခန်းစာများထဲမှာသည်းခံတတ်ဖို့တွေပါဝင်သည်။
“ စောင့်နိုင်လျှင်အကျိုးရှိ”ဟုရှေးဆိုရိုးပင်ရှိပါ၏။အကျိုးရှိမည့်အရာတွေအတွက်စောင့်စားရခြင်းကား
မပြောပလောက်ပါ။အကျိုးမရှိပဲစောင့်စားနေရမည့်အဖြစ်မျိုးတော့မလိုချင်မှန်းလူတိုင်းတစ်ထပ်တည်း
ကျသဘောတူမည်ထင်သည်။
                                    သည်းခံခြင်းဆိုရာဝယ်စောင့်စားခြင်းလည်းပါဝင်မည်ထင်သည်။
အကျိုးရှိသောစောင့်စားခြင်းမျိုးတော့ဖြစ်ဖို့လိုပါ၏။မရေရာတတ်သောလူ့ဘ၀အချိန်တိုအတွင်းမှာ
ရေရာသောစောင့်စားမှုရလဒ်လေးတွေတော့လိုချင်နေမိတာအမှန်ပင်။မွေးဖွားသည်မှစ၍သေဆုံးချိန်
ထိစောင့်စားရခြင်းက ကုန်နိုင်မည်မထင်။ တစ်မျုိးပြီးတစ်မျိုးတစ်ခုပြီးတစ်ခုရှိ ၊ရှိလာနေဦးမည်ပင်
ဖြစ်သည်။စောင့်စားလက်စနှင့်ဆက်လက်စောင့်စားရပေဦးမည်။
                                    နိုင်ငံရေး၊ဘာသာရေး၊စီးပွားရေး၊ပညာရေး၊လူမှုရေး..
အရေးများစွာစောင့်စားရန်လိုနေသေး၏။စောင့်နိုင်သူကစောင့်သလောက်အကျိုးရှိမည့်အရေးတွေ
 ဖြစ်စေချင်မိသည်။
×××××××××××××××××××××××××××××××××××××××××

                                   စောင့်စားခြင်းနှင့်ပတ်သက်၍ကျွန်တော်နားထောင်ဖြစ်သောသီချင်း
တစ်ပုဒ်ရှိသည်။နားထောင်ဖြစ်စကတည်းကအဖြစ်သနစ်တွေတိုက်ဆိုင်လွန်း၍နှစ်ခြိုက်ခဲ့သည်။ယခုထိ
ကြိုက်မိနေဆဲပင်ဖြစ်၏။တေးသံရှင်မောင်မောင်ဇော်လတ်၏“ရပ်စောင့်”ဆိုသောသီချင်းဖြစ်သည်။
ထိုသီချင်းထဲကအတိုင်းကျွန်တော်ရပ်စောင့်ခဲ့ဖူးသည်။အိပ်ရင်းလည်းစောင့်စားခဲ့မိ၏။အတွေးတွေထဲမှာ
ပင်စောင့်စားခြင်းကိုသရုပ်ခွဲနေမိသေးသည်။ထိုသီချင်းကိုအတွေးဖြန့်ကျက်ပြီးအခင်းအကျင်းမျုိးစုံ၊
နယ်ပယ်စုံအထိကျွန်တော်စောင့်စားနေမိပါတော့သည်။
                                 တစ်ခုတော့ရှိသည်။ပိုနေမြဲကျားနေမြဲသီအိုရီကိုတော့အတိုင်းအတာ
တစ်ခုထိပြောင်းလဲရမည်ထင်ပါ၏.။စောင့်စားခြင်း၏အကျိုးရလဒ်ကိုသမိုင်းက
အဖြေပေးနိုင်လိမ့်မည်ထင်ပါသည်။
 ****************************************************
                                      ရတုသစ်
                           (  9 - 12 -2012  10 ：40 PM )

အဲဒီနေ့က ဒိုင်ယာရီစာမျက်နှာ..

အဲဒီနေ့က အရင်နေ့လိုပဲမအိပ်လိုက်မိ တစ်ညလုံးလင်းခဲ့
အဲဒီနေ့က ဆရာမောင်ချောနွယ်ရဲ့‘’ငှက်ဆိတ်တဲ့သစ်စည်း” လေးကို လုခဲ့တယ်
အဲဒီနေ့က ညီမင်းဝေရဲ့'' ဟိုး" ကဗျာကိုဖတ်ရင်း ကိုယ်တိုင် ''ဟိုး " ဖို့သတိရလိုက်မိ
အဲဒီနေ့က မင်းနဒီခရဲ့'' ပိုးပိုးလေး" ကို ဘာရယ်မဟုတ် တွေးကြည့်နေမိတယ်
အဲဒီနေ့က ထွန်းလင်းသစ်ရဲ့ "ချင်း "ကဗျာကိုလေးခေါက်မြောက်ပြန်ဖတ်သေးရဲ့
အဲဒီနေ့က"လင်းလက်တာရာဆီလှမ်းပို့လိုက်တဲ့ကဗျာ"ကို"Open form မှတစ်ဆင့်"နားထောင်ဖြစ်တယ်။
အဲဒီနေ့က " ကြီးကြီးကျယ်ကျယ်ကဗျာ " ဖတ်နေတုန်း မီးပျက်သွားတာ စိတ်ညစ်စရာကောင်းလွန်း
အဲဒီနေ့က ၀ိုင်ဝိုင်းရဲ့  ''့ဖြူစင်သောအလွမ်း"သီချင်းကို youtube  ကနေခံစားမိခဲ့
အဲဒီနေ့က တိုက်တိုက်ဆိုင်ဆိုင်ပဲ '' အနိစ္စ" သဘောလေးတွေးမိတယ် ။
အဲဒီနေ့က ညီငယ်တစ်ယောက်ရဲ့မွေးနေ့အတွက်ဆုတောင်းပေးခဲ့တာအမှတ်တရပေါ့
အဲဒီနေ့က ဖြတ်မရတဲ့ဝါသနာအတိုင်း ဦးတိုးကြီးရဲ့''မဟာဆန်သူ"လေးညည်းခဲ့မိ
အဲဒီနေ့က ဘာမှမသိချင်သူတစ်ယောက်ရဲ့အတွေးတွေ ကိုကော်ပီကူးခဲ့တယ် ။
အဲဒီနေ့က ဗိုလ်ချုပ်အောင်ဆန်းကြေးရုပ်ကိုမီးထွန်းမယ့်အကြောင်းတစေ့တစောင်းသိလိုက်ရ
အဲဒီနေ့က မောင်ရင့်မာ(ကျောင်းကုန်း)ရဲ့'' လရောင်ရွာတဲ့ရွာ "'ကိုမ၀ယ်ဖြစ်ခဲ့ပါ ။
အဲဒီနေ့က ''ကမ္ဘာငယ်လေး''ထဲကို စိတ်လိုလက်ရ၀င်ရောက် မွှေနှောက်ခဲ့သေးတယ်။
အဲဒီနေ့က လူခါးရဲ့ ''အိမ်ပြန်ချိန်" ကိုဖတ်ပြီး အိမ်ပြန်ဖို့ မေ့လျော့နေခဲ့မိ
အဲဒီနေ့က ညရဲ့အဆိပ်မိသူဟာဘယ်သူလဲ လို့ကိုယ့်ကိုယ်ကိုပြန်မေးမိရဲ့
အဲဒီနေ့က လောကပါလနတ်မင်းတွေကိုတိုင်တည်မိသေးမှန်းသတိရ
အဲဒီနေ့က မင်းကြည်ညိုရဲ့''မောင့်ကျောတံတား "ဆီပြန်လျှောက်ပြီး ရင်ဘတ်အောင့်တယ်။
အဲဒီနေ့က မနက်စာမစားခဲ့မိမှန်း ရေဆာမှ အလန့်တကြားသိရပေါ့
အဲဒီနေ့က အတွေးနယ်လွန်နေလို့ လဖက်ရည်ဆိုင်မထုိင်ဖြစ်ဘူး
အဲဒီနေ့က မင်းနဒီခ ရဲ့ဖုန်းဆက်နည်းကိုသင်ယူတတ်မြောက်ခဲ့တယ် ။
အဲဒီနေ့က အစ်မတစ်ယောက်ရဲ့စေတနာက်ိုလျစ်လျူရှုခဲ့မိ
အဲဒီနေ့က ဘာနေ့မှန်းမသိလို့ ပြက္ခဒိန်ပြန်ကြည့်ဖြစ်သေး
အဲဒီနေ့က ရေးပြီးသားကဗျာတစ်ပုဒ်ကိုစာလုံးပေါင်းပြန်ပြင်ရပေါ့
အဲဒီနေ့က ဘူးသီးကြော်မစားချင်တော့လောက်အောင်အတွေးပွားမိတယ် ။
အဲဒီနေ့က ခပ်တည်တည်နဲ့သက်မွန်မြင့်ကို Like  လုပ်ဖို့ Mouse ကို Click လိုက်မိ
အဲဒီနေ့က Nကိုင်ရာရဲ့ '' လေဒီ Nကိုင်ရာ'' အယ်လ်ဘမ် အစ အဆုံးနားထောင်ဖြစ်ရဲ့
အဲဒီနေ့က စံဇာဏီဘိုရဲ့ ဟောစာတမ်းလေးပြန်ဖတ်ရင်း ပြုံးမိတယ်။
အဲဒီနေ့က ပိုက်ဆံကုန်ခါနီးလို့အမေ့ကို သတိတရလွမ်းဆွတ်မိခဲ့ပေါ့
အဲဒီနေ့က ဘ၀ရှေ့ရေးကို တခုတ်တရ မျှော်တွေးကြည့်မိတယ် ။
အဲဒီနေ့က  Statusမှာ ရေးချင်ရာရေးပစ်လိုက်တယ် စိတ်သွားတိုင်း
အဲဒီနေ့က လုပ်နေကျဝတ္တရားတွေပျက်ကွက်သွားခဲ့တယ်။
ဒီနေ့တော့  စနေနေ့ဆိုပဲ
ကဗျာရေးလို့မဖြစ်နိုင်မှန်း ရင်ဝှက်အခန်းက အချက်ပြပေါ့
မှင်ရောင်ခပ်ဖျော့ဖျော့ ဘောလ်ပင်န်ကိုဒီအတိုင်း ပစ်ချထားလိုက်ရတယ်။

                                           ရတုသစ်
                            (  8-12-2012 12：45 အေ M )
။ရေးမိရေးရာရေးကြည့်လိုက်မိသည်။ ကဗျာဟုတ်/မဟုတ်ဖတ်သူကဆုံးဖြတ်သွားစေလိုပါသည်။

အားကျမိခြင်း

သူက..
ဓူဝံကြယ်ကိုဆွတ်ခူးခိုင်းတယ်
မြေ၀ပ်ငှက်တစ်ကောင်ရဲ့သမိုင်းကို
ု
အပိုင်းပိုင်းခုတ်ချခံလိုက်ရခြင်းပဲ..။

ပေးဆပ်ခြင်းတွေတနင့်တပိုးရှိပေမယ့်
မပေးဆပ်နိုင်တဲ့ဘ၀မျိုးကို
ဘယ်လိုဒေ၀တာတွေကဖန်ဆင်းပေးထားတာလဲ..။

မြေနံ့နဲ့ချည်တုပ်ခံထားရတဲ့
ဘ၀ရဲ့ကြိုးအထုံးကိုဖြေဖို့ခက်ပါရဲ့
တစ်ခါတစ်လေတော့လည်း....
ထန်းတစ်ဖျားလောက်အမြင့်ကို..
မျှော်လင့်မိခဲ့ဘူးတာ အမှန်ပေါ့ ။

ဒီထက်ပိုမတတ်နိုင်တဲ့ ဘ၀မို့
မြေနံ့နဲ့ဝပ်ကျင်းခတ်လို့
ငါ့ကို ငါ ချဉ်းကပ်မယ်..။

သစ္စာရဲ့သမိုင်းကို ပထမဆုံးတွေ့ရှိခဲ့တဲ့
မဟာလူသားတစ်ဦးရဲ့ ရှာဖွေမှုမျိုးကို
ရိုးရိုးလေး အားကျမိလိုက်တယ်..။

                  ရတုသစ်

လောလောဆယ်မေ့နေတဲ့လူ

ပင်လယ်အော်ဆီက တောင်ပံခတ်သံကို ကြားဘူးလား
 လားတစ်ကောင်ရဲ့ ဂျက်လေယာဉ်ထက်မြန်တဲ့ အမြန်နှုန်းကိုမြင်မိလား
 လားရာ ရောက်ရာ ဆိုက်ကပ်ရာမှာ ဘာတွေကြိုနေတယ်ဆိုတာ သိပြီပေါ့
 ပေါ့ပေါ့တန်တန်တွေးထားတာတွေက လေးနက်နေတတ်တာ တွေ့ဘူးမှာပါ ပါဆယ်ထုပ်တစ်ထုပ်ရဲ့အလေးချိန်က ချိန်ခွင်ထဲမှာပဲ ရှိတာမဟုတ်
 ဟုတ်သလိုလိုနဲ့ မဟုတ်သလိုလိုဖြစ်သွားတာတွေ အများကြီး
 ကြီးကြီးကျယ်ကျယ်ပြောမှ လူရာဝင်မယ်လို့တော့ မထင်ခဲ့မိ
 မိထားတဲ့အတွေးတွေလွတ်သွားမှာပဲ စိုးရိမ်စိတ်တွေ လွန်ကဲ
 ကဲသာကဲ ဆိုပြီးမြှောက်ပေးနေတဲ့ လက်တွေက ကြောက်စရာ
 ရာရာစစဘာမှမဟုတ်တဲ့ အပိုင်းအစတွေကြားမှာ ပျော်မွေ့နေ
 နေသာချိန်ဆိုတာညအခါမှာလည်း ရှိတတ်တယ်လို့ပြောတာ မမှား
 မှားနေတဲ့ရှေ့နေတွေ နောက်နေရင် သတိပြု
 ပြုစားခံထားရတဲ့အသိကိုပြန်ဖြေဖို့ ၀ိညာဉ်တွေ ရှင်းထားလိုက် လိုက်ရင်းဝေးဝေးနေတဲ့ ရေသေမြောင်းတစ်ခုဟာ ပြားချပ်ချပ် ချပ်ကပ်လာတဲ့လောကပါလတရားမှာ ဖောင်းပွနေတာဘယ်သူ ပြုပြင်မလဲ လဲယိုင်လာတဲ့ခေတ်ကို ထောက်တိုင်ကူဖို့ လွယ် လွယ်လေး မထင်နဲ့
 နဲ့တဲ့တဲ့ပြေးနေတဲ့ ဘ၀ဘတ်စ်ကားကြီးက ဘရိတ်ပေါက်
 ပေါက်ပေါက်ရှာရှာတွေးနေတဲ့ အတွေးအမြင်မှာ အစောင်းလိုက်ဒေါင်လိုက် လိုက်ရင်းပြေးရင်းနဲ့ပန်းတိုင်ဟာ ရွြှေ့ပည်တော်မျှော်တိုင်း ဝေး
 ဝေးဝေးကပဲဖြေသိမ့်နေလို့ သက်သာမယ့်ဝေဒနာ ရှိ /မရှိ
 ရှိတာလေးနည်းနည်းကိုမသိတာများများနဲ့ ဆိတ်ကိုဆင်သားရေ ဖုံး
 ဖုံးကွယ်ထားတဲ့အမှားဝင်္ကပါဟာ အကွေ့အကောက် မျက်လှည့်
 လှည့်ကြည့်တိုင်းမြင်နေတော့ သမင်လည်ပြန်ကိုမတ်မတ် ထူထား
 ထားခဲ့တဲ့ပုံသေကားချပ်မှာ အဓိပ္ပါယ် ဘယ်ရွေ့ဘယ်မျှ
 မျှမျှတတတွေးတတ်ရင် နေပျော်စရာပါ ဆိုတဲ့အဆိုကို ထောက်ခံဖို့ ဖို့ထားတဲ့အိပ်မက်တွေ မှောက်လိုက်လှန်လိုက် ကတိုက်ကရိုက်
 ရိုက်စစ်မှပေါ်တာမဟုတ်တဲ့ တရားခံကိုရိုက်စရာ လို /မလို
 လိုနေတာကိုလိုနေမှန်း သိအောင်ဖြည့်ကြည့်မှ အားလုံးအလိုဖြစ်
 ဖြစ်နေတာကဖြစ်သင့်တာထက်နောက်ကျနေတော့ ဖြစ်ချင်တာတွေ ပျက်
 ပျက်သွားတဲ့လမ်းကြောင်းကို သဲဖြူးပြီးခြေရာရှာဖို့ အနံ့ခံ
 ခံနေရတာများတော့ခန္တီ ဆိုတာ ရသေ့ကြီးတစ်ယောက်ရဲ့ ဘွဲ့နာမည် မည်ကာမတ္တမဟုတ်တဲ့ လောလောဆယ်တွေဆီမှာဘ၀ကို မြှုပ်ထားရ
 ရထားထွက်သွားတာတောင် လက်မှတ်ဖြတ်ဖို့မေ့ကျန်ခဲ့တဲ့ လူ
 လူထဲမှာ အဲလိုလူတစ်ယောက် အမှန်ရှိခဲ့တယ်ဆိုတာ ပုံပြင်တစ်ပုဒ် ပုဒ်စပ်ပုဒ်ဖြတ်မှားနေတဲ့ကဗျာတစ်ပုဒ်ကို ဘယ်လိုဖတ်ရမှန်း မသိတတ် တတ်သိတာလေးနည်းနည်းနဲ့ငင်နေရတော့ အမြင်တွေ ကပ်လွန်းတယ်။
                           
                                ရတုသစ်
                           ( 5-12-2012 )

ညကဗျာ

ညကိုတုပြု
ကဗျာထုဆစ်
အမှုလက်သည်
ရှာဖို့ရွယ်သော်
သွေးကြွယ်ကဗျာ နိုးသောကြောင့်။

ညနက်ထဲမှာ
ကဗျာစာကို
ရေးကာစီဆဲ
ဈာန်ဝင်မြဲမို့
အိပ်လည်းမပျော်
အတွေးပေါ်တိုင်း
ရည်ရော်နှိုင်းသည်
တံတိုင်းရင်မှာမဲ့သော့ကြောင့်...။

        မင်းကြည်ညို+ရတုသစ်

မိုးလင်းဦးမယ့် ည

မေမေ့ကိုချစ်သောသားတစ်ယောက်ကို
ဘာ့ကြောင့် အခြားတစ်ယောက်ကိုချစ်မိဖို့
 စေညွှန်လိုက်တာလဲ..ဖူးစာ..
တမူးသာသွားတဲ့ အဲဒီ အချစ်မှာ မာယာတွေပါလား
 အတွေးများနဲ့ညဟာ ကျနော့်အတွက် အိပ်ဖို့ဖြစ်မလာခဲ့ဘူး
 မှေးမှိတ်...တိတ်ဆိတ်ငြိမ်သက်ကြည့်...
 ထိနေတာက ရင်ဘတ်မှာလေ မေမေ..
 အဆိပ်ဖြေဆေးမရှိတဲ့ဒီ နှလုံးသားကို
ဘယ်အရာတွေနဲ့ ပြန်ပြုစားရမလဲ
အိပ်မွေ့ချနည်းမကယ်နိုင်တဲ့ကျနော့်ညတွေဟာ
 အိပ်မက်တွေနိုးနေရင်း မက်နေခဲ့တာပေါ့
 မျက်လုံးမှာ စိတ်ပုံပြင်တွေလိုက်ဖတ်ရင်း
 ဒီညလည်း ..မိုးလင်းဦးတော့မှာပဲ..မေမေ..။
           
                 ရတုသစ်
               4-12-2012

အိပ်ဖန်စောင့် ည

ကြယ်ရောင်ဖြာလင်း ၊ လေညင်းသွင်းချိန်
သီချင်းလေးဆို ၊စောင့်ကာကြိုမည်..
ဝင်ခိုနားလှည့်..ပြေးဝင်ခဲ့ မေ..။

ညရဲ့ရှုခင်း ၊ ငြိမ်ဆိတ်ခြင်းဝယ်
ယမင်းသက်လယ် ၊လှသွေးကြွယ်ကို
ချစ်ဖွယ်စကား ၊ ထပ်ထပ်ကြားသည်
ချစ်အားစိမ့်ယို ၊ရွှန်းလက် စိုပေါ့ ။

ကြယ်ကိုထွန်ယက် ၊ လမင်းထွက်၍
လက်လက်ရောင်ထွား ၊သစ်ရွက်ကြားမှ
လင်းအားဖြန့်ကျက် ၊မြေသို့သက်စဉ်
နုညက်ဖြူစင် ၊ မေ့ပါးပြင်မှ
ရွှေစင်ယိုးမှား ၊ သနပ်ခါးကို
နမ်းသွားမှာစိုး ၊ ကြောက်စိတ်တိုးကာ
ငုပ်လျှိုးဝှက်ကွယ် ၊ ရင်ခွင်လယ်၌
ဖက်တွယ်ထားမိ ၊ရင်ချင်းငြိလျှက်
ပီတိဖြာဝေ ၊ နမ်းမိုးခြွေသော်
ရှက်ပြေပုတ်ခတ် ၊မောင့်ရင်ဘတ်မှာ
ပွင့်ဖတ် နုလွှာ ၊မှန်သည်သာ ဟု
ကြင်နာစိတ်ကဲ ၊အနမ်းသည်း(သဲ)ခဲ့..။

ရင်ထဲအေးစိမ့် ၊ တစ်ငြိမ့်ငြိမ့်နှင့်
နှစ်သိမ့်ချိုမြ ၊ ညလည်း လှ ၏
လောကတစ်ခွင် ၊ကြည့်၍ုမြင်သော
ဝန်းကျင်အားလုံး ၊ အလှဖုံး၏
ချစ်ဆုံးမေသာ ၊ရင်ခွင်လွှာဝယ်
ကြင်နာမှေးမှိတ် ၊တစ်ရေးအိပ်ဖို့
ချော့သိပ်တေးသံ ၊မေတ္တာရံလျှက်
အိပ်ဖန်စောင့်ရာ ၊ညကမ္ဘာ သည်
လှဖြာ ဝေစည် ၊ကဗျာ ပီသော်..
ရွှင်ကြည်ပြုံးဝင့်နေသည် တကားးးးး ၊။

                    ရတုသစ်
        (   3-12-2012==11 :50PM)

လမ်းလျှောက်ငှက်တစ်ကောင်ရဲ့ညချော့တေး

ထည့်ယူစရာပစ္စည်းတွေစုံလင်ပြီလား
စလင်းဘက်အိပ် ကိုသက်ပြင်းတစ်ချက်နဲ့ဇစ်ဆွဲပိတ်လိုက်တယ်..
တရိပ်ရိပ်ဝင်လာတဲ့အတွေးတွေခေါင်းရမ်းထုတ်လိုက်
မိုက်ဇာတ်က ကချင်လို့ ကနေတာမဟုတ်မှန်း ကိုယ်တိုင်သိရဲ့
ကျလာမယ့် ကန့်လန့်ကာအပိတ်က နှေးကွေးလွန်းတယ်..။

လေးလံနေတဲ့စိတ်ကိုမိတ်ကပ်ထူထူလိမ်းပြီး ဖို့ပစ်လိုက်ရ
ဆန္ဒမပါတဲ့ ကိုယ်ငွေ့ကို ပေါင်ဒါပုတ်ပြီး ကွယ်ဝှက်ထားမယ်
အပူသည်မိသားစုအတွက် ရင်ထဲက အပူနဲ့ ငြှိမ်းသတ်ပေးနေခဲ့
အချစ်မဲ့အနမ်းခါးတွေကမ်းကပ်တဲ့နှုတ်ခမ်းပါးက
မိတ္တူ အပြုံးတွေပဲ ပွင့်ဖူးတယ်..။

လောကမာယာ...ရေ..
မျက်ရည်ဆိုတာ လူမသိ သူမသိခိုးကျဖို့ပဲတတ်နိုင်တော့တယ်ထင်ရဲ့
တစ်ချို့တွေ  ထောင်မြင်လို့ ရာစွန့်နေချိန်မှာ
ရာ မြင် ရဖို့အတွက်စွန့်လိုက်ရ..ဘ၀..
ခဏခဏသေဆုံးခဲ့တဲ့အိပ်မက်မြစ်ထဲမှာ အသွေးအသားတွေမျောပါသွား
မဟားဒယား ညကပွဲမှာ“ချစ်တယ် ”ဆိုတဲ့ဝေါဟာရထည်လဲသုံးခဲ့မိ
အဆိပ်ရှိတဲ့ ဒီဆူးကိုချိုလွန်းလို့ သည်းခံနေတာမဟုတ်ရပါဘူး..။

စိတ်ကူးနဲ့လက်တွေ့ စေ့စပ်မရတဲ့ဘ၀တိုက်ပွဲမှာ
အသဲစကားကိုငြင်းဆန်လိုက်ရပေါ့
ချစ်သူကိုလည်းစွန့်ပစ်ခဲ့ရတယ်
ရိုက်ချိုးထားရတဲ့အတ္တကြောင့် မာနတွေမလွှင့်နိုင်တော့
တလွင့်လွင့် ဝေးသွားတဲ့အနာဂတ်လမ်းဟာ စမ်းတ၀ါးဝါးပဲလေ..။

မေမေရေ...
အူမ မတောင့်တဲ့မိသားစုအတွက် တွေးတွေးပြီး
ရှိမဲ့ စုမဲ့သီလလေးကို ချကျွေးလိုက်ရပေါ့
ပျော်တယ် လို့မဆိုသာပေမယ့်
ပြုံးနိုင်အောင်ကြိုးစားခဲ့ပါတယ်..။

လောကကိုတိုင်တည်ပြီး မဆွေးချင်တော့ပါဘူး
ဘ၀ကိုနာကြည်းပြီး မတွေးချင်တော့ပါဘူး
ခေတ်ကိုအပြစ်ရှာပြီး မငေးချင်တော့ပါဘူး
တရားခံကတရားလိုယောင်ဆောင်နေတတ်တဲ့မျက်လှည့်သီအိုရီမှာ
ရေလိုက်ငါးလိုက် ပျော်ဝင်ကူးခတ်ရင်း
ဒီဇာတ်လမ်း အဆုံးကိုအမှောင်ထဲက စောင့်နေမိတယ်လေ..။

                          ရတုသစ်
        (     2 -12-2012  11 : 10 PM)
         http://yatuthit.blogspot.com/

နာမည်မမှည့်ရသေးတဲ့ဘီလူးတစ်ကောင်ရဲ့အတ္ထုပ္ပတ္တိ

ဖြစ်တည်ခြင်း စကတည်းက အမှောင်ကိုခေါင်းပေါ်ရွက်ထားခဲ့
အိုးရွဲု့ကိုစလောင်းပဲ့နဲ့ဖုံး ဖို့ သူ တတ်ကျွမ်းပြီးသား
နှလုံးသားထက်အသွေးအသားအလိုပဲ လိုက်မယ်..။

ကိုယ်တိုင်မမှည့်လည်း နာမည်ကရမှာပဲ
အလုပ်ရဲ့သမိုင်းမှာ နာမည်ကောင်း/ဆိုး ကမ္ပည်းထိုးထားပြီးပေါ့
ဘွဲ့ဖြူပုဆိုးမပိုင်ပေမယ့် သူ့မှာ မာနတွေဖြိုင်ဖြီုင်ဝေခဲ့
ပုပ်အဲ့အဲ့ ရနံ့ကို သူ နှစ်ခြိုက်  တပ်မက်
အချစ်ရဲ့ အခြားတစ်ဖက်မှာ သူနေတယ်..။

မေတ္တာတရားဆိုတာ သူ့အတွက်မရှိလည်း ဖြစ်တဲ့အရာ
ငတေမာ စိတ်ဓာတ်က သူနဲ့ရင်ချင်းဆက်အမြွှာဖြစ်ရဲ့
ဖြစ်ခဲ့သမျှကို သင်ပုန်းချေဖို့ စိတ်မ၀င်စားဘူး
တူးမိတဲ့ သိုက် အဆုံးထိ လိုက်ဖို့ပဲတွေးတယ်..။

သွေး ဆိုတာ အနှစ်သက်ဆုံးဓာတ်စာ..
အာဟာရထဲမှာ သူတစ်ပါးမျက်ရည်ကအချိုမြိန်ဆုံး
အမှောင်ဖုံးနေတဲ့ပြဇာတ်တွေထဲမှာနေသားတကျနေရာယူတတ်ခဲ့
သူတတ်တဲ့ပညာရပ်ထဲမှာကလိမ်ကကျစ်က ကျွမ်းကျင်ဘာသာ
မာယာသာဌေယျ တွေရဲ့စည်းဝိုင်းမှာ သူ စိတ်တိုင်းကျနေမိ
ကတိ/ဂတိဆိုတာသူ့ပါးစပ်ကပြောလွယ်တဲ့ကိုယ်တွင်းဖြစ်အသံ
စိတ်နံရံတွေမှာမသန့်ရှင်းမှုတွေချိတ်ဆွဲထားပေါ့
သူ့အ်ိပ်ကပ်ထဲမှာ မသထာရေစာတွေ အပြည့်သိုလှောင်ထားတယ်..။

အောင်မြင်မှုတစ်ခုအတွက် သူတစ်ပါးနှာခေါင်းနဲ့အသက်ရှူမယ်..
လူလည်ကျရတာသူ့ဂိမ်းဆော့ဖ်ဝဲလ်တစ်ခုဖြစ်နေရဲ့
အလှည့်ကျလည်းမနွဲ့တတ်သလိုလိုနဲ့သူမူယာပိုနေတတ်သေး
မိုးပြေးဆိုတာ ရှပ်ပြေးလေးပဲရွာတယ်ဆိုတာ သူမေ့ထားတယ်..။

အဲလိုပဲ..သူဘာကောင်လဲဆိုတာ..သူမေ့ထားတုံးပါပဲ..
သူ့အတ္ထုပ္ပတ္တိမှာ သူ့နာမည် ကွက်လပ်ဖြည့်ဖို့လိုနေတုံးပါပဲလေ..။

                              ရတုသစ်
                         ( 29 -11-2012)